សារព័ត៌មាន នគរវត្ត តែងតែនាំមុខគេជានិច្ច
អង់គ្លេសជាសម្ពន្ធមិត្តដ៏សំខាន់បំផុតរបស់អាមេរិក ហើយប្រទេសទាំងពីរ តែងតែសហការគ្នា ដើម្បី ពង្រឹង និងពង្រីកឥទ្ធិពលនៅលើពិភពលោក ។ បច្ចុប្បន្ន រុស្ស៊ី និងចិន មានសម្ថភាពខ្ពស់ ដោយអាមេរិកម្នាក់ឯងមិនអាច យកឈ្នះទៅលើ ប្រទេសទាំងពីរនោះបានឡើយ ។ ដូច្នេះហើយ បានជាអង់គ្លេស ចេញមុខ ព្រមានថា ទីក្រុងឡុងដុង នឹងប្រើប្រាស់ កម្លាំង ប្រឆាំងរុស្ស៊ី និងចិន ។
កាលពីថ្ងៃទី១១ ខែកុម្ភៈ រដ្ឋមន្ត្រីការពារជាតិអង់គ្លេស លោក Gavin Williamson បានប្រកាសថា អង់គ្លេសបានត្រៀមលក្ខណៈប្រើប្រាស់កម្លាំងប្រឆាំងរុស្ស៊ីនិងចិន។ ការប្រកាសខាងលើកើតឡើងក្រោយពេលទីក្រុងឡុងដុង បានត្រៀមលក្ខណៈ ដាក់ពង្រាយ នាវាចម្បាំងធំបំផុតរបស់ខ្លួននៅតំបន់សមុទ្រជិតព្រំដែនប្រទេសចិន។
រដ្ឋមន្ត្រី Gavin Williamson កាលពីថ្ងៃទី១១ ខែកុម្ភៈ បានប្រកាសថា «អង់គ្លេស ចាំបាច់ត្រូវតែពង្រឹងសមត្ថភាព កងកម្លាំងដើម្បីការពារផលប្រយោជន៍របស់ខ្លួនចំពោះការគំរាមកំហែង ពីរុស្ស៊ីនិងចិន»។
មានប្រសាសន៍នៅទីក្រុងឡុងដុង ប្រទេសអង់គ្លេស លោក Williamson បានចោទប្រកាន់រុសស្ស៊ី បង្កើនឃ្លាំងអាវុធ ដើម្បី គ្រប់គ្រងទៅលើប្រទេស អតីតសហភាពស៊ូវៀត ។ចំណែកចិនវិញ ក៏ដូចគ្នានោះដែរ បានខិតខំពង្រីកឥទ្ធិពលរបស់ខ្លួន នៅតំបន់អាស៊ីប៉ាស៊ីហ្វិក ។
លោក Williamson អាយុ៤២ឆ្នាំ បានខិតខំជំរុញអង់គ្លេស ឲ្យក្លាយទៅជាមហាអំណាច មានឥទ្ថិពលយោធានៅលើពិភពលោក។ លោកធ្លាប់បានប្រកាសថានឹងបញ្ជូនកម្លាំងទាហានទៅកាន់ប៉ូលខាងជើងផែនដីផងដែរ ដើម្បីគ្រប់គ្រង ទីតាំងដ៏ធំ និងសម្បូរទៅដោយធនធានធម្មជាតិ ។
សកម្មភាពរបស់អង់គ្លេស កើតឡើងក្នុងពេលដែលអាមេរិក បានសម្រេចដកខ្លួនចេញពីសន្ធិសញ្ញាអាវុធបរមាណូ INF ដែលបានចុះហត្ថលេខាជាមួយអតីតសហភាពសូវៀត កាលពីសម័យសង្គ្រាមត្រជាក់ ។ ការដកខ្លួននោះជាការចាប់ផ្តើមប្រកួតប្រជែងអាវុធសាជាថ្មីនៅលើពិភពលោក៕
