សារព័ត៌មាន នគរវត្ត តែងតែនាំមុខគេជានិច្ច
ឥណ្ឌូនេស៊ី ងាយរងការរញ្ជួយដី ជាងគេបំផុតនៅលើពិភពលោក ដោយប្រទេសនេះស្ថិតនៅ ក្នុងជួរខ្សែក្រវាត់ ភ្លើងនៃផែនដី ។ កាកាលពីយប់ថ្ងៃទី១៤ ខែវិច្ឆិកា មានការរញ្ជួយដីកម្រិត ៧,១រ៉ិចទ័រ ធ្វើឲ្យ អាជ្ញាធរ ប្រកាសអាសន្នពីរលកយក្សស៊ូណាមិ។
ប៉ុន្តែក្រោយមក អាជ្ញាធរឥណ្ឌូណេស៊ីបានលុបចោលការប្រកាសអាកាសអាសន្ន ពីរលកយក្សស៊ូណាមិវិញហើយ បន្ទាប់ពីគ្រោះរញ្ជួយដីកម្រិតធ្ងន់ ៧.១រ៉ិចទ័របានវាយប្រហារលើកោះ ម៉ូលូកខាស (Moluccas) កាលពីថ្ងៃ១៤ខែវិច្ឆិកា។
យោងតាមទីភ្នាក់ងារស្ទាបស្ទង់ភូមិសាស្ត្រអាមេរិក USGS គ្រោះរញ្ជួយដីកម្រិតខាងលើ មានចំណុចរញ្ជួយក្នុងសមុទ្រស្ថិតនៅចំងាយ ១៣៩គីឡូម៉ែត្រពីភាគពាយ័ព្យទីក្រុង ធើណេត (Ternate) ជាមួយជម្រៅ ៤៥គីឡូម៉ែត្រទៅក្រោមបាទសមុទ្រ។ ប៉ុន្តែមកទល់នឹងពេលនេះ មិនទាន់មានសេចក្ដីរាយការណ៍ពីការបំផ្លិចបំផ្លាញ និងជនរងគ្រោះណាម្នាក់នៅឡើយទេ។
មុនដំបូងគេចេញប្រកាសថា ទំហំរញ្ជួយដីមានរហូតដល់៧.៤រ៉ិចទ័រ ប៉ុន្តែបន្តិចក្រោយមក បានកែតម្រូវឡើងវិញមកត្រឹម៧.១រ៉ិចទ័រ ហើយមកទល់ពេលនេះ មិនទាន់មានការផ្សព្វផ្សាយអំពីការខូចខាត ឬស្លាប់មនុស្សអ្វីនៅឡើយទេ ។ ប្រភពស៊ីនហួបានផ្សាយ ការរញ្ជួយដីនេះបានកើតឡើងនៅវេលាម៉ោង២៣និង១៧នាទី (ម៉ោងនៅក្នុងតំបន់) ត្រង់ចំណុចកណ្តាល ១៣៧គីឡូម៉ែត្រ ភាគពាយព្យដែនកោះ Jailolo ស្ថិតនៅក្នុងខេត្ត North Maluku ភាគខាងកើតរបស់ប្រទេសឥណ្ឌូនេស៊ី ហើយមានជម្រៅ៧៣គីឡូម៉ែត្រពីក្រោមបាតសមុទ្រ ។
លោក Rahmat Triyono ប្រធានអង្គភាពរញ្ជួយដីរបស់ប្រទេសនេះបញ្ជាក់ថា ការព្រមានអំពីរលកយក្សស៊ូណាមិបានចេញផ្សាយ ខណៈដែលការរញ្ជួយដីនេះបានធ្វើឲ្យកក្រើកញាប់ញ័រទៅដល់ខេត្តក្បែរខាង North Sulawesi ដែលមានទីតាំងស្ថិតនៅភាគកណ្តាលរបស់ប្រទេសឥណ្ឌូនេស៊ីនោះទៀតផង ។
លោកបានបន្តថា រលកសមុទ្រមានកម្ពស់១០.៥សង្ទីម៉ែត្របានកើតមាន នៅទីក្រុងមាត់សមុទ្រ Bitung របស់ប្រទេសឥណ្ឌូនេស៊ី ។
នៅឯខេត្ត North Maluku អ្នកស្រុកនាំគ្នាភៀសខ្លួនចេញពីលំនៅឋានទៅកាន់ទីទួលខ្ពស់ៗមានសុវត្ថិភាព ដោយសារតែភ័យខ្លាចអំពីការវាយប្រហារដោយរលកយក្សស៊ូណាមិ ។ អាជ្ញាធរគ្រប់គ្រងគ្រោះមហន្តរាយប្រទេសនេះ បានអំពាវនាវប្រជាជនភៀសខ្លួន ហើយរហូតដល់ព្រឹកថ្ងៃទី១៥ ខែវិច្ឆិកានេះ ការជម្លៀសខ្លួនប្រជាជននៅតែបន្តកើតមាន ៕
