សារព័ត៌មាន នគរវត្ត តែងតែនាំមុខគេជានិច្ច
ពិភពលោកកំពុងតែស្ថិតនៅក្នុងដំណាក់កាលច្របូច្របល់ ដោយសារតែ មហិច្ឆតារបស់ប្រទេសមហាអំណាចមួយចំនួន ។ កតាទាំងនោះ បានជា ប្រធានាធិបតីបារាំងលោក ម៉ាក្រុង ជំរុញអឺរ៉ុប ឲ្យរួមសាមគ្គីគ្នាថែមទៀត ដើម្បីប្រឈមនឹងភាពគ្មានសណ្តាប់ធ្នាប់ក្នុងលោក ។
នៅថ្ងៃសុក្រ ទី៧ កុម្ភៈ ប្រធានាធិបតីបារាំងលោកអេម៉ានុយអែល ម៉ាក្រុងបានជំរុញសហភាពអឺរ៉ុបឲ្យអភិវឌ្ឍសមត្ថភាពរបស់ខ្លួនកាន់តែខ្លាំងនៅចំពោះមុខភាពគ្មានសណ្តាប់ធ្នាប់ក្នុងលោក។ នៅក្នុងន័យនេះ លោកម៉ាក្រុងបានអំពាវនាវឲ្យអឺរ៉ុបចូលរួមពេញលេញនៅក្នុងការចរចាខាងមុខស្តីពីការគ្រប់គ្រងគ្រឿងសព្វាវុធ រួមទាំងកិច្ចសន្ទនាយុទ្ធសាស្រ្តស្តីពីតួនាទីនៃកម្លាំងនុយក្លេអ៊ែររបស់បារាំង។
ការថ្លែងរបស់លោកម៉ាក្រុងយ៉ាងដូចនេះបានធ្វើឡើងនៅក្នុងសុន្ទរកថាមួយជាង ១ម៉ោងស្តីពីយុទ្ធសាស្រ្តការពារ និងកម្លាំងនុយក្លេអ៊ែរបារាំងរៀបចំក្នុងសាលាយោធាក្រុងប៉ារីស។ នៅចំពោះមុខមន្រ្តីយោធា និងអនុព័ន្ធការពារជាតិ រួមទាំងវត្តមានប្រមុខការទូត និងប្រមុខការពារជាតិ លោកម៉ាក្រុងបានបញ្ជាក់ច្បាស់ៗថា សហភាពអឺរ៉ុបមិនអាចបន្តដើរតួនាទីជាអ្នកទស្សនាការប្រកួតប្រជែងអាវុធនុយក្លេអ៊ែរបានឡើយ។ លោកម៉ាក្រុងបានបញ្ជាក់ជាថ្មីថា យុទ្ធសាស្រ្តនុយក្លេអ៊ែរបារាំងមានគោលដៅទប់សង្គ្រាម និងថា បារាំងនឹងមិនចូលរួមក្នុងសង្រ្គាមនុយក្លេអ៊ែរ ឬមួយក៏ប្រើអាវុធនុយក្លេអ៊ែរដើម្បីជាការសងសឹកទេ។
« យុទ្ធសាស្រ្តនុយក្លេអ៊ែររបស់ប្រទេសបារាំងមានគោលដៅសំខាន់ក្នុងការទប់ស្កាត់សង្រ្គាម។ កម្លាំងនុយក្លេអ៊ែររបស់យើងគ្មានគោលដៅប្រឆាំងនឹងប្រទេសណាមួយទេ។ ខ្ញុំសូមបញ្ជាក់ជាថ្មីម្តងទៀតនៅទីនេះថា បារាំងនឹងមិនចូលប្រឡូកនៅក្នុងសង្រ្គាមនុយក្លេអ៊ែរ ឬមួយក៏ប្រើអាវុធនុយក្លេអ៊ែរដើម្បីជាការសងសឹកនោះឡើយ។ ដោយឡែក កម្លាំងនុយក្លេអ៊ែររបស់យើងដើរតួនាទីសំខាន់ខ្លាំងណាស់ ពិសេសក្នុងសហភាពអឺរ៉ុប។
