សារព័ត៌មាន នគរវត្ត តែងតែនាំមុខគេជានិច្ច
លីកកំពូលបាល់ទាត់ប្រទេសប៊ែលឡារូស (Belarus Premier League) បានបើករដូវកាលថ្មីដោយប្រកួតបាន២គូហើយ បើទោះបីប្រទេសនៅអឺរ៉ុបភាគច្រើនកំពុងព្រួយបារម្ភ និងមានកីឡាករ មួយចំនួនបានឆ្លងវីរុសកូរ៉ូណាក៏ដោយ។
ប្រធានសហព័ន្ធបាល់ទាត់ប៊ែលឡារូស លោក Vladimir Bazanov បានបញ្ជាក់ថា ទោះជាប្រទេសផ្សេងៗបានផ្អាក ឬលើកពេលក៏ដោយ ប៉ុន្តែគ្មានហេតុផលអ្វីដែលប្រទេសរបស់លោកត្រូវផ្អាកដែរនោះទេ។
នៅក្នុងការប្រកួតលីកកំពូលប្រទេសមួយនេះក៏បានបើកឲ្យមានអ្នកគាំទ្រចូលទស្សនាផ្ទាល់ផងដែរ ដោយមិនក្រែងរអាខ្លាចជំងឺកូវីដ-១៩ បន្តិចណាឡើយ បើទោះបីជានៅក្នុងប្រទេសនោះកើតមានករណីឆ្លង៥១នាក់មកហើយក៏ដោយ។
អំឡុងពេលវីរុស COVID-19 វាយលុកយ៉ាងខ្លាំងក្លា លីកកំពូលធំៗនៅអឺរ៉ុបដូចជា Premier League, Serie A , La Liga, Bundesliga និង Ligue 1 ត្រូវបាន ផ្អាក ខណៈដែលពានធំប្រចាំទ្វីបអឺរ៉ុប Euro 2020 និងពានរង្វាន់ប្រចាំទ្វីបអាមេរិកឡាទីន Copa America 2020 ត្រូវបានប្រកាសពន្យារពេលការប្រកួតដល់ឆ្នាំ២០២១ ៕ដោយ៖ ភារៈ
