សារព័ត៌មាន នគរវត្ត តែងតែនាំមុខគេជានិច្ច
អាមេរិកតែងតែចោទប្រកាន់វេណេហ៊្សុយអេឡាថាបានរំលោភបំពានសិទ្ធិមនុស្សយ៉ាងធ្ងន់ ប៉ុន្តែពេលនេះ វេណេហ្ស៊ុយអេឡា បានជាប់ឆ្នោត កៅអីសិទ្ធិមនុស្សរបស់អង្គការសហប្រជាជាតិ ។
ប្រទេសវេណេហ្ស៊ុយអេឡាបានឈ្នះនៅក្នុងការប្រកួតប្រជែងមួយ ដើម្បីកៅអីសិទ្ធិមនុស្សរបស់ក្រុមប្រឹក្សាសិទ្ធិមនុស្សអង្គការសហប្រជាជាតិ កាលពីថ្ងៃទី១៧ ខែតុលា ឆ្នាំ២០១៩ បើទោះបីអង្គការប្រមាណជាង៥០ ក៏ដូចប្រទេសជាច្រើនផ្សេងទៀត បានធ្វើយុទ្ធនាការប្រឆាំងរដ្ឋាភិបាលវេណេហ្ស៊ុយអេឡារបស់លោកនីកូឡាស់ ម៉ាឌូរូ ដោយសារតែរំលោភសិទ្ធិមនុស្សយ៉ាងណាក៏ដោយ ។
មានការអបអរទះដៃយ៉ាងកងរំពងសាទរនៅឯអង្គមហាសន្និបាត នៅពេលដែលមានការប្រកាសលទ្ធផលកៅអីសិទ្ធិមនុស្សចំនួនពីរសម្រាប់ប្រទេសនៅតំបន់អាមេរិក-ឡាទីន ។ ប្រទេសប្រេស៊ីលបានឈ្នះសំឡេង១៥៣សំឡេង, បន្ទាប់មក ប្រទេសវេណេហ្ស៊ុយអេឡាទទួលបានសំឡេង១០៥សំឡេង ខណៈដែលប្រទេស កូស្តារីកា បានសំឡេង៩៦សំឡេង ។
រដ្ឋមន្ត្រីក្រសួងការបរទេសវេណេហ្ស៊ុយអេឡា លោក Jorge Arreaza បានហៅលទ្ធផលបោះឆ្នោតនេះថា «ជ័យជំនះមួយ» ក្រោយពីយុទ្ធនាការប្រឆាំងដ៏ខ្លាំងក្លាពីសំណាក់សហរដ្ឋអាមេរិក និងប្រទេសជាដៃជើងរបស់គេ។
រដ្ឋបាលលោកដូណាល់ ត្រាំបានទទួលស្គាល់មេបក្សប្រឆាំង ជួន កាយដូ ជាប្រធានាធិបតីបណ្តោះអាសន្នវេណេហ្ស៊ុយអេឡា ។ ឯកអគ្គរដ្ឋទូតសហរដ្ឋអាមេរិក Kelly Craft បានចាត់ទុក វត្តមានរដ្ឋាភិបាលរបស់លោក ម៉ាឌូរូ នៅឯក្រុមប្រឹក្សាសិទ្ធិមនុស្សអង្គការសហប្រជាជាតិនោះថា «ជាភាពអាម៉ាស់ចំពោះអង្គការសហប្រជាជាតិ និងជាសោកនាដកម្មមួយរបស់ប្រជាជនវេណេហ្ស៊ុយអេឡា» ។
លោកស្រី Craft ថ្លែងការណ៍ថា ប្រទេសមួយដែលជាអ្នករំលោភសិទ្ធិមនុស្សដ៏អាក្រក់បំផុតក្នុងលោក អាចទទួលបានកៅអីមួយនៅក្នុងអង្គការមួយដែលគិតថាជាអ្នកដើម្បីការពារសិទ្ធិមនុស្សនោះ គឺជារឿងមួយគួរឲ្យរន្ធត់ជាទីបំផុត ៕
