សារព័ត៌មាន នគរវត្ត តែងតែនាំមុខគេជានិច្ច
នៅក្នុងការបោះឆ្នោតជាលើកទី២ នៅអ៊ីស្រាអែល ត្រូវធ្វើឡើង នៅថ្ងៃទី១៧ ខែកញ្ញា ឆ្នាំ២០១៩ ហើយពេលនេះ នាយករដ្ឋមន្ត្រីអ៊ីស្រាអែល លោក ណេតាន់យ៉ាហ៊ូ មានគូប្រជែង ដែលជាអតីតនាយករដ្ឋមន្ត្រី និងរដ្ឋមន្ត្រីការពារជាតិ ប្រទេសនេះ លោក Ehud Barak ។
បើទោះបីលោក Ehud Barak មានវ័យចំណាស់ហើយក្តី តែលោក គឺជាអ្នកនយោបាយដែលមានប្រជាប្រិយភាព ទទួលបានការគាំទ្រខ្ពស់ នាពេលកន្លងមក ។ លោកគឺជាគូប្រជែង ដែលមានប្រៀបលើនាយករដ្ឋមន្ត្រីនាពេលបច្ចុប្បន្ន ។
អតីតនាយករដ្ឋមន្ត្រី អ៊ីស្រាអ៊ែល លោក Ehud Barak បានសម្រេចវិលត្រឡប់ចូលប្រឡូកក្នុងឆាកនយោបាយជាថ្មី ដោយលោកប្រកាសថា ពេលវេលាសម្រាប់ នាយករដ្ឋមន្ត្រីណេតាន់យ៉ាហូ បានអស់ហើយ ។
ការប្រកាសរបស់លោក Ehud Barak ក្នុងពេលដែលអ៊ីស្រាអែល ត្រៀមបោះឆ្នោតសភា ជាលើកទីពីរ នៅថ្ងៃទី១៧ ខែកញ្ញា ខាងមុខ ក្រោយពេលនាយករដ្ឋមន្ត្រីណេតាន់យ៉ាហូ មិនអាចបង្កើតរដ្ឋាភិបាលចម្រុះបានបន្ទាប់ពីការបោះឆ្នោតកាលពីថ្ងៃទី៩ ខែមេសា ។ អតីតនាយករដ្ឋមន្ត្រី Ehud Barak ជាអ្នករិះគន់យ៉ាងខ្លាំង ដល់ការដឹកនាំរបស់នាយករដ្ឋមន្ត្រី ណេតាន់យ៉ាងហូ ។
អតីតនាយករដ្ឋមន្ត្រី Ehud Barak ឆ្នាំនេះ មានអាយុ៧៧ឆ្នាំហើយ លោកធ្លាប់កាន់តំណែងជារដ្ឋមន្ត្រីការពារជាតិ ។ ប៉ុន្មានឆ្នាំកន្លងមក លោកបានប្រើប្រាស់បណ្តាញសង្គម Twitter ផ្ទាល់ខ្លួនដើម្បីរិះគន់ការដឹកនាំរបស់នាយករដ្ឋមន្ត្រី ណេតាន់យ៉ាហូ ក៏ដូចជាអំពើពុករលួយរបស់លោក ។
នៅក្នុងសុន្ទរកថា ផ្សាយតាមទូរទស្សន៍ កាលពីថ្ងៃទី២៦ ខែមិថុនា លោក Ehud Barak បញ្ជាក់ថា លោក ណេតាន់យ៉ាងហូ មិនបានសម្រេចលុបលទ្ធផលបោះឆ្នោត កន្លងមក ដើម្បីរៀបចំការបោះឆ្នោតជាថ្មី ក្នុងគោលដៅរារាំង ដំណើរការស្រាវជ្រាវពីបទពុករលួយទៅលើរូបលោក ។ លោកបន្តទៀតថា ដល់ពេលដែល លោកណេតាន់យ៉ាហូ ត្រូវដកចេញពីតំណែងហើយ ។
លោក Ehud Barak ធ្លាប់យកឈ្នះ នាយករដ្ឋមន្ត្រីណេតាន់យ៉ាហូ នៅក្នុងការបោះឆ្នោតកាលពីឆ្នាំ២០០៩ ប៉ុន្តែលោកកាន់តំណែងនាយករដ្ឋមន្ត្រីបានរយៈខ្លី ។ ក្រោយមក លោកក៏បានកាន់តំណែងជារដ្ឋមន្ត្រីការពារជាតិ ក្នុងរដ្ឋាភិបាលរបស់លោកណេតាន់យ៉ាហូ ។ លោកបានផ្អាក់ សកម្មភាពនយោបាយនៅឆ្នាំ២០១២ ៕
