សារព័ត៌មាន នគរវត្ត តែងតែនាំមុខគេជានិច្ច
កាលពីយប់ថ្ងៃទី១៨ ខែមករា មានហេតុការណ៍ផ្ទុះបំពង់ហ្គាស បណ្តាលឲ្យមនុស្សស្លាប់២១នាក់ និង៧១នាក់រងរបួស ដោយសារតែពលរដ្ឋទាំងនោះព្យាយាមទៅបូមយកហ្គាស ប្រេងសាំងទៅលក់ ។
បណ្តាញទូរទស្សន៍មិចស៊ីកូ បានផ្សព្វផ្សាយនៅរូបភាពស្តីពីភ្លើងឆេះយ៉ាងខ្លាំង ក្រោយការផ្ទុះ និងសម្លេងស្រែកទ្រហ៊ោយំ អំពាវនាវឲ្យជួយ ពេលសាច់ញាតិរបស់ខ្លួនត្រូវភ្លើងឆាប់ឆេះ ។ ហេតុការណ៍គ្រោះថ្នាក់ខាងលើកើតឡើងនៅក្នុងស្រុក Tlahuelilpan ជិតរោងចក្រចម្រាញ់ប្រេងនៅភាគខាងជើង រដ្ឋធានីមិចស៊ីកូ ។
ប្រព័ន្ធផ្សព្វផ្សាយក្នុងតំបន់បានផ្សាយថា បំពង់បង្ហូរហ្គាសបានបែកធ្លាយហើយផ្ទុះឆេះតែម្តង កាលពីយប់ថ្ងៃទី១៨ខែមករា សម្លាប់មនុស្សយ៉ាងតិច២០នាក់និងរបួស ជាង៦០នាក់ ។ មូលហេតុបណ្តាលឲ្យស្លាប់ និងរបួសច្រើនបែបនេះដោយសារតែ ក្រុមពលរដ្ឋ បានខិតខំបូមហ្គាសចេញពីបំពង់ដែលបែកនោះចូលទៅកុងទឺន័រ របស់ខ្លួន។ បំពង់ហ្គាសនោះបានផ្ទុះក្រោយពេលក្រុមលួចហ្គាសបានខួងចូលក្នុងបំពង់បូមហ្គាសឡើងរថយន្តស៊ីទែនរបស់ខ្លួន។
តាមរបាយការណ៍ជាបឋម បានប្រកាសឲ្យដឹងថា មានមនុស្ស ២១នាក់ស្លាប់ របួស៧១នាក់ ហើយអាចនិងមានអ្នកស្លាប់កើនឡើងដោយសារ អ្នករងរបួសធ្ងន់ជាច្រើន ។
រដ្ឋមន្ត្រីក្រសួងសុវត្ថិភាពសាធារណៈ ក៏បានបញ្ជូនក្រុមជំនួយទៅជួយដល់ពលរដ្ឋរងគ្រោះផងដែរ ។
កន្លងមក ប្រធានាធិបតី មិចស៊ីកូ លោក Lopez Obrador បានអនុវត្តន៍យុទ្ធសាស្ត្របោសសម្អាតក្រុមលួចថាមពល ប្រេង ហ្គាសនៅក្នុងប្រទេសនេះ ។ រដ្ឋាភិបាលប្រទេសនេះ បានវាយតម្លៃថា កាលពីឆ្នាំ២០១៨ រដ្ឋខាតបង់ដល់ទៅ៣ពាន់លានដុល្លារដោយការលួចប្រេង រាលដាលគ្រប់ទិសទីនៅក្នុងប្រទេស ៕
