សារព័ត៌មាន នគរវត្ត តែងតែនាំមុខគេជានិច្ច
រដ្ឋាភិបាលសហរដ្ឋអាមេរិកបានប្រកាសថា បានសម្លាប់មេដឹកនាំក្រុមមែកធាងអិស្លាមជ្រុលនិយម អាល់កៃដា ដែលទទួលបន្ទុកនៅឧបទ្វីបអារ៉ាប់នោះហើយ ។
លោកប្រធានាធិបតីដូណាល់ ត្រាំ បានថ្លែងកាលពីថ្ងៃទី៧ ខែកុម្ភៈ ឆ្នាំ២០២០ថា សហរដ្ឋអាមេរិកបានសម្លាប់ឈ្មោះ Qassim al-Raymi មេដឹកនាំក្រុមជ្រុលនិយមអិស្លាមអាល់កៃដា ទទួលបន្ទុកឧបទ្វីបអារ៉ាប់(AQAP)នោះហើយ អំឡុងពេលដែលកម្លាំងយោធាអាមេរិក ធ្វើប្រតិបត្តិការមួយប្រឆាំងភេរវកម្មនៅក្នុងទឹកដីប្រទេសយេមែន ។
សេចក្តីថ្លែងការណ៍របស់ប្រធានាធិបតីបានបញ្ជាក់ថា «ស្ថិតក្រោមការដឹកនាំរបស់ Rimi នេះ, ក្រុម AQAPបានប្រព្រឹត្តអំពើហិង្សារាប់មិនអស់ប្រឆាំងទៅលើជនស៊ីវិលនៅក្នុងទឹកដីយេមែន និងបានវាយប្រហារជាច្រើនប្រឆាំងមកលើសហរដ្ឋអាមេរិក ក៏ដូចកងកម្លាំងអាមេរិកផងដែរ»។
លោកដូណាល់ ត្រាំ មិនបានបញ្ជាក់ថា មេភេរវកម្មមួយរូបនេះត្រូវបានសម្លាប់នោះឡើយ ។ ប៉ុន្តែលោកបានបញ្ជាក់នៅក្នុងសេចក្តីថ្លែងការណ៍បន្តទៀតថា «ការស្លាប់របស់គាត់ (Qassim al-Raymi) ជាការធ្វើឲ្យចុះអន់ថយមួយកម្រិតទៀតរបស់ក្រុម AQAP ក៏ដូចជាធ្វើឲ្យចុះខ្សោយដល់ចលនារបស់ក្រុមអាល់កៃដា នៅទូទាំងពិភពលោក ។ វាក៏បាននាំឲ្យកាន់តែខិតជិតផុតពីការគំរាមកំហែងដោយក្រុមទាំងនេះហើយ ដែលជានិច្ចកាលគំរាមកំហែងដល់សន្តិសុខជាតិរបស់យើងនោះ»។
គួរបញ្ជាក់ថា សហរដ្ឋអាមេរិកបានចាត់ទុកក្រុម AQAP ថា ជាមែកធាងដ៏សម្លាប់មនុស្សបំផុតរបស់បណ្តាញភេរវកម្មអាល់កៃដា ដែលបានករកើតឡើងដោយអតីតមេភេរវករ អូសាមា ប៊ិនឡាដេន ។
ការផ្សព្វផ្សាយព័ត៌មាននៅក្នុងប្រទេសយេមែន អំឡុងពេលប៉ុន្មានថ្ងៃថ្មីៗនេះបញ្ជាក់ថា Qassim al-Raymi ត្រូវបានសម្លាប់ដោយយន្តហោះគ្មានមនុស្សបើកបរ (ដ្រូន) ស្ថិតនៅក្នុងខេត្ត Marib ។ ប្រភពព័ត៌មានមិនទាន់អាចរកប្រភពបញ្ជាក់ច្បាស់លាស់ជាងនេះទៀតឡើយ ។
មន្ត្រីរដ្ឋាភិបាលយេមែនមួយរូបបញ្ជាក់ប្រាប់ប្រភពរ៉យទ័រផ្សាយថា ពិតជាមានយន្តហោះគ្មានមនុស្សបើកបរមួយគ្រឿងមែន ដែលហោះហើរនៅក្នុងខេត្ត Marib ប៉ុន្តែមិនដឹងថា តើ Qassim al-Raymi ត្រូវបានសម្លាប់ដោយយន្តហោះដ្រុននេះឬបែបណានោះទេ ៕
