សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ ស្ថិតក្រោមក្រសែភ្នែកអ្នកទស្សនានៅទីលានប្រកួតប្រមាណច្រើនជាង៣ម៉ឺននាក់នោះ ក្នុងជំនួបប្រកួតមិត្តភាពអន្តរជាតិ រវាងក្រុមជម្រើសជាតិកម្ពុជា នឹងក្រុមជម្រើសជាតិមីយ៉ាន់ម៉ា នៅពហុកីឡដ្ឋានជាតិភ្នំពេញកាលពីរាត្រីថ្ងៃព្រហស្បតិ៍ ទី៩ ខែវិច្ឆិកា ឆ្នាំ២០១៧កន្លងទៅ គឺក្រុមបាល់ទាត់កម្ពុជា លេងចាញ់ក្រោមថ្វីជើងមីយ៉ាន់ម៉ា ដោយលទ្ធផលបច្ចេកទេស ២-១ ។
ការប្រកួតមិត្តភាពនេះ ចាប់ផ្តើមលេងបាន ១៥នាទី ក្រុមមីយ៉ាន់ម៉ា បាននាំមុខ១គ្រាប់មុនកម្ពុជាដោយការតែតបាល់បញ្ចូលទីពីសំណាក់កីឡាករពាក់អាវលេខ៣ ខណៈដែលកីឡាករកម្ពុជា ប្រាក់ មុន្នីឧត្តម រកគ្រាប់បាល់តាមពីក្រោយមីយ៉ាន់ម៉ា នៅនាទីទី៥៤ ដោយបានសហការគ្នាលេងបានយ៉ាងល្អពីមិត្តរួមក្រុម គឺ កីឡាករ ចាន់ វឌ្ឍនាកា ហើយក៏បង្កឲ្យមានឱកាសជាច្រើនទៀតពី ចាន់ វឌ្ឍនាកា នៅចុងម៉ោងវគ្គទីមួយនៃការប្រកួតមិត្តភាពនេះដែរតែធ្វើមិនបានល្អ ។
គ្រាប់បាល់១ស្មើនេះបានរក្សាទុករហូតដល់ចន្លោះនាទីទី៧១នៃវគ្គទី២ ទើបក្រុមមីយ៉ាន់ម៉ាមានឱកាស ស៊ុតបាល់បញ្ចូលទីកម្ពុជាបាន១គ្រាប់បន្ថែមទៀត នាំមុខកម្ពុជា ២-១នៅនាទីទី៧១ រហូតដល់បញ្ចប់ការប្រកួត៩០នាទី ។
បើទោះបីក្រុមកម្ពុជាខិតខំដាក់សម្ពាធទៅលើក្រុមភ្ញៀវយ៉ាងណា និងការផ្លាស់ប្តូរកីឡាករឆ្នើមៗចូលលេងទាំងអស់ក៏ដោយ ក៏មិនអាចស្វែងរកគ្រាប់បាល់តាមស្មើបានដែរ។ ក្រុមជម្រើសជាតិកម្ពុជា ក្រោមការដឹកនាំរបស់ គ្រូបង្វឹក ប្រាក់ សុវណ្ណារ៉ា បានលេងចាញ់ក្រុមភ្ញៀវលើកទីមួយ ។
ប្រវត្តិជួបគ្នា១៣ប្រកួតរវាងក្រុមកម្ពុជានឹងមីយ៉ាន់ម៉ា៖
មីយ៉ាន់ម៉ា ៥-០ កម្ពុជា ក្នុងពាន AFF Championship 1996
មីយ៉ាន់ម៉ា ៣-១ កម្ពុជា ការប្រកួតស៊ីហ្គេម ឆ្នាំ១៩៩៧
មីយ៉ាន់ម៉ា ០-០ កម្ពុជា ការប្រកួតស៊ីហ្គេម ឆ្នាំ២០០១
មីយ៉ាន់ម៉ា ៥-០ កម្ពុជា ក្នុងពាន AFF Championship 2002
កម្ពុជា ១-៧ មីយ៉ាន់ម៉ា ការប្រកួតមិត្តភាព ឆ្នាំ២០០៨
មីយ៉ាន់ម៉ា ៣-២ កម្ពុជា ក្នុងពាន AFF Championship 2008
មីយ៉ាន់ម៉ា ១-០ កម្ពុជា ការប្រកួតមិត្តភាព ឆ្នាំ២០០៩
មីយ៉ាន់ម៉ា ៣-០ កម្ពុជា ក្នុងពាន AFF Championship 2012
កម្ពុជា ០-១ មីយ៉ាន់ម៉ា ការប្រកួតមិត្តភាព ឆ្នាំ២០១៤
កម្ពុជា ០-១ មីយ៉ាន់ម៉ា ក្នុងពាន AFF Championship 2014
កម្ពុជា ១-០ មីយ៉ាន់ម៉ា ការប្រកួតមិត្តភាព ឆ្នាំ២០១៥
កម្ពុជា ១-៣ មីយ៉ាន់ម៉ា ក្នុងពាន AFF Championship 2016
កម្ពុជា ១-២ មីយ៉ាន់ម៉ា ក្នុងការប្រកួតមិត្តភាពកាលពីថ្ងៃថ្ងៃទី៩ ខែវិច្ឆិកា ឆ្នាំ២០១៧។
ក្នុងជំនួបប្រកួតលក្ខណៈមិត្តភាពអន្តរជាតិនេះ ធ្វើឡើងក្នុងគោលបំណងស្ទង់កម្លាំងឆ្ពោះ ទៅវគ្គជម្រុះពានរង្វាន់អាស៊ី AFC Asian Cup 2019 ដែលកម្ពុជា ត្រូវជួបក្រុមហ្ស៊កដានីនៅកីឡដ្ឋានជាតិភ្នំពេញ សម្រាប់ជើងទី២ នាថ្ងៃទី១៤ ខែវិច្ឆិកា ឆ្នាំ២០១៧ខាងមុខនេះ ៕ សារីម
