សារព័ត៌មាន នគរវត្ត តែងតែនាំមុខគេជានិច្ច
ប្រភពព័ត៌មានប៊ីប៊ីស៊ីបានផ្សាយថា មនុស្សជាច្រើននាក់បានស្លាប់ នៅក្នុងហេតុការណ៍ភ្លើងឆេះរោងចក្រនៅក្នុងតំបន់ប្រជុំជន ក្នុងប្រទេសឥណ្ឌា កាលពីព្រឹកថ្ងៃអាទិត្យ ទី៨ ខែធ្នូ ឆ្នាំ២០១៩ ។ មូលហេតុបណ្តាលឲ្យអគ្គិភ័យនៅមិនទាន់ដឹងនៅឡើយទេ អាជ្ញាធរឥណ្ឌាថា បាននិងកំពុងស៊ើបអង្កេត ។
ប្រព័ន្ធផ្សព្វផ្សាយឥណ្ឌាបានផ្សាយថា ហេតុការណ៍អគ្គិភ័យភ្ញាក់ផ្អើលនៅវេលាម៉ោង៥និង៣០នាទីទៀបភ្លឺ ថ្ងៃអាទិត្យ ហើយរហូតដល់ម៉ោង៩និង៣០នាទីព្រឹក ម៉ោងនៅក្នុងតំបន់ មនុស្ស៥៦នាក់ត្រូវបានបញ្ជូនទៅសង្គ្រោះនៅមន្ទីរពេទ្យ ។ ប្រភពព័ត៌មានខ្លះបានផ្សាយថា មនុស្សយ៉ាងតិច៤៣នាក់បានបាត់បង់ជីវិត។
ហេតុការណ៍អគ្គិភ័យទ្រង់ទ្រាយធំឆេះអគាររោងចក្រកម្ពស់៦ជាន់នៅក្នុងតំបន់ Anaj Mandi រដ្ឋ Delhi ប្រទេសឥណ្ឌា ។ ជនរងគ្រោះសន្លប់ដោយសារថប់ដង្ហើម ។ មនុស្សជាច្រើនសិបនាក់ផ្សេងទៀតបានរងរបួស ។
នាយករដ្ឋមន្ត្រីឥណ្ឌា លោកណារ៉េនដ្រា ម៉ូឌី បានសម្តែងទុក្ខសោកចំពោះសោកនាដកម្មនេះ ។ ផ្នែកពាក់ព័ន្ធទាំងអស់នឹងផ្តល់ជំនួយជួយដល់ជនរងគ្រោះក្នុងហេតុការណ៍សោកនាដកម្មនេះ ។
សាក្សីបាននិយាយថា ភ្លើងបានឆេះអំឡុងពេលដែលកម្មករកំពុងនាំគ្នាដេកលង់លក់ ។ ទីតាំងដែលឆេះគឺជាកន្លែងស្តុកកាបូបសាលារៀន, ស្តុកទុកដប និងសម្ភារវត្ថុធាតុដើមដទៃផ្សេងទៀត ៕
