សារព័ត៌មាន នគរវត្ត តែងតែនាំមុខគេជានិច្ច
នេះជាករណីដ៏កម្រមួយ «យន្តហោះរបូតកង់» គឺមិនដែលកើតមានឡើយនាពេលកន្លងមក នៅលើពិភពលោក មានតែបែកកង់ ជាដើម ។ តែពេលនេះ មានហើយ យន្តហោះ ដឹកអ្នកដំណើរដល់ទៅ១៣៩នាក់ បានរបូតកង់ពេលចុះចត ប៉ុន្តែមិនបណ្តាលឲ្យមានអ្នកស្លាប់ឬរងរបួសនោះឡើយ ។
ហេតុការណ៍ដ៏កម្រខាងលើបានកើតឡើងនៅលើយន្តហោះរបស់ក្រុមហ៊ុនអាកាសចរណ៍ Air Peace នៃប្រទេសនីហ្សេរីយ៉ា ហោះហើរពីទីក្រុង Port Harcourt ទៅកាន់ទីក្រុង Lagos បានជួបឧបទ្ទវហេតុរបូតកង់មុខ ពេលចុះចត ។ ប៉ុន្ដែនៅក្នុងហេតុការណ៍នោះ ពិតជាសំណាងខ្លាំងណាស់ មិនមានអ្នកស្លាប់ ឬរងរបួសនោះឡើយ ។
ហេតុការណ៍ខាងលើ បានកើតឡើង នៅថ្ងៃទី២៣ ខែកក្កដា ឆ្នាំ២០១៩ ហើយយន្តហោះដែលជួបហេតុការណ៍អាក្រក់នោះជាប្រភេទ Boeing 737 ដឹកអ្នកដំណើរ១៣៩នាក់ ។ ពេលចុះចត នៅអាកាសយានដ្ឋាន Burtala Muhammed ក្នុងទីក្រុង Lagos ប្រទេសនីហ្សេរីយ៉ា ស្រាប់តែយន្តហោះរបូតកង់មុខតែម្តង ។ ក្រុមអ្នកជំនាញបានលើកឡើងថា បើរបូតពេលយន្តហោះចុះចតភ្លាម នៅល្បឿនលឿននោះ អាចនឹងមានគ្រោះថ្នាក់កើតឡើងជាក់ជាមិនខាន ។
នៅពេលជួបឧបទ្ទវហេតុ យន្តហោះដឹកអ្នកដំណើរ១៣៣នាក់ និង ក្រុមពហុនិកា ៦នាក់ ត្រូវបានក្រុមជួយសង្គ្រោះជម្លៀសចេញពីយន្តហោះទាន់ពេលវេលា ដោយសុវត្ថិភាព ។ លោក Oluwatoyin Olajide អគ្គនាយកគ្រប់គ្រងក្រុមហ៊ុនអាកាសចរណ៍ Air Peace បានបញ្ជាក់ថា នៅពេលចាប់ផ្តើមហោះហើរ អាកាសយានិកឃើញមានការប្រែប្រួលខុសប្រក្រតី ពេលហោះហើរចូលដល់ដែនអាកាស Lagos ហើយក៏បានស្នើចុះចតជាបន្ទាន់ នៅអាកាសយានដ្ឋានអន្តរជាតិជាជាង អាកាសយានដ្ឋានក្នុងស្រុក ។
ក្រោយពេលយន្តហោះចុះចតដោយសុវត្ថិភាព ហើយត្រៀមចាកចេញពីផ្លូវ ក៏របូតកង់មុខតែម្តង ។ ភា្លមៗនោះក្រុមជួយសង្គ្រោះ បានជម្លៀសអ្នកដំណើរចេញពីយន្តហោះដោយសុវត្ថិភាព ។ ហេតុការណ៍ខាងលើបានកើតឡើង នៅលើយន្តហោះរបស់ក្រុមហ៊ុន Boeing ដែលកំពុងប្រឈមនឹងបញ្ហាជាច្រើន ពាក់ព័ន្ធនឹងសុវត្ថិភាពហោះហើរ ក្រោយយន្តហោះរបស់ក្រុមហ៊ុនពីរគ្រឿងជួបគ្រោះថ្នាក់ដូចគ្នា ៕
