សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ ក្រោយរាជរដ្ឋាភិបាលប្រកាសបិទសាលារៀននៅក្រុង-ខេត្តសៀមរាបបណ្តោះអាសន្នព្រោះតែវីរុសកូវីដ-១៩រួចមក នៅថ្ងៃសុក្រនេះ មន្ត្រីក្រសួងក្រសួងអប់រំ យុវជន និងកីឡាសម្រេច បង្កើតកម្មវិធីសិក្សា “ការរៀនតាមប្រព័ន្ធអេឡិចត្រូនិក (E-Learning) ឥតគិតថ្លៃលើមុខវិជ្ជាឯកទេសចំនួន៦រួមមាន ៖ គណិតវិទ្យា គីមីវិទ្យា រូបវិទ្យា ប្រវត្តិវិទ្យា ជីវវិទ្យា និងភាសាខ្មែរ ដែលអាចឱ្យប្អូនៗសិស្សានុសិស្សទាំងអស់សិក្សាដោយខ្លួនឯងបាន ទាំងនៅលើបណ្តាញទំនាក់ទំនងសង្គមផ្លូវការ និងប្រព័ន្ធសិក្សាតាមអេឡិចត្រូនិករបស់ក្រសួងអប់រំ ។
យោងតាមសេចក្តីប្រកាសព័ត៌មានក្រសួងអប់រំ និងយុវជនកីឡានៅថ្ងៃទី១៣ ខែមីនា ឆ្នាំ២០២០នេះឲ្យដឹងថា ការរៀនតាមប្រព័ន្ធអេឡិកត្រូនិក (E-Learning) សម្រាប់ជំនួយដល់សិស្សានុសិស្ស
ដើម្បីជាជំនួយដល់ការសិក្សារបស់សិស្សានុសិស្សថ្នាក់ទី៩ និងថ្នាក់ទី ១២ ដែលបានផ្អាកការសិក្សាជា បណ្តោះអាសន្ននៅគ្រឹះស្ថានសិក្សាសាធារណៈ និងឯកជនក្នុងក្រុងសៀមរាប ខេត្តសៀមរាប ក្នុងការចូលរួមទប់ស្កាត់ ការរីករាលដាលនៃជំងឺ Covid-19 ក៏ដូចជាសម្រាប់សិស្សានុសិស្សដទៃទៀតដែលមានបំណងទទួលការបំប៉នបន្ថែម ក្រសួងអប់រំ យុវជន និងកីឡា បានបង្កើតកម្មវិធីសិក្សា “ការរៀនតាមប្រព័ន្ធអេឡិចត្រូនិក (E-Learning) ដោយឥតគិតថ្លៃលើមុខវិជ្ជាឯកទេសចំនួន៦ ដែលអាចឱ្យប្អូនៗសិស្សានុសិស្សទាំងអស់អាចសិក្សាដោយខ្លួនឯងបាននៅលើបណ្តាញទំនាក់ទំនងសង្គមផ្លូវការ និងប្រព័ន្ធសិក្សាតាមអេឡិចត្រូនិករបស់ក្រសួង។
មន្ត្រីក្រសួងអប់រំបានបញ្ជាក់ក្នុងសេចក្តីប្រកាសព័ត៌មានថា កម្មវិធីនេះបង្កើតឡើងក្នុងគោលបំណងជំនួយដល់ការសិក្សារបស់ប្អូនៗសិស្សានុសិស្សអាចនៅតែបន្តការសិក្សាបានដោយខ្លួនឯង នៅគ្រប់ទីកន្លែងនិង ស្របតាមពេលវេលាផ្ទាល់ខ្លួនរបស់សិស្សានុសិស្ស សម្រាប់ជាជំនួយស្មារតីក្នុងការត្រៀមប្រឡងសញ្ញាបត្រមធ្យម សិក្សាបឋមភូមិ និងទុតិយភូមិ តាមកាលបរិច្ឆេទដែលបានគ្រោងទុក។ មុខវិជ្ជាឯកទេសបង្រៀនទាំង០៦ រួមមាន៖ គណិតវិទ្យា ប្រវត្តិវិទ្យា រូបវិទ្យា គីមីវិទ្យា ជីវវិទ្យា និងភាសាខ្មែរ។
សេចក្តីប្រកាសបញ្ជាក់បន្តថា ក្រសួងនឹងដាក់ឱ្យដំណើរការកម្មវិធីបង្រៀនតាមអេឡិចត្រូនិកនេះ ចាប់ពីថ្ងៃទី១៣ ខែមីនា ឆ្នាំ២០២០តទៅ ដោយសិស្សានុសិស្សអាចសិក្សាបានតាមរយៈមធ្យោបាយដូចខាងក្រោម ៖
១-បណ្ដាញ YouTube ផ្លូវការរបស់ក្រសួង៖ www.youtube.com/moeys ដែលនឹងមានវីដេអូ បង្រៀន ទាំងអស់ សម្រាប់សិស្សានុសិស្សអាចសិក្សាបានទៅតាមពេលវេលាជាក់ស្តែងរបស់ខ្លួន ។
២- ទំព័រហ្វេសប៊ុកផ្លូវការរបស់ក្រសួង៖ www.facebook.com/moeys.gov.kh ដែលនឹងធ្វើការផ្សព្វផ្សាយ ជារៀងរាល់ថ្ងៃ ដោយពេលព្រឹកសម្រាប់ថ្នាក់ទី៩ និងពេលរសៀលសម្រាប់ថ្នាក់ទី១២ ។
៣-មជ្ឈមណ្ឌលសិក្សាអេឡិចត្រូនិករបស់ក្រសួង៖ Elearning.moeys.gov.kh ដោយសិស្សានុសិស្សអាច ចូលទៅសិក្សាបានដោយចូលទៅជ្រើសរើសវគ្គសិក្សា ឬមេរៀនដែលត្រូវសិក្សាដោយឥតគិតថ្លៃ និងមិនចាំ បាច់ចុះឈ្មោះ (ចូលជាភ្ញៀវ)។
សេចក្តីប្រកាសព័ត៌មានខាងលើនេះ ដើម្បីឲ្យលោកគ្រូ អ្នកគ្រូ មាតាបិតា អ្នកអាណាព្យាបាលសិស្សចូលរួមជំរុញ លើកទឹកចិត្តប្អូនៗសិស្សានុសិស្សទាំងអស់ ជាពិសេសផ្តល់លក្ខខណ្ឌអំណោយផល ដើម្បីអាចបន្តសិក្សាតាមប្រព័ន្ធ អេឡិចត្រូនិកបានជាប្រចាំដោយចូលទៅក្នុងគេហទំព័រ និងបណ្តាញ ទំនាក់ទំនងសង្គមដែលបានផ្តល់ជូនខាងលើតាមការគួរ ៕ ដោយ ៖ ជាយក្រុង
