សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ក្រោយពីផ្ទុះការរិះគន់យ៉ាងខ្លាំងពីសំណាក់មហាជន ពាក់ព័ន្ធលោក ចាន់ ឬទ្ធី ចាងហ្វាង គេហទំព័រ សារព័ត៌មាន CKV online ដែលចេញផ្សាយព័ត៌មាន(ផ្សាយផ្ទាល់) នូវព័ត៌មានមួយចំនួនដែលមានកាយវិការ និងពាក្យពេជ្រមិនសមរម្យដែលមើលទៅ ខ្វះនូវក្រមសីលធម៌និងវិជ្ជាជីវៈជាអ្នកសារព័ត៌មាន ទើបនាយកដ្ឋានមណ្ឌលព័ត៌មាន បានកោះហៅ មកធ្វេីការអប់រំ ណែនាំជាលេីកទីពីរ ។
លោក យ៉ែម ណយ ទីប្រឹក្សាក្រសួងព័ត៌មាន និងជាប្រធាននាយកដ្ឋានមណ្ឌលព័ត៌មាន នៅព្រឹកថ្ងៃទី១៣ ខែមីនា ឆ្នាំ២០២០ វេលាម៉ោង១០ និង០០នាទី បានកោះហៅលោក ចាន់ ឬទ្ធី ចាងហ្វាងគេហទំព័រព័ត៌មាន ចក្រវាឡ CKV tvonline មកធ្វើការណែនាំនៅក្រសួងព័ត៍មាន ដែលចេញផ្សាយព័ត៌មាន ដោយប្រើកាយវិការ និងពាក្យពេជ្រណាមិនសមរម្យ ដែលមើលទៅគ្មានក្រមសីលធម៌ វិជ្ជាជីវៈជាអ្នកសារព័ត៌មាននោះទេ ។
លោក យ៉ែម ណយ បានសង្កត់ធ្ងន់ថា ក្នុងនាមជាអ្នកសារព័ត៌មាន គឺមិនត្រូវធ្វើខ្លួនខុសពីច្បាប់ស្តីពីរបបអ្នកសារព័ត៌មាន ដែលតាំងខ្លួនឯងជាមន្ត្រីនគរបាល , តុលាការ , មេធាវី និងជាអ្នកសម្របសម្រួល ឬក៏ដោះស្រាយបញ្ហាថាអ្នកនេះខុសអ្នកនោះត្រូវនោះទេ ។
លោកប្រធាននាយកដ្ឋានមណ្ឌលព័ត៌មាន បានបន្តទៀតថា កាលថ្ងៃទី១៤ ខែមករា ឆ្នាំ២០២០ ក្នុងពិធីជួបជុំលើកទី៤រវាងសម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងអ្នកសារព័ត៌មានក្នុងស្រុកទូទាំងប្រទេសសម្តេចតេជោ ហ៊ុន សែន ក៏បានផ្តល់នូវ អនុសាសន៍ដល់អ្នកសារព័ត៌មានដែរ ដោយមានពាក្យស្លោក កុំពានអ្នកដ៏ទៃកុំបំភ្លៃកាពិត ។ ប៉ុន្តែអ្វីដែលលោក ចាន់ ឬទ្ធី ចាងហ្វាងចក្រវាឡ បានអត្ថាធិប្បាយក្នុងការផ្សាយផ្ទាល់កន្លងមក គឺបានបំពានអ្នកដ៏ទៃហើយបំភ្លៃការពិត ដែលក្រសួងព័ត៌មានមិនអនុញ្ញាតឲ្យបុគ្គលណាម្នាក់ធ្វើនូវទង្វើបែបនេះឡើយ ។
ក្រោយទទួលនូវការទូមានអប់រំជាលើកទី២ លោក ចាន់ ឬទ្ធី បានសន្យាថាខ្លួននិងមិនធ្វើឲ្យខុសពីក្រមសីលធម៌ និង វិជ្ជាជីវៈ ជាអ្នកសារព័ត៌មានទៀតឡើយ ហើយលោកក៏បានសន្យាថា និងធ្វើកិច្ចសន្យាលាយលក្ខណ៍អក្សរព្រមទទួលនូវការអប់រំពី លោក យ៉ែម ណយ ទីប្រឹក្សាក្រសួងព័ត៌មាននិងជាប្រធាននាយកដ្ឋានមណ្ឌលព័ត៌មានផងដែរ ៕ ស រស្មី
