សារព័ត៌មាន នគរវត្ត តែងតែនាំមុខគេជានិច្ច
សកម្មភាពធ្វើសមយុទ្ធរវាង អាមេរិក ជប៉ុន និងហ្វីលីពីន នៅតំបន់សមុទ្រចិនភាគខាងត្បូង ស្ថិតនៅដែនសមុទ្រហ្វីលីពីន បានធ្វើឲ្យភាគីចិន ជំទាស់យ៉ាងខ្លាំងដោយចាត់ទុកថានោះជាសកម្មភាព បង្កឲ្យមាន វិវាទនិងអសន្តិសុខកើតឡើងនៅក្នុងតំបន់។
កន្លងមករដ្ឋាភិបាលហ្វីលីពីន បានប្រកាសថា ប្រទេសនេះមិនស្វែងរកការធ្វើសង្គ្រាមជាមួយ ចិននោះឡើយ នៅក្នុងតំបន់សមុទ្រចិនភាគខាងត្បូង ។ មិនតែប៉ុណ្ណោះហ្វីលីពីនក៏បានយលព្រមចែករំលែកផលលាភ ទទួលបានការការឃួងយកប្រេងនៅតំបន់សមុទ្រដែលមានវិវាទ ក្នុងនោះហ្វីលីពីន ទទួលបាន ៦០ ចំណែកចិន ទទួលបានតែ ៤០ភាគរយប៉ុណ្ណោះ។
នៅពេលនេះកម្លាំងទាហាន អាមេរិក ជប៉ុន និងហ្វីលីពីន ជាង ២ពាន់នាក់ បានចាប់ផ្តើមធ្វើសមយុទ្ធរួមគ្នា ជាប្រចាំនៅក្នុងតំបន់សមុទ្រចិនខាងត្បូង ចាប់ពីថ្ងៃទី៩ខែតុលាឆ្នាំ២០១៩។
គោលដៅនៃការធ្វើសមយុទ្ធ គឺដើម្បីបង្កើនសមត្ថភាព នៅក្នុងប្រតិកម្មរហ័ស សម្រាប់កម្លាំងទាហានប្រទេសទាំង៣។
សមយុទ្ធខាងលើមានរយៈពេល១០ថ្ងៃ ក្នុងនោះមានសមយុទ្ធបាញ់គ្រាប់ពិតផងដែរ ។ ក្រៅពីនេះក៏មានសកម្មភាពវាយលុក ទៅលើដីគោក ក្នុងតំបន់សមុទ្រ Subic ជាតំបន់ដែលទាហានអាមេរិក ធ្លាប់ធ្វើសកម្មភាពនៅទីនោះ ស្ថិតនៅភាគខាងជើង រដ្ឋធានី ម៉ានីលរបស់ហ្វីលីពីន។ សមយុទ្ធក៏មានសកម្មភាពមនុស្សធម៌ នៅខេត្តចំនួន៦ស្ថិតនៅភាគខាងជើងប្រទេសហ្វីលីពីន។
ក្នុងពេលជាមួយគ្នានេះដែរ រដ្ឋាភិបាលទីក្រុងប៉េកាំងបានចាត់ទុកការធ្វើសមយុទ្ធខាងលើ របស់កម្លាំងទាហានអាមេរិក និងសម្ព័ន្ធមិត្ត នៅជិតតំបន់ដែលចិនគ្រប់គ្រងគឺជាការគំរាមកំហែងដល់សន្តិសុខនៅក្នុងតំបន់ ។
ប៉ុន្តែភាគីអាមេរិក និងហ្វីលីពីនបានប្រកាសថា សកម្មភាពធ្វើសមយុទ្ធខាងលើ គឺដើម្បីប្រឆាំងក្រុមភេរវកម្ម ជួយសង្គ្រោះ មនុស្សធម៌តែប៉ុណ្ណោះ។ នៅក្នុងសេចក្តីប្រកាស របស់ស្ថានទូតអាមេរិក ប្រចាំនៅទីក្រុងម៉ានីលបានបញ្ជាក់ថា «សកម្មភាពធ្វើសមយុទ្ធខាងលើ គឺដើម្បី បង្កើនការរក្សាសេរីភាពចរាចរណ៍នៅដែនសមុទ្រ ឥណ្ឌា-ប៉ាស៊ីហ្វិក៕
