ប្រធានាធិបតីចិន ស៊ី ជីនពីង បានទៅដល់កូរ៉េខាងជើងហើយ

នៅព្រឹកថ្ងៃទី​២០ ខែមិថុនា ឆ្នាំ​២០១៩ ប្រធានាធិបតីចិន ស៊ី ជីនពីង បានទៅដល់ទីក្រុងព្យុងយ៉ាង កូរ៉េខាងជើង ហើយ ។ លោកស៊ី ជីនពីង បានទៅដល់ នៅវេលាម៉ោង​១១និង​៤០នាទី​ (ម៉ោងទីក្រុងព្យុងយ៉ាង) ក្នុងដំណើទស្សនកិច្ចជាផ្លូវការ លើកដំបូង រយៈពេល​១៤ឆ្នាំកន្លងមក​។

លោក ស៊ី ជីនពីង ប្រធានាធិបតីចិនដំបូងគេ ដែលទៅបំពេញទស្សនកិច្ច នៅក្នុងប្រទេសកូរ៉េខាងជើង។ ក្នុងរយៈពេល១៤ឆ្នាំកន្លងមក ក្រោយពេលសម័យសង្គ្រាមត្រជាក់ ដែលកូរ៉េខាងជើងបានធ្វើឲ្យកាន់តែវឹកវរ ពីបញ្ហាអាវុធនុយក្លេអ៊ែររបស់ទីក្រុងព្យុងយ៉ាង ហើយរដ្ឋាភិបាលទីក្រុងប៉េកាំង បានគាំទ្រជាបន្តបន្ទាប់ នាំឲ្យមានការដាក់ទណ្ឌកម្មរពីអង្គការសហប្រជាជាតិ។

ប្រធានាធិបតីចិន លោក ស៊ី ជីនពីង និងលោក គីម ជុងអ៊ុន បានខិតខំស្តារទំនាក់ទំនងល្អឡើងវិញ ខណៈមេដឹកនាំវ័យក្មេងកូរ៉េខាងជើង ធ្លាប់ទៅបំពេញទស្សនកិច្ច នៅក្នុងប្រទេសចិន ដើម្បីជួបជាមួយលោក ស៊ី ជីនពីង នៅទីក្រុងប៉េកាំង៤ដងរួចមកហើយ កាលពីឆ្នាំកន្លងទៅ។ រីឯអាជ្ញាធរចិនបានអំពាវនាវឲ្យមានការបន្ធូរបន្ថយនូវទណ្ឌកម្មដល់កូរ៉េខាងជើង។

ក្រុមអ្នកវិភាគ បានលើកឡើងថា តែមេដឹកនាំចិនបានទន្ទឹងរង់ចាំដំណើរទស្សនកិច្ចនេះយ៉ាងខ្លាំង ដើម្បីបានដឹងអំពីរបៀបចរចា អំពីកម្មវិធីនុយក្លេអ៊ែររបស់កូរ៉េខាងជើង រវាងលោក គីម និងលោក ត្រាំ ថាតើវាបានប្រព្រឹត្តទៅដោយរបៀបណា នៅមុនពេលសម្រេចចិត្តបំពេញទស្សនកិច្ចទៅកាន់ទីក្រុងព្យុងយ៉ាងលើកនេះ។

នៅក្នុងដំណើរបំពេញទស្សនកិច្ច រយៈពេល២ថ្ងៃរបស់លោក ស៊ី នៅក្នុងប្រទេសកូរ៉េខាងជើង នោះ គេសង្ឃឹមថា នេះជាឱកាសល្អមួយ បង្ហាញឲ្យឃើញថា ចិនជាប្រទេសដែលមានឥទ្ធិពលយ៉ាងខ្លាំង នៅក្នុងតំបន់។

លោក Lim Eul-chul សាស្ត្រាចារ្យសិក្សាស្រាវជ្រាវ អំពីកូរ៉េខាងជើង នៅឯសាកលវិទ្យាល័យ Kyungnam បានថ្លែងថា សម្រាប់កូរ៉េខាងជើង ដំណើរទស្សនកិច្ចនេះ នឹងបង្ហាញឲ្យអាមេរិក ឃើញថា ចិនជាអ្នកគាំទ្រខ្លួន ហើយក៏ជាការផ្ញើសារមួយផងដែរទៅកាន់ទីក្រុងវ៉ាស៊ីនតោនថា ឥរិយាបថអត់ធ្មត់ចំពោះការដាក់សម្ពាធ គឺមានកម្រិត ។ កូរ៉េខាងជើង អាចនឹងអស់ការអត់ធ្មត់ ។ជំនួបកំពូល រវាងលោក ដូណាល់ ត្រាំ និងលោក គីម ជុងអ៊ុន ទាំងពីរលើក គឺបរាជ័យ មិនបានព្រមព្រៀងណាមួយជាមួយគ្នាបានឡើយ ។

ទីក្រុងប៉េកាំងវិញ ក្រុមការងារចរចាស្តីអំពីជម្លោះពាណិជ្ជកម្មជាមួយទីក្រុងវ៉ាស៊ីនតោន ក៏មិនបានសម្រេចលទ្ធផល ផងដែរ កាលពីខែឧសភា ឆ្នាំ២០១៩កន្លងទៅនេះ ហើយភាគីអាមេរិកប្រកាសដំឡើងពន្ធទំនិញចិនចំនួន២៥ភាគរយ និងព្រមានដំឡើងពន្ធបន្ថែមទៀតរហូតដល់ទំហំទឹកប្រាក់៣០០ពាន់លានដុល្លារអាមេរិក ។

សូមបញ្ជាក់ថា បន្ទាប់ពីវិលត្រឡប់ពីទីក្រុងព្យុងយ៉ាង ប្រធានាធិបតីចិន លោក ស៊ី ជីនពីង នឹងបន្តដំណើរទៅកាន់ជប៉ុន ដើម្បីចូលរួមជំនួបកំពូលប្រទេស G-20 (ប្រទេសដែលមានសេដ្ឋកិច្ចជឿនលឿនទាំង២០របស់ពិភពលោក)។ នៅប្រទេសជប៉ុននោះ តាមគម្រោង លោកស៊ី ជីនពីង នឹងជួបជាមួយលោកដូណាល់ ត្រាំ ប្រធានាធិបតីអាមេរិក ដើម្បីពិភាក្សាគ្នាបន្ថែមទៀតរឿងសង្គ្រាមពាណិជ្ជកម្ម រវាងប្រទេសទាំងពីរ៕