សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ជនសង្ស័យ២នាក់ បានជិះម៉ូតូសណ្តោងរ៉ឺម៉កអេតចាយមួយគ្រឿង មកធ្វើសកម្មភាពលួចសែងទ្វារដែកមួយចំហៀងបម្រុងគេចខ្លួន តែត្រូវម្ចាស់ផ្ទះចេញមកទាន់ស្រែកឆោឡោផ្អើលអ្នកភូមិនាំគ្នា ដេញចាប់បានទាំង២នាក់ រួមនិងវត្ថុតាងជាក់ស្តែង ប្រគល់ជូនសមត្ថកិច្ចនគរបាលខណ្ឌចំការមន ។
ករណីលួចខាងលើនេះ កើតឡើងកាលពីម៉ោង១២និង១៥នាទីរំលងអាធ្រាត្រឈានចូល ថ្ងៃទី៩ ខែតុលា ឆ្នាំ២០១៩ នៅចំណុចផ្ទះកំពុងសាងសង់មួយកន្លែង តាមបណ្តោយផ្លូវលេខ៤៣០ កែងនឹងផ្លូវលេខ៤៧៨ ស្ថិតក្នុងសង្កាត់ទួលទំពូង២ ខណ្ឌចំការមន រាជធានីភ្នំពេញ ។
បុរសម្នាក់ ជាអ្នកម៉ៅការសំណង់ផ្ទះខាងលើនេះ បានឲ្យដឹងថា មុនពេលកើតហេតុ គឺពួកគាត់កំពុងសម្រាកនៅក្នុងផ្ទះសុខ ស្រាប់តែមានជនសង្ស័យ២នាក់ ជិះម៉ូតូសណ្តោងរ៉ឺម៉កអេតចាយមួយគ្រឿង ដោយធ្វើដំណើរតាមបណ្តោយផ្លូវលេខ៤៣០ ពីជើងទៅត្បូង ។ លុះមកដល់ចំណុចផ្ទះកើតហេតុ ក៏បានឈប់ម៉ូតូចោលនៅមុខផ្ទះ ហើយក៏នាំគ្នាលួចចូលទៅក្នុងផ្ទះធ្វើសកម្មភាពសែងយកទ្វាររបងដែកមួយចំហៀង ដែលពួកគាត់បានដោះគរទុកនៅចំហៀងផ្ទះ រួចបម្រុងសែងចេញយកទៅដាក់លើរ៉ឺម៉កអេតចាយរបស់ពួកគេ ។ ភ្លាមនោះត្រូវខាងអ្នកធ្វើការនៅផ្ទះកន្លែងកើតហេតុ ឃើញទាន់ក៏បានស្រែកឆោឡោថាចោរៗ បង្កការភ្ញាក់ផ្អើលដល់អ្នកភូមិនាំគ្នាចេញមកឃាត់ខ្លួនជនសង្ស័យបានទាំង២នាក់តែម្តង ។
ក្រោយកើតហេតុ ជនសង្ស័យទាំងពីរនាក់ ត្រូវបានប្រជាពលរដ្ឋប្រគល់ឲ្យសមត្ថកិច្ចមូលដ្ឋាន ឃាត់ខ្លួនយកទៅកាន់ប៉ុស្តិ៍នគរបាលរដ្ឋបាលទួលទំពូង២ ដើម្បីសួរនាំបន្ត និងកសាងសុំណុំរឿងបញ្ជូនទៅកាន់អធិការដ្ឋាននគរបាលខណ្ឌចំការមន ចាត់ការតាមច្បាប់ ៕ស រស្មី
