គ្មានមនុស្សដែលគួរទុកចិត្ត លោក ត្រាំ ជ្រើសរើសកូនស្រីធ្វើជាទីប្រឹក្សាផ្ទាល់

ដោយពិបាករកអ្នកដែលមានទស្សនៈដូចប្រធានាធិបតី ត្រាំ ឲ្យចូលកាន់តំណែង ជាទីប្រឹក្សាប្រធានាធិបតីលោក ត្រាំ ក៏ បានសម្រេចចិត្តជ្រើសរើសកូនស្រី និងកូនប្រសាឲ្យចូលធ្វើជាទីប្រឹក្សាតែម្តង។

កន្លងមកលោកស្រី Ivanka ត្រូវបានគេ សង្កេតឃើញថា ជាអ្នកដើរតួនាទីសំខាន់ បំផុតកាលពីក្នុងពេលឃោសនាបោះឆ្នោតរបស់ឪពុកខ្លួន។ ចាប់តាំងពីលោក ដូណាល់ ត្រាំ បានឡើងកាន់តំណែងមានការចោទ សួរជាច្រើនពីសំណាក់មហាជនពីតួនាទី ពិតប្រាកដរបស់លោកស្រី Ivanka ដែល ត្រូវជាកូនស្រីច្បងរបស់លោក ដូណាល់ ត្រាំ។ លោកស្រី Ivanka ត្រូវបានគេរៀបចំឲ្យមានការិយាល័យផ្ទាល់ខ្លួននៅក្នុងសេតវិមាន ទាំងដែលលោកស្រីគ្មានមុខតំណែងអ្វីសោះជាផ្លូវការ។ ជាងនេះទៅទៀតគេ សង្កេតឃើញលោកស្រី Ivanka មានវត្តមាន អមជាមួយលោក ដូណាល់ ត្រាំ ជានិច្ច នៅពេលមានជំនួបជាមួយមេដឹកនាំក្រុមហ៊ុនធំៗ និងថ្នាក់ដឹកនាំបរទេសដូចជាពេល លោក ត្រាំ ជួបលោកនាយករដ្ឋមន្ត្រីកា ណាដា ឬក៏ជួបលោកស្រីអធិការបតីអាល្លឺម៉ង់ជាដើម។

កូនស្រីរបស់ប្រធានាធិបតី ត្រាំ គឺនាង Ivanka Trumps បានប្រកាសឲ្យដឹងថា នាង មានតួនាទីជាទីប្រឹក្សារបស់ប្រធានាធិបតីដែលការងារនេះនាងសុខចិត្តធ្វើក្នុងនាមជាបុគ្គលិកស្ម័គ្រចិត្តដោយមិនយកប្រាក់បៀវត្សឡើយ។ គួរបញ្ជាក់ដែរថា លោក Jared Kusner ប្តីរបស់លោកស្រី Ivanka ក៏មានមុខតំណែងជាទីប្រឹក្សារបស់ឪពុកក្មេក ខ្លួនដែរ ហើយដែលលោកម្នាក់នេះបាន ប្រកាសថាធ្វើក្នុងនាមជាបុគ្គលិកស្ម័គ្រចិត្តមិនយកប្រាក់ខែ។

បន្ទាប់ពីលោក Jared Kushner ត្រូវជា ស្វាមី គឺដល់វេនលោកស្រី Ivanka Trumps ដែលត្រូវប្រកាសថាខ្លួន គឺជាទីប្រឹក្សាផ្ទាល់ របស់លោក ដូណាល់ ត្រាំ ដែលត្រូវជា ឪពុក។ នៅក្នុងសេចក្តីប្រកាសរបស់លោក ស្រី Ivanka Trumps លោកស្រីបានសរសេរ ថា លោកស្រីបានឃើញ និងបានឮអំពីការព្រួយបារម្ភរបស់មហាជនដែលចោទសួរ អំពីតួនាទីរបស់លោកស្រីនៅក្នុងសេត វិមាន។ លោកស្រីបានប្រកាសថា ចាប់ពីពេលនេះទៅលោកស្រីគឺជាទីប្រឹក្សាផ្ទាល់ របស់លោកប្រធានាធិបតី ដូណាល់ ត្រាំ ហើយការងារនេះជាការងារស្ម័គ្រចិត្តពុំ មានប្រាក់បៀវត្សទេ។ លោកស្រីឆ្លៀត បញ្ជាក់ទៀតថា ធ្វើបែបនេះគឺដើម្បីបង្ហាញពីតម្លាភាព និងភាពស្អាតស្អំរបស់គ្រួសារលោកស្រី៕ ម៉ែវ សាធី