សារព័ត៌មាន នគរវត្ត តែងតែនាំមុខគេជានិច្ច
កាលពីថ្ងៃទី១៧ ខែធ្នូ សម័យប្រជុំពេញអង្គរបស់អង្គការសហប្រជាជាតិបានធ្វើឡើង ហើយជាលទ្ធផល គេបានសម្រេចថ្កោលទោសទៅលើរដ្ឋាភិបាលកូរ៉េខាងជើង ថាបានរំលោភបំពានសិទ្ធិមនុស្សជាប្រព័ន្ធ ដ៏រីករាលដាល ព្រមទាំងការចំណាយលុយសម្រាប់សុខុសមាលភាពប្រជាពលរដ្ឋទៅផលិតអាវុធកាំជ្រួចមីស៊ីល ។
អង្គប្រជុំបានកត់សម្គាល់ថា «ព្រួយបារម្ភ» ទៅលើពលរដ្ឋកូរ៉េខាងជើងជាង១០លាននាក់ ស្ថិតក្រោមកង្វះអាហារូបត្ថម្ភ ហើយការកង្វះអាហារូបត្ថម្ភនេះស្ថិតនៅក្នុងកម្រិតខ្ពស់ដ៏រ៉ាំរ៉ៃមិនអាចទទួលយកបាននោះទេ ។
សេចក្តីព្រាងដំណោះស្រាយ ដែលជប៉ុន និងសហភាពអឺរ៉ុបឧបត្ថម្ភនោះ ទទួលការយល់ស្របពីប្រទេសទាំងឡាយ ប៉ុន្តែរុស្ស៊ី ចិន គុយបា និងវេណេហ្ស៊ុយអេឡា មិនបានគាំទ្រនោះទេ ។ ប្រទេសខ្លះទៀតប្រឆាំង ទៅនឹងដំណោះស្រាយអង្គការសហប្រជាជាតិនេះ ហើយថា ក្រុមប្រឹក្សាសិទ្ធិមនុស្សមូលដ្ឋាននៅហ្ស៊ីណែវ ទើបគួរជាអ្នកដោះស្រាយអំពីបញ្ហាសិទ្ធិមនុស្សនេះ ។
លោក Kim Song អគ្គរដ្ឋទូតកូរ៉េជាងជើងប្រចាំអង្គការសហប្រជាជាតិថ្លែងថា ប្រទេសរបស់លោកសូមប្រឆាំងជាដាច់ខាត ដំណោះស្រាយ មួយនេះ និងថា ដំណោះស្រាយនេះ គឺជាផ្នែកនយោបាយ និងបង្ខំឲ្យមានអរិភាពកើតឡើងជាមួយកូរ៉េខាងជើង ។
លោក Kim Song បានបន្តថា ជប៉ុនកំពុងបង្កឲ្យមានការប្រឈមមុខជាមួយកូរ៉េខាងជើង ដោយរុញស្ថានការឲ្យធ្លាក់ទៅក្នុងលំនាំដើម ដូចដែលកើតឡើងនៅឧបទ្វីបកូរ៉េ ៕
