សារព័ត៌មាន នគរវត្ត តែងតែនាំមុខគេជានិច្ច
ក្រោយពេលមេបក្សប្រឆាំងវេណេហ្ស៊ុយអេឡា យល់ព្រមបន្តពិភាក្សាជាមួយរដ្ឋាភិបាល ពលរដ្ឋវេណេហ្ស៊ុយអេឡា ក៏ដូចជាសហគមន៍អន្តរជាតិអបអរសាទរ ដោយសង្ឃឹមថា នឹងទទួលបានសន្តិភាព បញ្ចប់វិបត្តិនយោបាយ ។
នេះជាកិច្ចចរចាលើកទី៣ រវាងគណបក្សប្រឆាំង នឹងរដ្ឋាភិបាលអាចនឹងកើតឡើង នៅដើមខែកក្កដា ឆ្នាំ២០១៩នេះ បើមិនធ្វើឡើងនៅទីក្រុង Barbdos ប្រទេសការ៉ាបៀនទេ ក៏នៅទីក្រុង Oslo ប្រទេសន័រវែសដែរ ។
លោកជួន កាយដូ (Juan Guaido) ដែលតាំងខ្លួនឯងជាប្រធានាធិបតី និងជាប្រធានគណបក្សប្រឆាំងដឹកនាំរដ្ឋសភា បានថ្លែងថា អំណាងរាស្ត្រទាំងគណបក្សប្រឆាំង និងរដ្ឋាភិបាលវេណេហ្ស៊ុយអេឡា អាចបន្តពិភាក្សាគ្នានៅទីក្រុង Barbados ។
នៅក្នុងសេចក្តីថ្លែងការណ៍មួយរបស់លោក កាយដូ បានបញ្ជាក់ថា «នៅក្នុងការឆ្លើយតប ការសម្រុះសម្រួលដោយរាជាណាចក្រន័រវែស (គណបក្សប្រឆាំង) នឹងចូលរួមកិច្ចប្រជុំមួយជាមួយតំណាងរបបខុសច្បាប់(វេណេហ្ស៊ុយអេឡា) នៅទីក្រុង Barbados ដើម្បីបង្កើតកិច្ចពិភាក្សាមួយឈានដល់បញ្ចប់របបផ្តាច់ការនៅវេណេហ្ស៊ុយអេឡា» ។
អំឡុងពេលជាមួយគ្នានេះដែរ រដ្ឋមន្ត្រីក្រសួងការបរទេសន័រវែស បានប្រកាសថា គណបក្សប្រឆាំងវេណេហ្ស៊ុយអេឡា និងតំណាងប្រធានាធិបតីវេណេហ្ស៊ុយអេឡា នីកូឡាស ម៉ាឌូរ៉ូ អាចនឹងជួបពិភាក្សាគ្នាមួយដងទៀត នៅក្នុងសប្តាហ៍នេះ ដោយមានការសម្រុះសម្រួលពីរដ្ឋាភិបាលន័រវែស នៅទីក្រុង Barbados ដើម្បីបន្តស្វែងរកគន្លឹះដោះស្រាយវិបត្តិនយោបាយក្នុងប្រទេសវេណេហ្ស៊ុយអេឡា ។
សេចក្តីថ្លែងការណ៍ផ្សាយនៅលើគេហទំព័រផ្លូវការកាលពីរសៀលថ្ងៃទី៧ ខែកក្កដា ឆ្នាំ២០១៩ រដ្ឋមន្ត្រីក្រសួងការបរទេសន័រវែស បញ្ជាក់ថា យើងសូមប្រកាសថា តំណាងតួអង្គនយោបាយដ៏សំខាន់នៅវេណេហ្ស៊ុយអេឡាបានសម្រេចព្រមព្រៀងបន្តពិភាក្សា ដោយមានការសម្រុះសម្រួលពីន័រវែស ។ ភាគីទាំងឡាយនឹងជួបគ្នានៅសប្តាហ៍នេះ នៅទីក្រុង Barbados ក្នុងគោលបំណងស្វែងរកការព្រមព្រៀងមួយដោះស្រាយតាមរដ្ឋធម្មនុញ្ញរបស់ប្រទេសនេះ ។
ក្រសួងការបរទេសន័រវែសក៏បានបញ្ជាក់ទៀតថា កិច្ចចរចារវាងតំណាងនយោបាយនៅវេណេហ្ស៊ុយអេឡា នឹងបន្តកើតឡើង ហើយមានប្រសិទ្ធភាព ។ ប្រភពបានបន្ថែមថា រដ្ឋាភិបាលន័រវែសសូមបញ្ជាក់ជាថ្មី អំពីការទទួលស្គាល់កិច្ចខិតខំប្រឹងប្រែងរបស់ភាគីទាំងសងខាង និងស្មារតីកិច្ចសហប្រតិបត្តិការរបស់ពួកគេផងដែរ ។
រដ្ឋាភិបាល និងក្រុមប្រឆាំងវេណេហ្ស៊ុយអេឡា បានចរចាគ្នាជាច្រើនលើករួចមកហើយ ក្រោមការសម្របសម្រួលពីរដ្ឋាភិបាលប្រទេសន័រវែស ប៉ុន្តែមិនមានកិច្ចព្រមព្រៀងណាមួយត្រូវសម្រេចបាននោះទេ ។ កាលពីខែមិថុនា ឆ្នាំ២០១៩ លោក ជួន កាយដូ បានថ្លែងថា ក្រុមប្រឆាំងមិនចាប់អារម្មណ៍ក្នុងការចរចាទេ ពីព្រោះ “គ្រប់យ៉ាងនឹងគ្មានប្រយោជន៍នោះឡើយ បើគ្មានការលាលែងរបស់លោកម៉ាឌូរ៉ូ ទេនោះ” ។
ជាការឆ្លើយតប ប្រធានាធិបតីវេណេហ្ស៊ុយអេឡា លោក នីកូឡាស ម៉ាឌូរ៉ូ បានថ្លែងថា រដ្ឋបាលរបស់លោក នឹងពិភាក្សាជាមួយភាគីប្រឆាំងទាំងអស់ និងដោយក្តីសង្ឃឹមថា កិច្ចព្រមព្រៀងនយោបាយដែលសម្រេចបានរវាងរដ្ឋាភិបាល និងគណបក្សប្រឆាំង ទំនងជាឈានដល់នៅចុងឆ្នាំនេះ ៕
