សារព័ត៌មាន នគរវត្ត តែងតែនាំមុខគេជានិច្ច
ច្បាប់ចូលនិវត្តន៍កំពុងតែបង្កឲ្យមាន មហាបាតុកម្មនៅក្នុងប្រទេសបារាំង ហើយនៅថ្ងៃទី ១០ ធ្នូ ២០១៩ មហាបាតុកម្មផ្ទុះឡើងនៅប្រទេសបារាំង ប្រឆាំងកំណែទម្រង់ច្បាប់ចូលនិវត្តន៍។
នៅថ្ងៃទី១០ ខែធ្នូ ឆ្នាំ២០១៩ តាមការគ្រោងទុក គឺមានមហាបាតុកម្មកើតឡើង នៅក្នុងប្រទេសបារាំង ប្រឆាំងរដ្ឋាភិបាលប្រធានាធិបតី អេម៉ានូអែល ម៉ាក្រុង (Emmanuel Macron) ទាក់ទងស្តីអំពីគម្រោងកំណែទម្រង់ច្បាប់ចូលនិវត្តន៍ ។ បាតុកម្មនេះ បាននាំឲ្យរាំងស្ទះដំណើរការអាជីវកម្មក្នុងទីក្រុង ការបិទសាលារៀន គ្មានសេវាដឹកជញ្ជូនសាធារណៈជាដើម ។
យោងតាមការចេញផ្សាយរបស់កាសែតបារាំង បានបញ្ជាក់ថា ក្រុមសហជីព នៅក្នុងប្រទេសនេះ បានប្រកាសធ្វើមហាកូដកម្មទូទាំងប្រទេស នៅថ្ងៃទី១០ ខែធ្នូ ឆ្នាំ២០១៩ ដើម្បីប្រឆាំងនឹងគម្រោងកំណែទម្រង់ច្បាប់ចូលនិវត្តន៍របស់រដ្ឋាភិបាល ។ ក្រុមសហជីព និងបាតុករទាំងអស់ បានទាមទារឲ្យរដ្ឋាភិបាលបារាំង ត្រូវបោះបង់ចោលជាបន្ទាន់ នូវគម្រោងធ្វើកំណែទម្រង់ច្បាប់ចូលនិវត្តន៍ ។ កំណែទម្រង់ថ្មី ដែលសំដៅលុបចោលរបបចូលនិវត្តន៍ពិសេសៗទាំង៤២ ហើយដាក់ជំនួសមកវិញនូវរបបចូលនិវត្តន៍តែមួយ សម្រាប់គ្រប់វិស័យ ហើយជារបបចូលនិវត្តន៍ ដែលផ្អែកលើចំនួនការសន្សំពិន្ទុរបស់បុគ្គលិកម្នាក់ៗ ។
ទោះជាយ៉ាងណាក៏ដោយ នាយករដ្ឋមន្ត្រីបារាំង លោក Edouard Philippe បានថ្លែងថា កំណែទម្រង់នេះ មិនមែនជាការបំផ្លាញប្រព័ន្ធចូលនិវត្តន៍បារាំងទេ តែវាជាការសង្រ្គោះប្រព័ន្ធនេះ ដែលកំពុងតែដើរយ៉ាងត្រដាបត្រដួស ។ មួយវិញទៀត ការបង្កើតឲ្យមានរបបចូលនិវត្តន៍តែមួយ គឺជាការបង្កើតឲ្យមានភាពយុត្តិធម៌ ដល់បុគ្គលិកទាំងអស់ ផ្ទុយពីប្រព័ន្ធរាល់ថ្ងៃនេះ ដែលមានចំណុចអវិជ្ជមានជាច្រើន ។ បើមិនធ្វើកំណែទម្រង់នៅថ្ងៃនេះ ទៅថ្ងៃមុខ រដ្ឋាភិបាលក្រោយៗទៀត ក៏នឹងត្រូវតែធ្វើដែរ ។
ប្រទេសបារាំងទាំងមូល ជាពិសេសគឺទីក្រុងប៉ារីស ប្រឈមជាថ្មី ជាមួយនឹងការរាំងស្ទះ គ្មានសេវាដឹកជញ្ជូនសាធារណៈ សាលារៀនបិទទ្វារ ហាងទំនិញបិទទ្វារ ជាដើម ។ តាមការជូនដំណឹង ពីសំណាក់អ្នកនាំពាក្យក្រុមហ៊ុនដឹកជញ្ជូនផ្លូវដែកបារាំង SNCF គឺមានតែរថភ្លើងចន្លោះពី១០ ទៅ២០% ប៉ុណ្ណោះដែលនឹងមានដំណើរការ ។ ដោយឡែក នៅទីក្រុងប៉ារីសវិញ ក្នុងចំណោមរថភ្លើង Metro ក្រោមដី ទាំងអស់១៦ខ្សែ គឺមានតែប្រមាណ៦ខ្សែតែប៉ុណ្ណោះដែលដំណើរការ ១០ខ្សែទៀតត្រូវបិទទាំងស្រុង ។
នៅថ្ងៃអង្គារទី១០ ខែធ្នូ ឆ្នាំ២០១៩នេះ តាមការគ្រោងទុកនោះ សេវាសាធារណៈ ដូចជា រថភ្លើង រថយន្តក្រុង សាលារៀន ត្រូវផ្អាកស្ទើរតែទាំងស្រុង ។ រដ្ឋាភិបាលបារាំងបានបញ្ជាក់ថា ខ្លួនកំពុងតែព្យាយាមចរចាជាមួយតំណាងសហជីព ហើយ និងបង្ហាញខ្លឹមសារទាំងស្រុង គម្រោងកំណែទម្រង់ច្បាប់ចូលនិវត្តន៍នេះ នៅថ្ងៃទី១១ ខែធ្នូ ឆ្នាំ២០១៩ ៕
