សារព័ត៌មាន នគរវត្ត តែងតែនាំមុខគេជានិច្ច
បច្ចុប្បន្នអឺរ៉ុប បារម្ភខ្លាចជនភៀសខ្លួនស៊ីរី ជិត១លាននាក់ បន្តចាកចេញពីប្រទេសដោយសារសង្គ្រាម ។ជាមួយគ្នានោះតួកគីអាចបើកទ្វារព្រំដែនជាប់ប្រទេសក្រិចឲ្យចូលមកអឺរ៉ុប អាចបង្កឲ្យមានវិបត្តិជនភៀសខ្លួនសាជាថ្មី ដូចដែលធ្លាប់កើតឡើងក្នុងតំបន់អឺរ៉ុប កាលពីឆ្នាំ២០១៥។
តួកគីមានជនភៀសខ្លួនប្រមាណ៤លាននាក់ ក្នុងនោះមានជនជាតិស៊ីរី៣,៦លានានក់ ។
កាលពីសប្តាហ៍កន្លងមករដ្ឋាភិបាលតួកគីបានប្រកាសថានឹងមិនរារាំងដល់ជនភៀសខ្លួនណាមានបំណងចង់ទៅកាន់អឺរ៉ុបនោះឡើយ។ ដោយខ្លាចតួកគីបើកព្រំដែន សហគមន៍អឺរ៉ុបបានសម្រេចផ្តល់ជំនួយជាទឹកប្រាក់៥០០លានអឺរ៉ូដល់ ប្រទេសតួកគី សម្រាប់ជួយដល់ ក្រុមជនភៀសខ្លួន។ ជំនួយខាងលើត្រូវបានភាគីស៊ីរីចោទថា រដ្ឋាភិបាលតួកគីប្រើប្រាស់ជនភៀសខ្លួនស៊ីរី ចាប់ជំរិតអឺរ៉ុប។
ចាប់តាំងពីឆ្នាំ២០១៦ មកទល់ពេលនេះ អឺរ៉ុបបានជួយដល់តួកគី នៅទឹកប្រាក់៣,៦ពាន់លានដុល្លារ សម្រាប់ជួយដល់ជនភៀសខ្លួនស៊ីរី៣,៦លាននាក់នៅក្នុងប្រទេសតួកគី។ ការផ្តល់ជំនួយខាងលើកើតឡើង ក្រោយពេលតួកគីព្រមានអឺរ៉ុបថា នឹងដោះលែងជនភៀសខ្លួនទាំងអស់ឲ្យចូលអឺរ៉ុប ប្រសិនបើអឺរ៉ុប មិនជួយចិញ្ចឹមជនភៀសខ្លួនទាំងនោះទេ ។
កន្លងមក មន្ត្រីសហគមន៍អឺរ៉ុបក៏បានចោទប្រកាន់តួកគីថា«ចាប់ជំរិត»ទារប្រាក់ពីសហគមន៍អឺរ៉ុបផងដែរ។ តួកគីធ្លាប់បានព្រមានថា នឹងបើកព្រំដែនឲ្យជនភៀសខ្លួនជាង៣លាននាក់ចូលទៅអឺរ៉ុប ប្រសិនបើអឺរ៉ុបមិនផ្តល់ជំនួយគ្រប់គ្រាន់នោះទេ។ តួកគីមិនមែនជាអ្នកទទួលខុសត្រូវនោះឡើយ គឺអឺរ៉ុបទាំងមូល ត្រូវតែមានចំណែកជួយដល់ជនភៀសខ្លួន។
កន្លងមកប្រធានាធិបតីស៊ីរីលោក អាលអាសាដបានប្រកាសថា តួកគីកំពុងតែអូសទាញផលប្រយោជន៍នយោបាយនិងសេដ្ឋកិច្ច ពីជនភៀសខ្លួនស៊ីរី ដោយយកជនភៀសខ្លួនទៅគំរាមកំហែងអឺរ៉ុប។ មិនតែប៉ុណ្ណោះតួកគី បង្ខំឲ្យអឺរ៉ុបគាំទ្រ ក្នុងសង្គ្រាមវាយប្រហារនៅលើទឹកដីស៊ីរីទៀតផង៕ ម៉ែវ សាធី