កម្លាំងនុយក្លេអ៊ែររបស់យើងបានចូលរួមពង្រឹងសន្តិសុខនៅក្នុងសហភាពអឺរ៉ុប និងអត្ថិភាពរបស់អឺរ៉ុប។ នៅក្នុងន័យនេះ កម្លាំងនុយក្លេអ៊ែររបស់យើងមានវិសាលភាពចំពោះសហភាពអឺរ៉ុប។ ត្រង់ចំណុចនេះ ឯករាជ្យភាពនៃការសម្រេចចិត្តរបស់យើងពិតជាត្រូវគ្នាយ៉ាងពេញលេញជាមួយនឹងសាមគ្គីភាពដែលមិនចេះរង្គោះរង្គើជាមួយដៃគូអឺរ៉ុបរបស់យើង។
ការសន្យារបស់យើងដើម្បីសន្តិសុខ និងការពារអឺរ៉ុប ហើយទឹកចិត្តសាមគ្គីភាពរបស់យើងតែងជិតស្និទ្ធជានិច្ច។ យើងបញ្ជាក់ឲ្យបានច្បាស់ថាចាប់ពីពេលនេះតទៅ ផលប្រយោជន៍សំខាន់របស់បារាំងមានវិសាលភាពចំពោះសហភាពអឺរ៉ុប »។
កន្លងមកប្រធានាធិបតីបារាំង ក៏បាន ទាមទារឲ្យអូតង់ កែប្រែយុទ្ធសាស្រ្តយោធាឡើងវិញ របស់សម្ព័ន្ធណាតូ។ សមាជិករបស់អង្គការ អូតង់ នៅតែខ្វែងគំនិត មិនចុះសម្រុងគ្នា តាំងពីបញ្ហាយុទ្ធសាស្រ្ត និងថវិការបស់អូតង់។ នៅក្នុងជំនួបជាមួយអគ្គលេខាធិការអង្គការអូតង់ នៅទីក្រុងប៉ារីស ប្រធានាធិបតី បារាំង ម៉ាក្រុង បានរក្សាសំដីដដែលរបស់លោកដែលធ្លាប់បានចាត់ទុកសម្ព័ន្ធអាត្លង់ទិក អូតង់ថា ជាស្ថាប័នដូចស្លាប់។
ជាមួយគ្នានោះ ប្រធានាធិបតី បារាំង ទ្វីបអឺរ៉ុប មិនអាចមានស្ថិរភាព និងសុវត្ថិភាព ទេ បើសិនប្រទេសនៅអឺរ៉ុបផ្ទាល់ មិនធ្វើនយោបាយសន្តិភាព និងបញ្ជាក់ឲ្យច្បាស់ពីទំនាក់ទំនងល្អជាមួយរុស្ស៊ីនោះ។
នៅថ្ងៃព្រហស្បតិ៍ ប្រធានាធិបតីបារាំងអះអាងថា បារាំងមិនបានទទួលយល់ព្រមតាមសំណើរបស់រុស្ស៊ី ដែលចង់ឲ្យមានការផ្អាក ការពង្រាយ មីស៊ីល នៅទឹកដីអឺរ៉ុបខាងកើត ក្បែរព្រំដែនរុស្ស៊ីនោះទេ។ ប៉ុន្តែ ប្រធានាធិបតីបារាំងបានទាមទារឲ្យអង្គការអូតង់ ចរចាសំណុំរឿងនេះ ជាមួយរុស្ស៊ី ដោយមានដាក់បញ្ចូលភាគីអឺរ៉ុបទៅការចរចាផងដែរ។
សន្ធិសញ្ញាស្តីពីមីស៊ីលបាញ់ចម្ងាយមធ្យម ដែលចុះហត្ថលេខា ដោយអាមេរិក និងសហភាពសូវៀត កាលពីឆ្នាំ ១៩៨៧ បានចប់អស់សុពលភាព កាលពីខែ សីហា បន្ទាប់ពីអាមេរិកប្រកាសដកខ្លួន ឯកតោភាគី។ អាមេរិក និងអូតង់ បានចោទប្រកាន់រុស្ស៊ីថា បានរំលោភសន្ធិសញ្ញាស្តីពីមីស៊ីលបាញ់ចម្ងាយមធ្យម តាមរយៈ ការលួចផលិត មីស៊ីលដែលអាចពាំនាំក្បាលគ្រាប់នុយក្លេអ៊ែរ ទៅវាយប្រហារទីក្រុង នៅបណ្តាប្រទេសអឺរ៉ុប។
