សារព័ត៌មាន នគរវត្ត តែងតែនាំមុខគេជានិច្ច
កន្លងមករដ្ឋាភិបាលទីក្រុងវ៉ាស៊ីនតោន បានអនុញ្ញាត ឲ្យបណ្តាក្រុមហ៊ុនអាមេរិក បន្តសហការជាមួយក្រុមហ៊ុន Huawei ដោយអនុញ្ញាតឲ្យលក់ផលិតផលមួយចំនួន ទៅដល់ក្រុមហ៊ុន ។ ប៉ុន្តែផលិតផល មុខទំនិញទាំងនោះ គឺចាំបាច់ត្រូវតែទទួលបានការឯកភាពពីក្រសួងពាណិជ្ជកម្ម អាមេរិក ។
ទាំងនោះជាសញ្ញាវិជ្ជមានមួយ របស់អាមេរិក ទៅលើក្រុមហ៊ុនចិន ដើម្បីបង្កើនបរិយាកាសពិភាក្សាលើវិស័យពាណិជ្ជកម្ម រវាងចិន នឹងអាមេរិក ។នៅពេលនេះដែរ ផលិតផលកសិកម្មរបស់អាមេរិក នាំទៅកាន់ប្រទេសចិនធ្លាក់ចុះយ៉ាង ខ្លាំង ដែលជាក្តីបារម្ភដល់កសិករអាមេរិក ។
ក្នុងពេលដែលក្រុមហ៊ុនហួវាយ ល្អប្រសើរជាមួយអាមេរិក ចិនស្នើឲ្យកាណាដាដោះលែងអគ្គនាយកហិរញ្ញវត្ថុ Huawei។ កាលពីថ្ងៃ ទី១២ ខែកក្កដា ចិនបានអំពាវនាវដល់ប្រទេសកាណដា ដោះលែងលោកស្រី Meng Wanzhou អគ្គនាយកហិរញ្ញវត្ថុ របស់ក្រុមហ៊ុន Huawei ឲ្យមានសេរីភាពឡើងវិញ ។
កន្លងមក រដ្ឋមន្ត្រីការបរទេសកាណាដា លោក Chrystia Freeland បានប្រកាសថា កាណដា ចាប់ខ្លួនលោកស្រី Meng Wanzhou ទៅតាមកិច្ចព្រមព្រៀង បត្យាប័នទ្វេភាគី រវាងអាមេរិកនិងកាណាដា ដោយមិនមានជាប់ពាក់ព័ន្ធនយោបាយនោះឡើយ។
នៅក្នុងសន្និសីទកាសែត អ្នកនាំពាក្យក្រសួងការបរទេសចិនបានបញ្ជាក់ថា ចិនព្រួយបារម្ភយ៉ាងខ្លាំង ពីការលើកឡើងប្រាសចាកការពិត របស់មន្ត្រីរដ្ឋាភីបាលទីក្រុង អូតាវ៉ា ស្តីពីការចាប់ខ្លួនលោកស្រី Meng Wanzhou ក៏ដូចជាទំនាក់ទំនងទ្វេភាគីជាមួយចិន។ សកម្មភាពចាប់ខ្លួនខាងលើ ជាប់ពាក់ព័ន្ធនិងនយយោបាយយ៉ាងពិតប្រាកដ ហើយកាណាដា ត្រូវតែកែនៅកំហុសរបស់ខ្លួនដោយដោះលែងលោកស្រី Meng Wanzhou ជាបន្ទាន់។
លោកស្រី Meng Wanzhou ត្រូវកាណាដាចាប់ខ្លួននៅអាកាសយានដ្ឋានអន្តរជាតិ Vancouver នាង ខែធ្នូ ឆ្នាំ២០១៨ តាមសំណើរបស់អាមេរិក ដែលចោទប្រកាន់ លោកស្រីបំពានច្បាប់ទីក្រុងវ៉ាស៊ីនតោន ដោយមានទំនាក់ទំនងរកស៊ីជាមួយអ៊ីរ៉ង់ ៕
