សារព័ត៌មាន នគរវត្ត តែងតែនាំមុខគេជានិច្ច
អង់គ្លេស៖ ក្របខណ្ឌអង់គ្លេស Premier League ចាប់ផ្តើមគំនិតផ្តួចផ្តើមមួយដើម្បីប្រមូលគ្នាបង្កើតមូលនិធិជួយដល់សេវាសុខាភិបាលជាតិអង់គ្លេស (NHS) និងចែកចាយទៅកាន់តំបន់ដែលមានតម្រូវការខ្លាំងបំផុតដែលបណ្ដាលមកពី COVID-19 ។ បើតាមការចុះផ្សាយរបស់ BBC ដែលកីឡាករក្នុងលីកកំពូលអង់គ្លេស Premier League ចង់ធ្វើដើម្បីប្រឆាំងនឹងជំងឺដ៏អាក្រក់នេះ។
គំនិតផ្តួចផ្តើមដែលមានឈ្មោះថា “PlayersTogether បានបង្កើតឡើងដើម្បីជួយដល់អ្នកប្រយុទ្ធជួរមុខរបស់ NHS ក្នុងការប្រឆាំងនឹងការរីករាលដាលនៃជំងឺឆ្លង COVID-19។
ការរួមបញ្ចូលគ្នារវាងមូលនិធិកីឡាករជាមួយ NHS ត្រូវបានបង្កើតជាឈ្មោះថ្មីមួយទៀតថា NHS Charities Together (NHSCT)” ។
រដ្ឋមន្ត្រីក្រសួងសុខាភិបាលអង់គ្លេស លោក Matt Hancock បានស្វាគមន៍យ៉ាងកក់ក្តៅចំពោះការជ្រោមជ្រែងពីសំណាក់កីឡាករដ៏ធំធេងនេះ។ លោកធ្លាប់បានលើកឡើងថា កីឡាករដែលប្រកបអាជីពនៅលីគកំពូលអង់គ្លេសគួរតែ កាត់ប្រាក់ខែមួយចំនួនអំឡុងពេលមានវិបត្តិនេះ។
ដោយឡែកអតីតប្រធានក្រុមកីឡាបាល់ទាត់ជម្រើសជាតិអង់គ្លេសលោក Gary Lineker ក៏សារទរ និងបង្ហាញមោទកភាពចំពោះកីឡាករទាំងអស់ដែលមានចិត្តចេះជួយគ្នាក្នុងគ្រាលំបាក។ លោក Lineker បានសរសេរលើបណ្តាញសង្គម Twitter ថា « កីឡាករបាល់ទាត់កំពុងបំពេញការងាររបស់ពួកគេដូចដែលខ្ញុំបានជឿជាក់ថាពួកគេនឹងធ្វើបាន។ ខ្ញុំសង្ឃឹមថានឹងមានអ្នកផ្សេងទៀតដែលនឹងធ្វើបែបនេះ»។
រហូតមកដល់ថ្ងៃទី៨ ខែមេសា ពលរដ្ឋចក្រភពអង់គ្លេសជាង៧០០០ នាក់បានស្លាប់ដោយជំងឺរលាកសួតបង្កដោយកូរ៉ូណាប្រភេទថ្មី (COVID-19) ខណៈអ្នកឆ្លងកើនដល់ជាង៦ម៉ឺននាក់៕
ដោយ៖ភារៈ
