សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ រថយន្តស៊េរីទំនើបមួយគ្រឿងបើកបុករបាំងថ្មពុះចែកទ្រូងផ្លូវបណ្តាលឲ្យរងរបួសធ្ងន់ ។ ហេតុការណ៍នេះបានកើតឡើងកាលម៉ោង៩និង៣០នាទីយប់ នៅតាមបណ្ដោយផ្លូវលេខ២៨៩ ច្រកចូលផ្សារទួលគោក ស្ថិតក្នុងសង្កាត់បឹងកក់ទី២ ខណ្ឌទួលគោក រាជធានីភ្នំពេញ ។
សមត្ថកិច្ចបានឲ្យដឹងថា អ្នកបើកបររថយន្តមិនត្រូវបានស្គាល់អត្តសញ្ញាណទេ មានអាយុប្រហែល៣០ឆ្នាំ បើកកបររថយន្តមួយគ្រឿងម៉ាក មែកសឺដេស AMG C63 ពណ៌ស គ្មានស្លាកលេខ ។
ប្រភពព័ត៌មាននៅកន្លែងកើតហេតុបានឲ្យដឹងថា គេឃើញបុរសម្នាក់ បើករថយន្តមួយគ្រឿងម៉ាក មែកស័រដេស AMG C63 ពណ៌ស គ្មានស្លាកលេខ ទំនងជាស្រវឹងស្រា បានបើកតាមបណ្ដោយផ្លូវលេខ២៨៩ ក្នុងទិសដៅពីត្បូងទៅជើងយ៉ាងលឿន ។
ខណៈមកដល់ចំណុចកើតហេតុស្រាប់តែរថយន្តរេចង្កូតទៅបុកក្បាលនាគ ពុះចែកទ្រូងផ្លូវពេញទំហឹង បណ្តាលឲ្យរថយន្តរួចមួយកំណាត់មុខ ចំណែកឯអ្នកបើកបររងរបួសធ្ងន់ត្រូវបានរថយន្តសង្គ្រោះបន្ទាន់ដឹកយកទៅសង្គ្រោះនៅគ្លីនិក ហុងហាក់ ។
បន្ទាប់ពីកើតហេតុសមត្ថកិច្ចជំនាញក៏បានចុះមកស្ទូចយករថយន្តទៅរក្សាទុកនៅការិយាល័យចរាចរផ្លូវគោកនៃស្នងការដ្ឋាននគរបាលរាជធានីភ្នំពេញរង់ចាំដោះស្រាយនៅពេលក្រោយ ៕ ជ្រោយពេជ្រ
