សារព័ត៌មាន នគរវត្ត តែងតែនាំមុខគេជានិច្ច
ជើងហោះហើរជាច្រើនត្រូវបានបង្វែរទិសដៅហោះហើរ ដើម្បីបញ្ចៀសគ្រោះថ្នាក់កើតឡើងជាយថាហេតុ ក្នុងពេលដែលភ្នំភ្លើងក្នុងប្រទេសហ្វីលីពីនបានកម្រើកខ្លួន។ ក្រៅពីនេះពលរដ្ឋរស់នៅជិតភ្នំភ្លើងក៏បានជម្លៀសទៅកាន់តំបន់មានសុវត្ថិភាពផងដែរ ។
ភ្នំភ្លើងឈ្មោះថា Taal ដែលស្ថិតនៅភាគខាងត្បូងទីក្រុងម៉ានីល បានភ្ញាក់កម្រើកខ្លួនតែបន្តិច ប៉ុន្តែធ្វើឲ្យមនុស្សរាប់ពាន់នាក់រស់នៅក្បែរខាងនោះភៀសខ្លួន ព្រមទាំងផ្អាកជើងហោះហើរឆ្លងកាត់លើតំបន់នេះទាំងស្រុង ។
ទីភ្នាក់ងារព័ត៌មាន AFP បានផ្សាយថា ភ្នំភ្លើងដ៏ទាក់ទាញភ្ញៀវទេសចរណ៍នៅក្នុងប្រទេសហ្វីលីពីននេះ បានកម្រើកខ្លួន ព្រួសកម្អែផែះ និងផ្សែងខ្មួលខ្មាញ់ទៅលើលំហរអាកាសកាលពីវេលាព្រឹកព្រលឹមថ្ងៃទី១៣ ខែមករា ឆ្នាំ២០២០ ។ អាជ្ញាធរជំនាញបានលើកឡើងថា វាអាចនឹងផ្ទុះខ្លាំងនៅប៉ុន្មានម៉ោងបន្ទាប់នៅក្នុងថ្ងៃនេះ ហើយជាមូលហេតុត្រូវតែជម្លៀសខ្លួនប្រជាជនជាង២ពាន់នាក់នៅក្បែរខាងភ្នំភ្លើង Taal នេះទៅរកទីកន្លែងមានសុវត្ថិភាព ដើម្បីបង្ការគ្រោះថ្នាក់ឲ្យបានមុន ។
មុនដំបូងអាជ្ញាធរប្រកាសផ្អាកជាបណ្តោះអាសន្នប្រតិបត្តិការជើងហោះហើរ ទាំងទៅ និងត្រឡប់មកវិញ នៅអាកាសយានដ្ឋាន NAIA ប៉ុន្តែក្រោយមក បានប្រកាសផ្អាកទាំងស្រុងរហូតទាល់តែមានកំណត់បង្ហាញជូនដំណឹងចុងក្រោយបន្ថែមទៀត ។
គួររំលឹកថា ភ្នំភ្លើងចម្ងាយប្រហែល៦៥គីឡូម៉ែត្រ ភាគខាងត្បូងទីក្រុងម៉ានីលនេះ ជាភ្នំភ្លើងរស់ និងសកម្មជាងគេ ។ ភ្នំភ្លើងTaal បានផ្ទុះចុងក្រោយនៅក្នុងឆ្នាំ១៩៧៧ ។ គួរបញ្ជាក់ដែរថា ភ្នំភ្លើងផ្ទុះដ៏សាហាវសម្លាប់មនុស្សនៅហ្វីលីពីនគឺភ្នំភ្លើង Mount Pinatubo ចម្ងាយប្រហែល១០០គីឡូម៉ែត្រភាគពាយព្យទីក្រុងម៉ានីល សម្លាប់មនុស្សអស់ជាង៨០០នាក់កាលពីឆ្នាំ១៩៩១ ៕
