សារព័ត៌មាន នគរវត្ត តែងតែនាំមុខគេជានិច្ច
កីឡាករ Dominic Thiem ត្រូវបាន អ្នកគាំទ្រ និងអ្នកវិភាគកីឡាបានចោមរោមសរសើរដោយសារតែកីឡាកររូបនេះទទួលបានចំណាត់ថ្នាក់លេខ២ ក្នុងការប្រកួតពានរង្វាន់ Australian Open 2020 ចំពោះពាក្យសម្ដីដ៏ឈ្លាសវៃរបស់គេក្រោយប្រកួតចាញ់កីឡាករចំណាត់ថ្នាក់លេខ២ពិភពលោក Novak Djokovic ។
ក្រោយប្រកួតវគ្គផ្តាច់ព្រ័ត្រកីឡាករ Dominic Thiem បាននិយាយថា“យើងទាំងអស់គ្នាសុទ្ធតែបានឃើញហើយ តាំងពីមុនពេលប្រកួត ពេលកំពុងប្រកួត អ្វីដែលយើងកំពុងធ្វើ មានរឿងជាច្រើនក្នុងជីវិតរបស់យើងដែលសំខាន់ជាងការប្រកួតនេះឆ្ងាយណាស់។ ប្រទេសដ៏ស្រស់ស្អាតនេះបាន និងកំពុងតែឆ្លងកាត់នូវពេលវេលាដ៏លំបាក។
កីឡាកររូបនេះបានបន្តថា “ការប្រកួត Australian Open បានជួយឱ្យយើងឈប់គិតពីពេលវេលាលំបាកនេះមួយរយៈ ប៉ុន្តែខ្ញុំនៅតែសង្ឃឹមថាប្រទេសអូស្ត្រាលី ប្រជាជន និងជីវិតសត្វទាំងឡាយដែលបានរងគ្រោះនៅទីនេះ នឹងបានរឹងមាំឡើងវិញឆាប់ៗ ។ យើងសង្ឃឹមថាគ្រោះមហន្តរាយធម្មជាតិដ៏អាក្រក់បែបនេះ នឹងមិនកើតមានម្ដងទៀតនោះទេ ។ ខ្ញុំទទួលបានការគាំទ្រដ៏ធំធេងក្នុងអំឡុងពេល ២សប្ដាហ៍កន្លងមកនេះ សូមអរគុណដល់អ្នកគាំទ្រទាំងអស់ដែលបានមកទស្សនាដល់ទីលានប្រកួតនេះ។ នេះជាព្រឹត្តិការណ៍ប្រកួតមួយក្នុងចំណោមការប្រកួតកីឡាដែលធំបំផុត ខ្ញុំរីករាយណាស់ដែលបានមកដល់ទីនេះ ហើយខ្ញុំទន្ទឹងរង់ចាំការមកដល់នៃការប្រកួតឆ្នាំក្រោយ”។
Dominic Thiem បានបន្តទៀតថា “អ្នក និងកីឡាករ ២រូបផ្សេងទៀតបានរុញច្រានការប្រកួតវាយកូនបាល់ផ្នែកបុរសឱ្យឡើងដល់កម្រិតមួយថ្មីហើយខ្ញុំមានមោទនភាព និងរីករាយណាស់ដែលអាចចូលរួមប្រកួតក្នុងសម័យកាលនេះ។ ខ្ញុំមានអារម្មណ៍ថាអន់ចិត្តបន្តិចបន្តួចក្នុងការប្រកួតថ្ងៃនេះប៉ុន្តែខ្ញុំសង្ឃឹមថាអាចឆ្លងកាត់អារម្មណ៍មួយនេះ និងអាចមានឱកាសសងសឹកវិញបាន”។
ពាក្យសម្ដីទាំងនេះ បានធ្វើឱ្យ Thiem ទទួលបានការកោតសរសើរជាច្រើនពីសំណាក់អ្នកគាំទ្រ ដូចដែលបានឮ និងជាពិសេសអ្នកវិភាគកីឡាវាយតឺន្នីសភាគច្រើនបានបង្ហាញពីអារម្មណ៍ រំភើបនឹងកោតសរសើរពីទឹកចិត្តជាអ្នកកីឡា ៕ដោយ៖ ភារៈ
