សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ: បុរសម្នាក់ស្លាប់ដោយសារបើករថយន្តតូយ៉ូតាព្រូស ទៅបុកទ្រូងក្បាលនាគពុះចែកទ្រូងផ្លូវ នៅមុខច្រកចូលផ្សារទួលគោក ហើយបណ្តាលឲ្យឆេះរថយន្ត ។
ហេតុការណ៍នេះ បានកើតឡើងកាលពីម៉ោង៤ទៀបភ្លឺ ថ្ងៃទី២ ខែតុលា ឆ្នាំ២០១៨ ស្ថិតនៅតាមបណ្តោយផ្លូវលេខ២៨៩ ក្នុងសង្កាត់បឹងកក់ទី២ ខណ្ឌទួលគោក រាជធានីភ្នំពេញ ។
សមត្ថកិច្ចបានឲ្យដឹងថា សពបុរសជាអ្នកបើកបររថយន្តមានឈ្មោះ អេន សៅ អាយុ២៥ឆ្នាំ មានស្រុកកំណើតនៅភូមិទី៥ ឃុំព្រែកតានង់ ស្រុកកោះសូទិន ខេត្តកំពង់ចាម បើករថយន្តម៉ាក តូយូតាព្រូស ពណ៌ទឹកប្រាក់ គ្មានស្លាកលេខ ។
ប្រភពព័ត៌មាននៅកន្លែងកើតហេតុបានឲ្យដឹងថា មុនពេលកើតហេតុ គេឃើញមានបុរសម្នាក់បើកបររថយន្តមួយគ្រឿងម៉ាក តូយូតាព្រូស ពណ៌ទឹកប្រាក់ គ្មានស្លាកលេខ ចរាចរណ៍តាមបណ្ដោយផ្លូវ២៨៩ ក្នុងទិសដៅពីត្បូងទៅជើង និងល្បឿនយ៉ាងលឿន ។ ខណៈមកដល់ចំណុចកើតហេតុរថយន្តបានរេចង្កូតជ្រុលទៅបុកក្បាលនាគព្រួញ ពុះចែកទ្រូងផ្លូវពេញទំហឹង បណ្តាលឲ្យមានផ្សែងហុយចេញពីរថយន្តកើតជាអណ្តាតភ្លើងឆាបឆេះរថយន្តតែម្តង ហើយក៏មានប្រជាពលរដ្ឋជួយទាញយកអ្នកបើកបររថយន្តចេញពីក្នុងរថយន្ត តែអ្នកបើកបរបានបាក់កស្លាប់បាត់ទៅហើយ និងមានប្រជាពលរដ្ឋខ្លះបាននាំគ្នាទាញទុយយោទឹកបាញ់ពន្លត់រថយន្ត តែមិនរលត់ ក៏រាយការណ៍ប្រាប់សមត្ថកិច្ច ហៅរថយន្តពន្លត់អគ្គិភ័យរបស់ស្នងការរាជធានីភ្នំពេញមកចំនួនពីរគ្រឿង ជួយបាញ់ពន្លត់អស់ទឹកតែបន្តិច ក៏រលត់ជាស្ថាពរ។
បន្ទាប់ពីកើតហេតុសមត្ថកិច្ចបានដឹកយកសពទៅតម្កល់ទុកនៅវត្តទឹកថ្លា ដើម្បីរង់ចាំសាច់ញាតិ ដោយឡែករថយន្តត្រូវបានសមត្ថកិច្ចជំនាញស្ទូចយកទៅរក្សាទុកនៅការិយាល័យចរាចរផ្លូវគោកនៃស្នងការដ្ឋាននគរបាលរាជធានីភ្នំពេញ ៕ ជ្រោយពេជ្រ
