សារព័ត៌មាន នគរវត្ត តែងតែនាំមុខគេជានិច្ច
កាលពីថ្ងៃទី៧ ខែកក្កដា មានការរញ្ជួយដីកម្លាំងខ្លាំង ៦.៩រ៉ិចទ័រ នៅប្រទេសឥណ្ឌូនេស៊ី មានចេញព្រមានពីរលកយក្សស៊ូណាមិ ធ្វើឲ្យពលរដ្ឋបារម្ភយ៉ាងខ្លាំង ។
ហេតុការណ៍រញ្ជួយដីកើតឡើង កាលពីថ្ងៃអាទិត្យ ទី៧ ខែកក្កដា ឆ្នាំ២០១៩ ស្ថិតនៅដែនកោះ Maluku របស់ប្រទេសឥណ្ឌូនេស៊ី ការរញ្ជួយដីកម្លាំងខ្លាំង មានកម្រិត៦.៩រ៉ិចទ័រ ។ មន្ត្រីផ្នែកពាក់ព័ន្ធបានចេញព្រមានអំពីរលកយក្សស៊ូណាមិ ប៉ុន្តែក្រោយមក ក៏បានប្រកាសដកសេចក្តីព្រមាននោះវិញ ។
ភ្នាក់ងារវាស់ស្ទង់អំពីការរំញ័រ និងភូមិសាស្ត្រអាមេរិក USGS បានបញ្ជាក់ថា ការរញ្ជួយដីនេះ ស្ថិតនៅចំណុចកណ្តាល ភាគអាគ្នេយ៍ ទីក្រុង Manado ក្នុងជម្រៅប្រហែល២៤គីឡូម៉ែត្រ ។ ក្នុងសេចក្តីថ្លែងការណ៍របស់ BMKG (ភ្នាក់ងារឧតុនិយម ភូមិសាស្ត្រ និងអាកាសធាតុឥណ្ឌូនេស៊ី) បញ្ជាក់ថា «ការព្រមានអំពីរលកយក្សស៊ូណាមិថ្មីៗនេះ គឺត្រូវបានបញ្ចប់ហើយ» ។ ការរញ្ជួយដីនេះ បាននាំឲ្យភ័យស្លន់ស្លោរដល់ប្រជាជនរស់នៅទីក្រុង Ternate ដែនកោះ Maluku ផងដែរ ។ ពួកគេបានរត់ទៅកាន់ទីកន្លែងទួលខ្ពស់ៗ ។
របាយការណ៍អំពីគ្រោះថ្នាក់ ឬខូចខាតដោយសារតែការរញ្ជួយដីនៅគ្រានេះ មិនទាន់ត្រូវបានគេចេញផ្សាយនៅឡើយ ។
គួរបញ្ជាក់ថា ក្រុមជំនាញបានលើកឡើងថា គ្រោះធម្មជាតិតែងតែកើតឡើងនៅឥណ្ឌូនេស៊ីញឹកញាប់ បើមិនមានគ្រោះទឹកជំនន់ទេ ក៏គ្រោះរញ្ជួយដី, ផ្ទុះភ្នំភ្លើង ជាដើម ដោយសារតែប្រទេសនេះបានស្ថិតនៅចំណុចខ្សែក្រវាត់ភ្លើងផែនដី ។
គេនៅចាំបានថា កាលពីឆ្នាំ២០០៤ ការរញ្ជួយដីកម្រិត៩.១រ៉ិចទ័រវាយប្រហារនៅឈូងសមុទ្រ Sumatra បង្កជារលកយក្សស៊ូណាមិ សម្លាប់មនុស្ស ២២០.០០០នាក់ នៅទូទាំងតំបន់ ។ កាលពីឆ្នាំ២០១៨ ការរញ្ជួយដី៧.៥រីចទ័របានកើតឡើង និងបង្កឲ្យមានរលកយក្សស៊ូណាមិបន្តបន្តាប់នៅតំបន់ Palu ដែនកោះ Sulawesi សម្លាប់មនុស្សជាង២២០០នាក់ និងប្រហែល១០០០នាក់ផ្សេងទៀតនៅបាត់ខ្លួនរហូតដល់សព្វថ្ងៃ ៕
