សារព័ត៌មាន នគរវត្ត តែងតែនាំមុខគេជានិច្ច
ការបង្កើនប្រាក់ចំណាយសម្រាប់ការពារជាតិ របស់កូរ៉េខាងត្បូង ក៏ដូចជាគម្រោងធ្វើសមយុទ្ធ ដែលកូរ៉េខាងជើង បញ្ជាក់ថា ដើម្បីទប់ស្កាត់ក្រុមភេរវកម្ម ប៉ុន្តែបានធ្វើឲ្យកូរ៉េខាងជើង មានក្តីបារម្ភយ៉ាងខ្លាំង ក្នុងពេលដែលទីក្រុង ព្យុងយ៉ាង បានត្រៀមលក្ខណៈបោះបង់អាវុធដើម្បីដោះដូរសន្តិភាព និងការលុបទណ្ឌកម្មសេដ្ឋកិច្ច ។
នៅពេលនេះ ទីក្រុងព្យុងយ៉ាងបានរិះគន់យ៉ាងខ្លាំងដល់ ទីក្រុងសេអ៊ូល ដែលបានបង្កើនប្រាក់ចំណាយសម្រាប់ការពារជាតិ ទិញយន្តហោះចម្បាំងថ្មីនិងឡើងគម្រោងធ្វើសមយុទ្ធ ជាច្រើនផ្សេងទៀត។
សារព័ត៌មាន Rodong Sinmun របស់កូរ៉េខាងជើង បានផ្សាយអត្ថបទវិភាគនាថ្ងៃទី២៨ ខែមករា ដោយអំពាវនាវដល់កូរ៉េខាងត្បូង ផ្អាករាល់សកម្មភាពធ្វើសមយុទ្ធ ដើម្បីបញ្ចៀសផលប៉ះពាល់ និងបង្កើនបរិយាកាសសន្តិភាព នៅក្នុងតំបន់។
នៅក្នុងអត្ថបទវិភាគបានលើកឡើងថា« ពិបាកនៅក្នុងការមើលរំលង ពេលដែលកម្លាំងទាហានកូរ៉េខាងត្បូង ធ្វើសមយុទ្ធនៅដើមឆ្នាំ២០១៩ ដោយមានការចូលរួមពីកម្លាំងទាហាន និងអាវុធជាច្រើន ។ ទាំងនោះជាសកម្មភាពយោធា ដ៏គ្រោះថ្នាក់ ផ្ទុយទៅនឹងឆន្ទៈផ្សះផ្សានាំមកនូវសន្តិភាព ស្ថេរភាព ដល់ពលរដ្ឋប្រទេសទាំងពីរ»។
ចំណែកសារព័ត៌មាន Yonhap របស់កូរ៉េខាងត្បូងវិញ បានផ្សាយថា សកម្មភាពធ្វើសមយុទ្ធ គឺដើម្បីប្រឆាំងភេរវកម្ម ហើយសមយុទ្ធធ្វើនៅរដូវរងា នៅទូទាំងប្រទេស ។ ទន្ទឹមនឹងនោះ សារព័ត៌មានកូរ៉េខាងត្បូង ក៏បានប្រឆាំងទៅនឹងការបង្កើនប្រាក់ចំណាយសម្រាប់ការពារជាតិ ក៏ដូចជាទិញយន្តហោះចម្បាំងបន្ថែម ផងដែរ។
នៅថ្ងៃទី២៨ ខែមករានេះដែរ សារព័ត៌មាន The Korea Times បានដកស្រង់សម្តី មន្ត្រីជាន់ខ្ពស់កូរ៉េខាងត្បូង បានលើកឡើងថា អាមេរិក ចង់ឲ្យកូរ៉េខាងជើង ផ្តល់បញ្ជីឈ្មោះ ទីតាំងចម្រាញ់សារធាតុអ៊ុយរ៉ានីញ៉ូម ដើម្បីដោះដូរ ការលុបទណ្ឌកម្ម ។ អាមេរិកចង់បានទីតាំង ខាងលើ ក៏ដូចជា ទីតាំង រក្សាអាវុធបរមាណូ នៅក្នុងជំនួបលើកទីពីរ ដែលត្រូវធ្វើឡើងនៅចុងខែកុម្ភៈខាងមុខ ៕
