សារព័ត៌មាន នគរវត្ត តែងតែនាំមុខគេជានិច្ច
រដ្ឋាភិបាលប្រទេសជាច្រើនក្នុងតំបននៅតំបន់អឺរ៉ុប កំពុងតែ«ឈឺក្បាល »ដោយសារតែ ការធ្វើបាតុកម្មប្រឆាំងគ្រប់រូបភាព គ្របមូលហេតុផ្សេងគ្នា ។ បាតុកម្មពណ៌ អាចនិយាយបានថា ចាប់ផ្តើមចេញពីប្រទេសបារាំង ដោយបាតុករបានពាក់អាវកាក់ពណ៌លឿង ប្រឆាំងនឹងការដំឡើងពន្ធប្រេង ។ បាតុកម្មបានរាលដាលដល់ប្រទេសជិតខាងក្នុងតំនប់អឺរ៉ុប ដូចនៅកាណាដាជាដើម ។
បាតុកម្ម អាចនិយាយបានថា ធ្ងន់បំផុតគឺនៅក្នុងប្រទេស ប៊ែលហ្ស៊ិក ហើយពេលនេះ នាយករដ្ឋមន្ត្រី Charles Michel បានដាក់លិខិតឡើងទៅកាន់ព្រះមហាក្សត្រ Philippe សុំលាលែងពីតំណែង ក្រោយពេលគណបក្សប្រឆាំងនៅក្នុងសភា បញ្ឈប់ការគាំទ្រ ដល់គោលនយោបាយរបស់លោក ។ វិវាទកើតឡើង ពេលដែលនាយករដ្ឋមន្ត្រីវ័យ ៤២ឆ្នាំគាំទ្រកិច្ចព្រមព្រៀង ស្តីពីជនភៀសខ្លួនរបស់អង្គការសហប្រជាជាតិ ជំរុញឲ្យមានមហាបាតុកម្មកើតឡើងប្រឆាំង រដ្ឋាភិបាល ។
ក្នុងពេលជាមួយគ្នានេះដែរ ពលរដ្ឋប្រមាណ ១ម៉ឺននាក់ទៅ១ម៉ឺន៥ពាន់នាក់ បានប្រមូលផ្តុំគ្នាធ្វើបាតុកម្ម នៅរដ្ឋធានី Budapest ប្រទេសហុងគ្រី ទាមទារនាយករដ្ឋមន្ត្រី Viktor Orban ដកហូតច្បាប់អនុញ្ញាតឲ្យក្រុមហ៊ុន ស្នើបុគ្គលិក ធ្វើការបន្ថែម៤០០ម៉ោងក្នុងមួយឆ្នាំ ។ នេះជាបាតុកម្មទ្រង់ទ្រាយធំបំផុតនៅក្នុងប្រទេសហុងគ្រីមិនធ្លាប់មាន ក្នុងរយៈពេល៨ឆ្នាំ ចុងក្រោយនេះ ក្រោមការដឹកនាំរបស់នាយករដ្ឋមន្ត្រី Orban ។ ច្បាប់ខាងលើ បានអនុម័ត កាលពីថ្ងៃទី១២ ខែធ្នូ ហើយតាំងពីពេលនោះមកទល់ពេលនេះ ពលរដ្ឋ បាននាំគ្នាប្រឆាំងនឹងច្បាប់«ទាសករ»នោះ នៅគ្រប់ទិសទី ។ ក្រៅពីនេះ ពលរដ្ឋបង្ហាញការខឹងសម្បារយ៉ាងខ្លាំង ដល់សកម្មភាពប្រឆាំងនឹងក្រុមពលរដ្ឋគ្មានផ្ទះសម្បែង និងក្រុមជនភៀសខ្លួន ។
ចំណែកនៅក្នុងទីក្រុង Belgrade ប្រទេស សឺបៀវិញ ពលរដ្ឋរាប់សិបពាន់នាក់ បាននាំគ្នាដង្ហែក្បួនបាតុកម្ម ប្រឆាំងរដ្ឋាភិបាល ក្រោយមានអំពើហិង្សា ទៅលើមេដឹកនាំគណបក្សប្រឆាំង សឺបៀ លោក Borko Stefanovic រងរបួស ធ្ងន់ ។
នៅក្នុងប្រទេស អាលបានៀ ពលរដ្ឋជាច្រើន ក្នុងនោះមានក្រុមនិស្សិត បាននាំគ្នាដង្ហែក្បួនបាតុកម្ម ប្រឆាំងនឹងការដំឡើងថ្លៃសាលា ក្នុងពេលដែលជីវភាពរស់នៅរបស់ពលរដ្ឋ កាន់តែវេទនា ហើយតម្លៃប្រេងឡើងថ្លៃខ្ពស់ ។
