សារព័ត៌មាន នគរវត្ត តែងតែនាំមុខគេជានិច្ច
មន្ត្រីជាន់ខ្ពស់នៅអាមេរិក រាប់ទាំងប្រធានាធិបតី អនុប្រធានាធិបតី ភរិយា ក្រុមគ្រួសារទាំងមូលបាននាំគ្នាទៅធ្វើតេស្តរកវីរុសកូវីដ-១៩ ក្រោយរកឃើញមន្ត្រីជាន់ខ្ពស់និងជាន់ទាបជាច្រើននាក់បានឆ្លងកូវីដ-១៩។
អនុប្រធានាធិបតីអាមេរិក លោក Mike Pence បានទៅធ្វើតេស្តក្រោយពេល សមាជិកមួយរូប ក្នុងចំណោមបុគ្គលិករបស់លោក បានធ្វើតេស្តដោយមានលទ្ធផលវិជ្ជមាន កូវីដ-១៩ ។ នៅពេលនេះ ក្រុមការងារ រួមទាំងអនុប្រធានាធិបតី និងភរិយារបស់លោក ក៏ទៅធ្វើតេស្តរកវីរុសកូវីដ១៩ទាំងអស់គ្នាតែម្តង ។
យោងតាមការចេញផ្សាយរបស់ wikipedia នៅលើទឹកដីអាមេរិក គិតត្រឹមថ្ងៃទី២៤ ខែមីនា មានអ្នកឆ្លងកូវីដ ១៩ ចំនួន ៤៦ ៤៤០នាក់ ក្នុងនោះបាត់បង់ជីវិត ៥៨៥នាក់ និង៣១៤នាក់បានចាកចេញពីមន្ទីរពេទ្យ ។
ចំណែកភរិយា ប្រធានាធីបតីអាមេរិក ដូណាលត្រាំ ក៏បានទៅធ្វើតេស្តផងដែរ។ លោកប្រធានាធិបតីដូណាល់ ត្រាំ បានថ្លែងទៅកាន់អ្នកកាសែតកាលពីថ្ងៃទី២៤ ខែមីនាថា ភរិយារបស់លោក គឺ Melania Trump ពុំមានផ្ទុកវីរុសកូវីដ ១៩នោះឡើយ គាត់សុខសប្បាយណាស់ បន្ទាប់ពីការធ្វើតេស្តនៅសេតវិមាននោះ ។
លេខាធិការព័ត៌មាននៃសេតវិមាន លោកស្រី Stephanie Grisham ក៏បានបញ្ជាក់ប្រាប់ទីភ្នាក់ងារព័ត៌មាន ស៊ីអិនអិន ផ្សាយកាលពីថ្ងៃទី២៤ ខែមីនា ឆ្នាំ២០២០ថា «លោកស្រីទីមួយ Melania Trump បានធ្វើតេស្តវីរុសកូវីដ ១៩ នៅពេលដំណាលគ្នាជាមួយលោកប្រធានាធិបតី ដូណាល់ ត្រាំ ហើយបានចេញលទ្ធផលអវិជ្ជមាន»។
លោកដូណាល់ ត្រាំ ជាអ្នកបានប្រកាសដំបូងគេដែលថា ជំទាវទី១របស់លោក បានទទួលធ្វើតេស្តវីរុសនេះ ក្នុងអំឡុងពេលដែលលោកឡើងថ្លែងសុន្ទកថា សង្ខេបព័ត៌មាននៅសេតវិមានជាមួយអ្នកកាសែត កាលពីថ្ងៃទី២៤ ខែមីនា ឆ្នាំ២០២០ ។ លោក ដូណាល់ ត្រាំ បានសង្ខេបព័ត៌មានទាក់ទងភារកិច្ចប្រយុទ្ធប្រឆាំងជំងឺកូវីដ១៩ នៅក្នុងប្រទេសអាមេរិក ហើយពេលនោះ អ្នកកាសែតមួយរូបបានសួរថា តើភរិយារបស់លោកមានបានធ្វើតេស្តដែរឬទេ ។
លោក ត្រាំ បានឆ្លើយថា «បាន» ហើយបានបន្ថែមថា ភរិយារបស់លោក «សុខសប្បាយ»នោះទេ ។ ការធ្វើតេស្តនោះធ្វើឡើងកាលពីថ្ងៃទី១៣ ខែមីនា ឆ្នាំ២០២០ គឺមានរយៈពេលជាងមួយសប្តាហ៍កន្លងមកហើយ ៕ ដោយ៖ ធីរីណា
