សារព័ត៌មាន នគរវត្ត តែងតែនាំមុខគេជានិច្ច
នាយករដ្ឋមន្ត្រីថៃ លោកប្រាយុទ្ធ ចាន់អូចា បានថ្លែងថា ករណីបាញ់ប្រហារនៅផ្សារទំនើបTerminal 21 ស្ថិតនៅក្នុងទីក្រុង Nakhon Ratchasima ឬដែលស្គាល់ថា ទីក្រុង Korat នោះបណ្តាលឲ្យស្លាប់មនុស្សសរុប២៧នាក់ ក្នុងនោះរួមបញ្ចូលទាំងទាហានម្នាក់ដែលជាអ្នកវាយប្រហារផងដែរ និង៥៧នាក់ផ្សេងទៀតបានរងរបួសធ្ងន់ ស្រាល ។ ខ្មាន់កាំភ្លើងបានធ្វើសកម្មភាពកាលពីវេលាល្ងាចថ្ងៃទី៨ ខែកុម្ភៈ ឆ្នាំ២០២០។
លោកនាយករដ្ឋមន្ត្រីថៃបានបញ្ជាក់ថា ខ្មាន់កាំភ្លើងបានបើកការបាញ់រះដោយសារតែរឿងផ្ទាល់ខ្លួន គឺការលក់ផ្ទះមួយរបស់រូបគេ ។
ប៉ូលិសថៃបានបញ្ជាក់ថា ជនវាយប្រហារត្រូវបានបាញ់សម្លាប់នៅពេលក្រោយមកដោយកងកម្លាំងសន្តិសុខ ។ ប៉ូលិសថៃបានបញ្ជាក់នៅលើបណ្តាញសង្គមធ្វីតធើថា «បេសកកម្មត្រូវបានបញ្ចប់» ។ ជនល្មើសបានបាញ់សម្លាប់កងកម្លាំងពិសេសម្នាក់ផងដែរ ។
គួររំលឹកថា នៅមុនពេលព្រឹត្តិការណ៍នេះបានកើតឡើង ខ្មាន់កាំភ្លើងជាយោធាបានសរសេរសារបង្ហោះនៅលើហ្វេសប៊ុកថា «ខ្ញុំហត់នឿយណាស់ ធុញទ្រាន់ណាស់…ខ្លួនខ្ញុំមិនអាចកម្រើកខ្លួន សូម្បីតែម្រាមដៃ ។ តើ ខ្ញុំគួរតែចុះចាញ់មែនទេ? …រកស៊ីមានបានដោយសារតែពុករលួយ និងកេងប្រវ័ញ្ចពីអ្នកដទៃ។ តើពួកគេគិតថាអាចយកលុយទាំងនោះទៅចាយ នៅឋានរកមែន?»។
ប៉ូលិសថៃបានឲ្យអត្តសញ្ញាណជនសង្ស័យថា ឈ្មោះ Jakrapanth Thomma អាយុ៣២ឆ្នាំ មកពីជំរំយោធា Surathampithak ៕
