សារព័ត៌មាន នគរវត្ត តែងតែនាំមុខគេជានិច្ច
រដ្ឋមន្ត្រីក្រសួងសុខាភិបាលជប៉ុន Katsunobu Kato នៅថ្ងៃទី៣០ ខែមករា ឆ្នាំ២០២០ បានបញ្ជាក់ថា ពលរដ្ឋជប៉ុន៣នាក់ក្នុងចំណោមជាង២០០នាក់ដែលបានជម្លៀសខ្លួនចេញពីប្រទេសចិន មកកាន់ស្រុកកំណើតនោះ នៅពេលពិនិត្យរោគវិនិច្ឆ័យ រកឃើញផ្ទុកវីរុសកូរ៉ូណា ។
វីរុសដែលកើតឡើងតាំងពីថ្ងៃទី៨ ខែធ្នូ ឆ្នាំ២០១៩ នៅទីក្រុងវូហាន ប្រទេសចិន រហូតមកដល់ពេលនេះ សម្លាប់អ្នកជំងឺកើនឡើង១៧០នាក់ និងជាង៧ពាន់នាក់ឆ្លងរាលដាល ហើយប្រទេសជិត២០ វីរុសកូរ៉ូណានេះបានឆ្លងទៅដល់ ។
ពលរដ្ឋជប៉ុនបានទៅដល់ស្រុកកំណើតនៅថ្ងៃទី២៩ ខែមករា ឆ្នាំ២០២០ លើជើងហោះហើរដំបូងរបស់ជប៉ុនដែលហោះទៅជម្លៀសពលរដ្ឋរបស់ខ្លួនចេញពីទីក្រុងវូហាន ខេត្តHubei ទីកន្លែងដែលកំពុងរាតត្បាតដោយវីរុសកូរ៉ូណា ។ ថ្លែងប្រាប់ទីភ្នាក់ងារព័ត៌មាន NHK រដ្ឋមន្ត្រីក្រសួងសុខាភិបាលជប៉ុន បានបញ្ជាក់ថា អ្នកជំងឺ២នាក់ ក្នុងចំណោមបីនាក់ មិនទាន់បង្ហាញចេញសញ្ញាអ្វីឡើយទេ ។
ពលរដ្ឋជប៉ុន៣នាក់បន្ថែមទៀតដែលទើបបានជម្លៀសមកដល់ជប៉ុន និងឆ្លងវីរូសកូរ៉ូណានេះ ធ្វើឲ្យជប៉ុនមានអ្នកជំងឺរហូតមកដល់ពេលនេះចំនួន១១នាក់ ។ អ្នកជំងឺ២នាក់បានឆ្លងជំងឺនេះដែរ ដោយមិនបានធ្វើដំណើរទៅកាន់ប្រទេសចិននោះឡើយ ។ ជប៉ុនបានបញ្ចេញជើងហោះហើរទៅជម្លៀសពលរដ្ឋរបស់ខ្លួន២០៦នាក់ពីប្រទេសចិន កាលពីថ្ងៃទី២៩ ខែមករា ឆ្នាំ២០២០ ។
នាយករដ្ឋមន្ត្រីជប៉ុន លោក Shinzo Abe បានថ្លែងថា ពលរដ្ឋដែលទើបជម្លៀសខ្លួនហើយមានផ្ទុកវីរុសនេះ អាចត្រូវបានព្យាបាលដោយលក្ខណៈពិសេស ៕
