សារព័ត៌មាន នគរវត្ត តែងតែនាំមុខគេជានិច្ច
ទំនាក់រវាងរុស្ស៊ី នឹងអាមេរិក កាន់តែតានតឹងខ្លាំងឡើងនៅក្នុងឆ្នាំ២០១៩នេះ ដោយប្រទេសទាំងពីរ បានចាប់ពលរដ្ឋ គ្នាទៅវិញទៅមក ដោយចោទប្រកាន់ពីបទចារកិច្ច ។ សកម្មភាព ទាំងនោះធ្វើឲ្យគេនឹកឃើញដល់ កាណាដានឹង ចិន ដោយកាណាដាចាប់ពលរដ្ឋចិន មួយរូប ចិនក៏ចាប់វិញ ១៣រូប ។
ពេលគន្លងមក កាណាដា និងចិន បានប្រឈមមុខតានតឹងដាក់គ្នាដោយសារតែ ការចាប់ពលរដ្ឋចិនមួយរូប គឺអគ្គនាយកហិរញ្ញវត្ថុ របស់ក្រុមហ៊ុន Huawei តាមសំណើរបស់អាមេរិក ។ ភ្លាមៗនោះរដ្ឋាភិបាលចិន ក៏បានចាប់ពលរដ្ឋកាណាដា ដោយចោទប្រកាន់ពីបទចារកម្ម ។ ចិនចាប់ពលរដ្ឋកាណាដា ដល់ទៅ ១៣នាក់។
នៅពេលនេះអាមេរិកនិងរុស្ស៊ី ក៏មានសកម្មភាពដូចគ្នានេះដែរ ក្រោយពេលរុស្ស៊ីបានចាប់ពលរដ្ឋអាមេរិក ហើយតុលាការបានចោទប្រកាន់ជាផ្លូវការ ពីបទចារកម្មទៅលើពលរដ្ឋអាមេរិកផងដែរ ។ នៅពេលនេះអាមេរិកបានចាប់ជនជាតិ រុស្ស៊ី វិញម្តង ដោយចោទប្រកាន់ពីបទ លក់សម្ភារៈយោធាខុសច្បាប់។
សារព័ត៌មាន Sputnik នៅថ្ងៃទី៥ ខែមករា បានផ្សាយថា ក្រុម FBI អាមេរិក បានចាប់ខ្លួនជនជាតិរុស្ស៊ីមា្នក់នៅលើទឹកដីកោះ Guam ដោយចោទថាបាននាំចេញបរិក្ខាយោធា ដោយខុសច្បាប់។
តុលាការអាមេរិកនៃដែនកោះ Northern Mariana បានឱ្យដឹងថា ជនជាប់ចោទឈ្មោះ Dimitrii Makarenko ត្រូវបានចាប់ខ្លួនកាលពី ថ្ងៃទី២៩ ខែធ្នូ ឆ្នាំ២០១៨ ប៉ុន្តែព័ត៌មានពីការចាប់ខ្លួនត្រូវបានប្រកាសកាលពីថ្ងៃសុក្រម្សិលមិញ បន្ទាប់ពីសវនាការស៊ើបសួរមួយពីគ្រប់ ភាគីពាក់ព័ន្ធ។ បន្ថែមពីលើនេះ តុលាការក៏បានបង្គាប់ផងដែរឱ្យជនជាប់រូបនេះបង្ហាញខ្លួនជាថ្មីនៅចំពោះមុខតុលាការថ្នាក់ស្រុកនៅឯ រដ្ឋផ្ល័រីដា។
គួរបញ្ជាក់ថា បើតាមដីកាឃាត់ខ្លួន ជនជាតិរុស្ស៊ីលោក Makarenko ត្រូវបានតុលាការអាមេរិកចោទប្រកាន់ជាផ្លូវការកាលពីខែមិថុនា ឆ្នាំ២០១៧ ពីបទសមគំនិតក្នុងការនាំចេញបរិក្ខាយោធាដោយគ្មានអាជ្ញាប័ណ្ណស្របច្បាប់។ ប៉ុន្តែ គួរឱ្យកត់សម្គាល់ នោះគឺថាការចាប់ខ្លួន ជនជាតិរុស្ស៊ីរូបនេះកើតមានឡើងតែមួយថ្ងៃប៉ុណ្ណោះ បន្ទាប់ពីអាជ្ញាធររុស្ស៊ីបានចាប់ខ្លួនជនជាតិអាមេរិកម្នាក់ឈ្មោះ ផល វេលែន (Paul Whelan) នៅក្នុងទីក្រុងម៉ូស្គូកាលពីថ្ងៃទី២៨ ខែធ្នូគន្លងទៅពីបទចារកម្ម៕ ម៉ែវ សាធី