តាមអគ្គលេខាធិការអូតង់ រុស្ស៊ីបានដាក់តាំងរួចហើយមីស៊ីលបំពាក់ដោយក្បាលគ្រាប់នុយក្លេអ៊ែរ ដែលអាចបាញ់ដល់ទឹកដីអឺរ៉ុប តែក្នុងរយៈពេលប៉ុន្មាននាទី។
ប្រធានាធិបតីបារាំងវាយតម្លៃដែរថា អឺរ៉ុប ដែលជាអ្នកប្រឈមខ្លាំងជាងគេនឹងការវាយប្រហាររបស់រុស្ស៊ី គួរតែជាអ្នកដែលចេញមុខ ដើរតួនាទីសំខាន់ ក្នុងការដោះស្រាយបញ្ហាជាមួយរុស្ស៊ី ផ្ទាល់។ ប្រធានាធិបតី បារាំង កាលពីថ្ងៃព្រហស្បតិ៍ បាននិយាយថា លោកចង់ឲ្យភាគីអឺរ៉ុបចូលរួមដោយផ្ទាល់ ក្នុង សន្ធិសញ្ញា ថ្មី ស្តីពីមីស៊ីលចម្ងាយមធ្យម បន្ទាប់ពីសន្ធិសញ្ញាចាស់ ដួលរលំ នៅក្រោយ ការដកខ្លួនរបស់អាមេរិក កាលពីខែ សីហាកន្លងទៅនេះ។
សន្ធិសញ្ញាស្តីពីអាវុធបាញ់ក្នុងចម្ងាយមធ្យម ពាក់ព័ន្ធដោយផ្ទាល់ទៅលើអនាគតជោគវាសនារបស់អឺរ៉ុប ព្រោះវាជួយបញ្ជៀសមិនឲ្យរុស្ស៊ី និងអាមេរិកមានអាវុធមីស៊ីល នៅទឹកដីអឺរ៉ុប កាលពីសម័យសង្រ្គាមត្រជាក់ ប៉ុន្តែ អឺរ៉ុប គ្មានមុខជាហត្ថលេខីនៃសន្ធិសញ្ញា ដែលមានតែអាមេរិក និងរុស្ស៊ីតែប៉ុណ្ណោះ។
ប្រធានាធិបតីបារាំងចង់បញ្ជាក់ដែរថា អឺរ៉ុបមិនមែនចេះតែទុកឲ្យអាមេរិក ជាអ្នកអារកាត់ សម្រេចលើជោគវាសនារបស់អឺរ៉ុបរហូតនោះទេ។ ដោយសារចង់ឲ្យអឺរ៉ុបក្តោបក្តាប់វាសនារបស់ខ្លួន លែងសូវពឹងលើអាមេរិក ប្រធានាធិបតី បារាំង ចង់ឲ្យអូតង់ និងអឺរ៉ុបផ្ទាល់ តែម្តង បើកការចរចាជាមួយរុស្ស៊ី ជាពិសេស ពីរឿងតាំងទីគ្រាប់មីស៊ីលរបស់អាមេរិក នៅទឹកដី អឺរ៉ុប ដែលរុស្ស៊ីបានទាមទារឲ្យផ្អាក មួយរយៈសិន បន្ទាប់ពីអាមេរិក ដកខ្លួនចេញពី សន្ធិសញ្ញាស្តីពីអាវុធបាញ់បានចម្ងាយមធ្យម កាលពីខែសីហា។ តាមប្រធានាធិបតីបារាំង គេត្រូវចរចា កសាង រចនាសម្ព័ន្ធ ថ្មី ខាងផ្នែក សន្តិសុខ ហើយនិងការទុកចិត្តគ្នា ជាមួយ រុស្ស៊ី ដើម្បី សុវត្ថិភាព របស់អឺរ៉ុប៕
