សារព័ត៌មាន នគរវត្ត តែងតែនាំមុខគេជានិច្ច
ជំងឺរលាកសួតថ្មីបង្កឡើងដោយវីរុសកូរ៉ូណា (2019-nCoV) បានឆ្លងទៅលើមនុស្ស ២០, ៦២៦នាក់ និងស្លាប់៤២៦នាក់ និងឆ្លងរាលដាលនៅប្រទេសចំនួន២៧ជុំវិញពិភពលោក ។
ជំងឺកូរ៉ូណា ផ្ទុះឡើងដំបូងគេនៅក្នុងខែធ្នូ ឆ្នាំ២០១៩ ស្ថិតនៅទីក្រុងវូហាន ខេត្ត Hubei ភាគកណ្តាលរបស់ប្រទេសចិន រហូតមកដល់ថ្ងៃទី៣ ខែកុម្ភៈ ឆ្នាំ២០២០ មានរយៈពេលជាង២ខែហើយ ប៉ុន្តែគេនៅមិនទាន់រកឃើញថ្នាំព្យាបាល ឬវាក់សាំងចាក់បង្ការវីរុសបាននៅឡើយទេ ។ អង្គការសុខភាពពិភពលោកបានចាត់ទុកថា នេះជាកង្វល់ព្រួយបារម្ភរបស់ពិភពលោក និងប្រកាសអាសន្ន ហើយប្រទេសនានាបានរួមគ្នារិតបន្តឹងការធ្វើដំណើរក៏ដូចជួយទប់ស្កាត់ជំងឺឆ្លងរាលដាល កុំឲ្យទ្រង់ទ្រាយធំជាងនេះ ។
នៅប្រទេសចិន ជំងឺនេះបានឆ្លងកើនឡើង ២០ ៤៣៨ នាក់ និងស្លាប់៤២៥នាក់ ។ ចំណែកអ្នកជំងឺឆ្លងនៅហ្វីលីពីន២ករណីនោះ បានស្លាប់ថែមម្នាក់ទៀត ធ្វើឲ្យចំនួនសរុបអ្នកស្លាប់ ៤២៦នាក់ ។
ចំណែកប្រទេសជាង២០ដទៃផ្សេងទៀត ក្នុងនោះជប៉ុនមានករណីឆ្លងជំងឺនេះច្រើនជាងគេ គឺរហូតដល់២០ករណី ៕
