សារព័ត៌មាន នគរវត្ត តែងតែនាំមុខគេជានិច្ច
កម្លាំងទាហានជើងទឹកអ៊ីរ៉ង់អាចនិយាយបានថាខ្លាំងជាងគេបំផុតនៅក្នុងតំបន់ ហើយពេលនេះអ៊ីរ៉ង់បន្ថែមសព្វាវុធជួយឲ្យក្រុមនាវាចម្បាំងរបស់អ៊ីរ៉ង់កាន់តែខ្លាំងជាងមុន។
អ៊ីរ៉ង់បានអភិវឌ្ឍ បំពាក់មីស៊ីលទៅលើនាវាចម្បាំងទាំងអស់ ដើម្បីជួយដល់កម្លាំងទាហានជើងទឹករបស់ប្រទេសនេះឲ្យកាន់តែខ្លាំងក្លាឡើង អាចទប់ទល់នឹង ការវាយប្រហារនៅលើដែនសមុទ្រ បានយ៉ាងល្អ ។ សកម្មភាពខាងលើធ្វើឲ្យប្រទេសលោកខាងលិច កំពុងព្រួយបារម្ភកាន់តែខ្លាំងឡើងថែមទៀត ។
សារព័ត៌មានអ៊ីរ៉ង់ បានផ្សាយថា កម្លាំងទាហានជើងទឹកអ៊ីរ៉ង់ បានប្រកាសថា ខ្លួនបានបំពាក់ប្រព័ន្ធបាញ់មីស៊ីលឈរត្រង់ទៅលើនាវាចម្បាំងទាំងអស់ នៅក្នុងប្រទេសនេះ។ ការបំពាក់មីស៊ីលខាងលើ គឺជាការបង្កើនសមត្ថភាព ធ្វើសឹកសង្គ្រាមរបស់ទាហានជើងទឹកជាមួយនឹងសព្វាវុធទំនើបៗទាន់សម័យ។ រហូតមកដល់ពេលនេះ បណ្តានាវាចម្បាំងទាំងអស់ អ៊ីរ៉ង់អាចបំពាក់មីស៊ីលប្រឆាំងដែនអាកាសជាច្រើនប្រភេទ អាចទប់ទល់រាល់ការគំរាមកំហែងវាយប្រហារ ទាំងពីលើដែនអាកាសនិងដែនគោក។ ជាមួយគ្នានេះ អ៊ីរ៉ង់ក៏អាចវាយបកវិញយ៉ាងមានប្រសិទ្ធភាពថែមទៀតផង។
ប្រព័ន្ធបាញ់មីស៊ីលនៅលើនាវាចម្បាំងរបស់អ៊ីរ៉ង់ មានពីរប្រភេទ គឺ «ក្តៅ និងត្រជាក់» ។ ប្រភេទក្តៅមានន័យថា មីស៊ីលនឹងដំណើរការភ្លាមទាំងនៅបំពង់បាញ់។ ចំណែកប្រភេទត្រជាក់ មានន័យថា គឺប្រើប្រាស់សម្ពាធខ្យល់រុញមីស៊ីល ចេញពីបំពង់បាញ់ឡើងទៅលើ ក្នុងកម្ពស់សុវត្ថិភាព ទើបម៉ាស៊ីលមីស៊ីលដំណើរការ។ វិធីសាស្ត្របាញ់បែបនេះ ជាការពេញនិយមបំផុតរបស់រុស្ស៊ី ហើយវាមានសុវត្ថិភាពផងដែរ នៅពេលមានបញ្ហាកើតឡើង។
បើប្រៀបធៀប ការបាញ់ តាមប្រភេទក្តៅ និងត្រជាក់ ការបាញ់តាមបែបត្រជាក់ល្អជាង ដោយមិនត្រូវការប្រព័ន្ធស៊ូកម្តៅខ្ពស់ នៃបំពង់បាញ់ ក៏ដូចជា ការបាញ់តាមបែបក្តៅ ។ ប៉ុន្តែការបាញ់តាមបែបត្រជាក់ គឺត្រូវតែមានបច្ចេកទេសខ្ពស់ជាង ប្រសិបើម៉ាស៊ីមីស៊ីល មិនដំណើរការ មីស៊ីលអាចធ្លាក់ចូលក្នុងបំពង់បាញ់វិញ ហើយក៏ជារឿងដ៏គ្រោះថ្នាក់បំផុតផងដែរ។
នៅក្នុងជួកម្លាំងទាហានជើងទឹកអ៊ីរ៉ង់ កាំជ្រួចមីស៊ីល Bavar 373 ត្រូវបានចាត់ទុកថាជាមីស៊ីលការពារដែនអាកាសដ៏ទំនើបបំផុតរបស់អីរ៉ង់ ហើយមីស៊ីលនេះប្រើប្រាស់វិធីសាស្ត្រត្រជាក់ ក្នុងការបាញ់ ដូចជា មីស៊ីលការពារ S-300 របស់រុស្ស៊ី ជាដើម៕