អ្វីដែលគួរឲ្យចាប់អារម្មណ៍បំផុតនោះគឺនៅក្នុងប្រទេសអាល្លឺម៉ង់ មានមហាបាតុកម្មកើតឡើង ដោយយកទម្រង់ទៅតាមបារាំង គឺបាតុកម្មអាវកាក់ពណ៌លឿង ។ បាតុកម្មនៅអាល្លឺម៉ង់ រៀបចំឡើងដោយមេដឹកនាំ ក្រុមប្រឆាំង Sahra Wagenknecht ទាក់ទាញ់មនុស្សជាច្រើនចូលរួម ។
ប្រព័ន្ធផ្សព្វផ្សាយអាល្លឺម៉ង់ Deutsche Welle បានដាក់សំណួរសួរថា តើបរិយាកាសនៅតាមផ្លូវថ្នល់ក្នុងតំបន់អឺរ៉ុប កំពុងតែក្តៅខ្លាំងឡើង ដោយសារបាតុកម្មឬ? ។ បាតុកម្មទាំងនោះ បានបង្កក្តីបារម្ភយ៉ាងខ្លាំង ពីវិបត្តិនៅក្នុងតំបន់អឺរ៉ុបកាន់តៃខ្លាំងឡើង ។
អាចនិយាយបានថា អាល្លឺម៉ង់ និងបារាំង គឺជាប្រទេស ដើរតួនាទីយ៉ាងសំខាន់ នៅក្នុងតំបន់ អឺរ៉ុប ទាំងមូល ហើយពេលនេះ ប្រទេសទាំងពីរកំពុងប្រឈមនូវការធ្វើបាតុកម្ម ប្រឆាំងពីពលរដ្ឋ នឹងធ្វើឲ្យដំណើរការអនុវត្តនយោបាយសំខាន់ៗ ត្រូវ រាំងស្ទះ ប៉ះពាល់ដល់អឺរ៉ុប ទាំងមូល ។
ពាក់ព័ន្ធនឹងបាតុកម្មនៅក្នុងប្រទេសបារាំង ក្រុមបាតុករបានបិទផ្លូវ ល្បឿនលឿន ដុតបំផ្លាញបញ្ជរបង់ប្រាក់ ធ្វើឲ្យ សន្តិសុខសណ្តាប់ធ្នាប់ សាធារណៈ និងសេដ្ឋកិច្ចជាតិធ្លាក់ចុះ គិតជាទឹកប្រាក់រាប់រយលានអឺរ៉ូ ។ ការបិទផ្លូវចំពេល ដែលពិធីបុណ្យគ្រីស្មាសជិតមកដល់ តម្រូវការធ្វើចរាចរណ៍កើនឡើងខ្ពស់ ។
លោក Vinci Autoroutes អ្នកគ្រប់គ្រង បញ្ជរបង់ប្រាក់ផ្លូវធំបំផុតនៅលើបារាំង បានប្រកាសថា ក្រុមបាតុករ បាន គ្រប់គ្រងផ្លូវនៅ៤០កន្លែងផ្សេងគ្នា ធ្វើឲ្យតំបន់មួយចំនួន ត្រូវកាត់ផ្តាច់ ។ ពិសេស គឺទីតាំងបញ្ជរបង់ប្រាក់ រងការខូចខាត ដោយសារក្រុមបាតុករ វាយកម្ទេច ស្ថិតនៅតំបន់ Avignon,Orange,Perpignan និង Adage ។
ផ្លូវល្បឿនលឿន A50 តភ្ជាប់រវាងទីក្រុង ម៉ាស៊ី នឹង Toulou ត្រូវបានបិទទ្វារ ក្រោយក្រុមបាតុករបិទផ្លូវដុតបំផ្លាញបញ្ជរបង់ប្រាក់ ។ លោក Vinci បានឲ្យដឹងថា ទីកន្លែងបញ្ជរបង់ប្រាក់ផ្លូវផ្សេងទៀត នៅតំបន់ Manosque ត្រូវបានដុតបំផ្លាញផងដែរ ។ មានបាតុករ ប្រមាណជាង២០នាក់ ត្រូវបានចាប់ខ្លួនកាលពីថ្ងៃទី១៨ ខែធ្នូ ក្នុងនោះមាន៤នាក់ ត្រូវបានឃុំខ្លួន ។ លោក Vinci បានប្រកាសថា«ក្រុមអ្នកធ្វើដំណើរតាមរថយន្ត ត្រូវមានការប្រុងប្រយ័ត្ន បញ្ចៀសធ្វើដំណើរតាមផ្លូវ ដែលមានក្រុមបាតុករបិទផ្លូវ កុំឲ្យមានការកកស្ទះ»៕
