ខ្សែប្រយុទ្ធ Mohamed Salah ឈ្នះពានកីឡាករលេងល្អប្រចាំឆ្នាំ

ចែករំលែក៖

ខ្សែប្រយុទ្ធ Mohamed Salah របស់ក្រុមហង្សក្រហម Liverpool បានឈ្នះពានកីឡាករលេងល្អប្រចាំឆ្នាំ នៅក្របខ័ណ្ឌកំពូលអង់គ្លេស Premier League លើកទី៤៥ ដែលកម្មវិធីនេះប្រព្រឹត្តទៅនៅ Grosvenor House នាទីក្រុងឡុង ចក្រភពអង់គ្លេសកាលពីសប្តាហ៍មុន។ Salah បានបង្ហាញទម្រង់លេងល្អ បំផុតនៅរដូវកាលដំបូងឲ្យក្រុមក្រោយផ្ទេរពីក្រុម Roma មកកីឡដ្ឋាន Anfield របស់ Liverpool ក្នុងតម្លៃ៣៤,៣លានផោន កាលពីរដូវក្តៅឆ្នាំមុន។ បច្ចុប្បន្ន Salah រកគ្រាប់បាល់បានរហូតដល់ ៣១គ្រាប់ និង Assist ៩គ្រាប់នៅក្របខ័ណ្ឌ Premier League រដូវកាលនេះធ្វើឲ្យរូបគេកំពុងនាំ មុខជាកីឡាករដែលរកគ្រាប់បាល់បានច្រើននៅរដូវកាលនេះដែលនឹងក្លាយជាម្ចាស់ស្បែក ជើងមាសផងដែរ ។

ខ្សែប្រយុទ្ធសញ្ជាតិអេហ្ស៊ីបវ័យ២៥ឆ្នាំរូបនេះបានឈ្នះគូប្រជែងគឺខ្សែបម្រើសញ្ជាតិបែលហ្សុិក Kevin De Bruyne របស់ក្រុម Manchester City ដើម្បីគ្រងតំណែងកីឡាករលេងល្អប្រចាំឆ្នាំនេះ (PFA) Player of the year។ កីឡាករ Kevin De Bruyne គឺជាបេក្ខភាពឈានមុខគេ ដែលតាមប្រកៀក នឹងម្ចាស់ជ័យលាភី Salah ក្រោយពីជួយក្រុម Man City របស់លោក Pep Guadiola ឲ្យលើកពាន Premier League រដូវកាល(២០១៧-២០១៨)នេះ ប៉ុន្តែទីបំផុតនៅតែមិនអាច ប្រជែងជាមួយកីឡាករកំពុងលេចធ្លោដែលមានប្រភពមកពីតំបន់អាហ្រ្វិកបាន។

ក្រោយពីទទួលបានពានរង្វាន់ជាកីឡាករឆ្នើមប្រចាំ កីឡាករ Salah បានប្រាប់សារព័ត៌មានថា «ខ្ញុំមានអារម្មណ៍រំភើបអ្នកទាំងអស់គ្នាដឹងទេ ថាខ្ញុំបានខិតខំប្រឹងប្រែងលេង ហើយរីករាយ នឹងទទួលពានរង្វាន់នេះ។ ក្រុមទាំងមូលបានចូលរួមចំណែកជួយខ្ញុំផងដែរ។ ពួកគេបានបោះ និងបញ្ជូនបាល់ មកឲ្យខ្ញុំយ៉ាងច្រើន ដូច្នេះអាចនិយាយបានថាក្រុមបានជួយខ្ញុំដោយចិត្តស្មោះ ដើម្បីបង្ហាញទម្រង់លេងបានល្អដូចនេះ»។

ដោយឡែកខ្សែបម្រើប្រយុទ្ធ Leroy Sane របស់ក្រុម Man City បានយកឈ្នះខ្សែប្រយុទ្ធ Rashford និង Kane គ្រងពានជាកីឡាករវ័យក្មេងឆ្នើមបំផុតប្រចាំឆ្នាំ២០១៨នៅអង់គ្លេស PFA (PFA Young Player of the Year) ផងដែរ។

កីឡាករវ័យក្មេងរបស់អាល្លឺម៉ង់រូបនេះបានបង្ហាញសមត្ថភាពលេងលេចធ្លោខ្លាំងនៅរដូវកាលនេះ ស័ក្ដិសមនឹងទទួលបានពានមួយនេះណាស់។ Sane ជាកូនសោដ៏សំខាន់ក្នុងការជួយឲ្យ Man City ក្ដោបពាន Premier League រដូវកាលនេះក្រោមការដឹកនាំរបស់លោក Pep Guardiola។

រដូវកាល២០១៧-១៨ កីឡាករវ័យ២២ឆ្នាំរកបាន៩គ្រាប់ និងបញ្ជូនបាល់ឲ្យមិត្តរួមក្រុមទាត់បញ្ចូលទីបាន១២ដង។ សម្រាប់ជ័យលាភីកីឡាករវ័យក្មេងឆ្នើមបំផុតប្រចាំឆ្នាំ PFA Sane បានប្រជែងឈ្នះកីឡាករខ្លាំងជាច្រើនក្នុងលីកដូចជា Harry Kane របស់ Spurs, Marcus Rashford របស់ Man Utd និងមិត្តរួមក្រុម Ederson និង Raheem Sterling ។

សូមបញ្ជាក់ថា ការប្រគល់ពានរង្វាន់កីឡាករឆ្នើមប្រចាំតែងតែប្រព្រឹត្តទៅនៅចុងរដូវកាល នីមួយៗនៅអង់គ្លេស ហើយកីឡាករភាគច្រើនដែលទទួលបានពាននេះគឺជាខ្សែប្រយុទ្ធ និងខ្សែបម្រើប្រយុទ្ធដែលរកគ្រាប់បាល់បានច្រើន និងបញ្ជូនបាល់ឲ្យគូប្រកួតបានច្រើន។ ចាប់តាំងពីបង្កើតពានរង្វាន់នេះមកមានក្លិបជាច្រើនដែលមានកីឡាករឈ្នះពាននេះ ។ ក្នុងនោះកីឡាករមកពីក្លិបបិសាចក្រហមបានទទួលពាននេះច្រើនជាងគេ ។

ខាងក្រោមនេះគឺជាក្លិបដែលមានកីឡាករឈ្នះពាន (PFA) Player of the year៖

១-Manchester United (១១ដង)

២-Liverpool (៧ដង)

៣-Tottenham Hotspur (៥ដង)

៤-Arsenal (៥ដង)

៥-Chelsea (៣ដង)

៦-Aston Villa (៣ដង)

៧-Everton (២ដង)

៨-Newcastle United (២ដង)

៩-Leeds United(១ដង)

១០-Derby County(១ដង)

១១-Nottingham Forest(១ដង)