សារព័ត៌មាន នគរវត្ត តែងតែនាំមុខគេជានិច្ច
តុលាការធម្មនុញ្ញារបស់ប្រទេសថៃ នៅរសៀលថ្ងៃទី២០ ខែវិច្ឆិកា ឆ្នាំ២០១៩ បានប្រកាសផ្តន្ទាទោស មេដឹកនាំប្រឆាំង លោក Thanathorn Juangroongruangkit ពីបទរំលោភបំពានច្បាប់បោះឆ្នោត ។ ដូច្នេះអភ័យឯកសិទ្ធិជាតំណាងរាស្ត្ររបស់គាត់ត្រូវបានដកហូត, រារាំងមិនឲ្យចូលធ្វើនយោបាយ និងជាប់ពន្ធនាគារផងដែរ ។
យោងតាមការចេញផ្សាយរបស់បណ្តាញព័ត៌មានប្រទេសថៃ ខៅសត (khaosod) បានបញ្ជាក់ថា លោក Thanathorn មេដឹកនាំគណបក្សឆ្ពោះទៅរកអនាគត ដែលជាគណបក្សប្រឆាំងដ៏ល្បីល្បាញនៅក្នុងប្រទេសថៃនោះ ត្រូវបានតុលាការធម្មនុញ្ញថៃ រកឃើញថា បានប្រព្រឹត្តទោសកំហុសដូចការចោទប្រកាន់នោះប្រាកដមែន គឺពាក់ព័ន្ធនឹងការគ្រប់គ្រងភាគហ៊ុននៅក្នុងក្រុមហ៊ុនផ្សព្វផ្សាយព័ត៌មានមួយ គ្រាដែលលោកបាននិងកំពុងចុះឈ្មោះ ប្រកួតប្រជែងការបោះឆ្នោតកាលពីខែមីនា ឆ្នាំ២០១៩នោះ ។ ការគ្រប់គ្រងភាគហ៊ុននៅក្នុងក្រុមហ៊ុនផ្សព្វផ្សាយព័ត៌មានរបស់បេក្ខជនដែលចុះឈ្មោះប្រកួតប្រជែងការបោះឆ្នោត គឺត្រូវបានហាមឃាត់តាមច្បាប់បោះឆ្នោត ។
តុលាការធម្មនុញ្ញរបស់ប្រទេសថៃ ជាបន្តបន្ទាប់បានដកហូតអភ័យឯកសិទ្ធិតំណាងរាស្ត្ររបស់មេដឹកនាំគណបក្សប្រឆាំងរូបនេះ គឺនៅក្រោយពេលដែលតុលាការ បានព្រមទទួលបណ្តឹងពីគណៈកម្មការរៀបចំការបោះឆ្នោត ដែលប្តឹងកាលពីថ្ងៃទី២៣ ខែឧសភា ឆ្នាំ២០១៩ ប្រឆាំងទៅលើមេបក្សប្រឆាំងរូបនេះជាលើកដំបូង ព្រមទាំងផ្អាកតួនាទីទាំងអស់របស់គាត់ ដែលមានទាំងប៉ុន្មាននៅក្នុងរដ្ឋសភានោះ ។
ជាមួយគ្នានេះដែរ លោក Thanathorn នៅបានប្រឈមមុខនឹងការជាប់ពន្ធនាគារ និងហាមឃាត់មិនឲ្យចូលរួមធ្វើនយោបាយរយៈពេល២០ឆ្នាំ តាមច្បាប់បោះឆ្នោតថែមទៀតផង ។
លោក Thanathorn បានថ្លែងថា គាត់បានលក់ភាគហ៊ុននៅក្នុងក្រុមហ៊ុនព័ត៌មាន V-Luck នោះ តាំងតែពីថ្ងៃទី៨ ខែមករា ឆ្នាំ២០១៩ មកម្ល៉េះ ដែលស្របទៅតាមច្បាប់បោះឆ្នោត ។ ប៉ុន្តែចៅក្រមបានអះអាងថា រកមិនឃើញភស្តុតាងជាក់លាក់នោះទេ នៅក្នុងការផ្ទេរភាគហ៊ុនទាំងនោះ ដែលមូលហេតុនេះហើយ ទើបតុលាការធម្មនុញ្ញសម្រេចសាលក្រមចោទប្រកាន់ទោសកំហុសជាផ្លូវការតែម្តង ៕
