សារព័ត៌មាន នគរវត្ត តែងតែនាំមុខគេជានិច្ច
នៅព្រឹកថ្ងៃទី១៩ ខែធ្នូ ក្រុមបាតុករឥណ្ឌាបាន បិទផ្លូវរថភ្លើងក្រោមដី ក៏ដូចជាផ្លូវចរាចរណ៍សំខាន់ចំនួន១៤ខ្សែ ចូលទៅកាន់ទីក្រុង។ អាជ្ញាធរទីក្រុងញូវដេលី បានចាត់វិធានការទប់ទល់នឹងក្រុមអ្នកតវ៉ាប្រឆាំងនឹងការធ្វើវិសោធនកម្មច្បាប់សញ្ជាតិ ដែលត្រូវបានអនុម័ត ដោយរដ្ឋសភា។
បើតាមបណ្ដាញផ្សព្វផ្សាយរបស់ឥណ្ឌា បានផ្សាយថា ការធ្វើវិសោធនកម្មច្បាប់សញ្ជាតិ បើកផ្លូវឲ្យជនអន្ដោប្រវេសន៍ មកពីប្រទេសជិតខាង អាចទទួលបានសញ្ជាតិឥណ្ឌានោះ នាំឲ្យការតវ៉ាយ៉ាងខ្លាំងពីប្រជាពលរដ្ឋ អ្នកនយោបាយ និងតារាភាពយន្ដល្បីៗ។ នៅក្នុងការធ្វើបាតុកម្មប្រឆាំងនឹងច្បាប់ដ៏ចម្រូងចម្រាសនេះ បានបង្កឲ្យមានមនុស្សជាច្រើននាក់ស្លាប់ និងរបួស ហើយមនុស្សមួយចំនួនទៀត ក៏ត្រូវបានចាប់ខ្លួនផងដែរ។
ប្រភពព័ត៌មានដដែល បានបន្ដថា ដោយសារតែមានការតវ៉ាប្រឆាំងនឹងច្បាប់សញ្ជាតិនេះ ទើបកាលពីព្រឹក ថ្ងៃទី១៩ ខែធ្នូ នេះ អាជ្ញាធរ បានដាក់ចេញនូវវិធានការទប់ទល់នឹងការតវ៉ារបស់ប្រជាពលរដ្ឋ មកពីទីក្រុងចំនួន១១។ ដោយឡែកអ្នកធ្វើដំណើរទៅធ្វើការងារ ក៏ត្រូវជាប់ស្ទះ នៅតាមផ្លូវជាតិ Delhi-Gurugram ហើយផ្លូវចំនួន១៤ផ្សេងទៀត ឆ្ពោះទៅកាន់ស្ថានីយរថភ្លើងក្រោមដី ក៏ត្រូវបានបិទផងដែរ។
ដោយឡែក ក្រុមអ្នកតវ៉ាប្រឆាំងនឹងច្បាប់សញ្ជាតិនេះ បានចោទប្រកាន់ទៅលើប៉ូលិស ពីការប្រើអំពើហិង្សា ប្រឆាំងនឹងប្រជាពលរដ្ឋ និងនិស្សិត។
ការផ្ទុះការតវ៉ាប្រឆាំងនឹងច្បាប់សញ្ជាតិ បានកើតឡើង នៅក្នុងរដ្ឋ Assam និង Meghalaya កាលពីថ្ងៃសុក្រ (ទី១៣ ខែធ្ន) មុន។ បើតាមច្បាប់សញ្ជាតិថ្មីនេះ បានអនុញ្ញាតឲ្យជនអន្ដោប្រវេសន៍ មកពីប្រទេសជិតខាង ដែលជាអ្នកកាន់សាសនាហិណ្ឌូ សាសនា Parsis សាសនាគ្រឹស្ដ សាសនាព្រះពុទ្ធ និងសាសនា Sikhs រួមមាន អាហ្វហ្គានីស្ថាន ប៉ាគីស្ថាន និងបង់ក្លាដែស ។ប៉ុន្តែច្បាប់សញ្ជាតិនេះ មិនបានផ្តល់ឲ្យជនអន្តោប្រវេសន៍កាន់សាសនាមូស្លីមឡើយ បើទោះជាពួកគេ ចូលមកកាន់ឥណ្ឌា មុនអំឡុងឆ្នាំ២០១៥ក៏ដោយ៕
