សារព័ត៌មាន នគរវត្ត តែងតែនាំមុខគេជានិច្ច
រយៈពេលចុងក្រោយនេះ នៅក្នុងវិស័យអវកាស របស់ចិនមានការរីកចំរើនយ៉ាងខ្លាំង ដោយបានបង្កើតប្រវត្តិសាស្ត្របញ្ជូនយានទៅស្រាវជ្រាវផ្នែកងងឹតនៃព្រះច័ន្ទទៀតផង ។ ក្រៅពីនេះចិន បានបញ្ជូនផ្កាយរណបជាច្រើនទៅកាន់តារាវិថីផែនដី ជារៀងរាល់ឆ្នាំ ។
សម្រាប់ប្រព័ន្ធកំណត់គោលដៅ ចិនឈានមុខលើពិភពលោក ពីចំនួនផ្កាយរណប កំណត់គោលដៅ GPS ។ កន្លងមក ផ្កាយរណបកំណត់គោលដៅ GPS របស់អាមេរិក បានឈរលំដាប់លេខមួយ នៅលើពិភពលោក ប៉ុន្តែនៅពេលនេះ ចិនបានជំរុញការអភិវឌ្ឍន៍ផ្កាយរណប GPS ក្លាយទៅជាប្រទេសដែលមានផ្កាយរណបប្រភេទនេះ ច្រើនជាងគេបំផុត នៅលើពិភពលោក ។
សារព័ត៌មាន Sputnik បានផ្សាយថា បើតាមការត្រួតពិនិត្យពីចំនួនប្រព័ន្ធផ្កាយរណប កំណត់គោលដៅពិភពលោក GPS របស់អាមេរិក និងចិន នៅតែបន្តអភិវឌ្ឍ កាន់តែទំនើបឡើង ។ ការប្រកួតប្រជែងគ្នា នៅក្នុងវិស័យខាងលើនេះ នឹងធ្វើឲ្យផ្លាស់ប្តូរទីផ្សាបច្ចេកវិទ្យា ។ តាមអ្នកឯកទេសអាមេរិក បានឲ្យដឹងថា ការប្រកួតប្រជែងគ្នា នៅក្នុងវិស័យ GPS គឺជាការគំរាមកំហែងដល់សន្តិសុខជាតិ ប្រទេសដែលបានប្រើប្រាស់ GPS នោះ ។
ប្រព័ន្ធ GPS អាមេរិក ឈរលំដាប់លេខមួយ នៅក្នុងប្រព័ន្ធផ្កាយរណបកំណត់គោលដៅ ។ ប៉ុន្តែកាលពីប៉ុន្មានឆ្នាំចុងក្រោយនេះ ចិនបានបង្កើនការអភិវឌ្ឍប្រព័ន្ធផ្កាយរណបនេះ ចាប់ពីឆ្នាំ២០០០ រហូតមកទល់ពេលនេះ ទើបធ្វើឲ្យចិនក្លាយទៅជាប្រទេសលេខ១ នៅក្នុងវិស័យផ្កាយរណប GPS ។
នៅក្នុងឆ្នាំ២០១៨ ទីក្រុងប៉េកាំង បានបាញ់ផ្កាយរណប រហូតដល់ទៅ១៨គ្រឿងបន្ថែមទៀត ទើបជួយឲ្យចិន មានផ្កាយរណបកំណត់គោលដៅ ឈរលំដាប់លេខ១ នៅក្នុងវិស័យនេះ ។ នៅក្នុងការប្រកួតប្រជែងលើវិស័យនេះដែរ អឺរ៉ុបមានប្រព័ន្ទផ្កាយរណប ត្រឹមតែ២២គ្រឿង ហើយរុស្ស៊ីមាន២៤គ្រឿងតែប៉ុណ្ណោះ ។ ដោយឡែកចិនវិញ មានផ្កាយរណប រហូតដល់ទៅចំនួន៣៥គ្រឿង ។ ដោយឡែកប្រទេសជាង៣០ផ្សេងទៀត នៅទ្វីបអាហ្វ្រិក និង មជ្ឈិមបូព៌ា បានប្រើប្រាស់ប្រព័ន្ធផ្កាយរណប កំណត់គោលដៅរបស់ចិន ៕
