សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ នៅវេលាម៉ោង៩ព្រឹកថ្ងៃទី១០ខែមេសាឆ្នាំ២០២០កម្លាំងអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ របស់ក្រសួងពាណិជ្ជកម្ម បានធ្វើការបំផ្លាញចោល អាល់កុលក្លែងក្លាយជាង៦ម៉ឺនលីត្រដោយដឹកយកទៅចាក់បង្ហូរចូលក្នុងលូទឹកស្អុយបឹងតាមោក ត្រង់ស្ថានីយ៍បូមទឹក ទំនប់កប់ស្រូវ ស្ថិតក្នុងភូមិផ្សារលិច សង្កាត់ព្រែកព្នៅ ខណ្ឌព្រែកព្នៅ ។
ការបំផ្លាញអាល់កុលក្លែងក្លាយនេះ បានធ្វើឡើងក្រោមការដឹកនាំរបស់លោក ឌឹម ថេង អគ្គនាយករងនៃអគ្គនាយកដ្ឋាន ការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំនៃក្រសួងពាណិជ្ជកម្មដោយមានការចូលរួមពីអភិបាលរងរាជធានីភ្នំពេញ អាជ្ញាធរ នគរបាលប្រឆាំងបទល្មើសសេដ្ឋកិច្ច សមត្ថកិច្ចមន្ទីរជំនាញពាក់ព័ន្ធ ព្រមទាំងមានការចូលរួមសម្រួលពីព្រះរាជអាជ្ញារងផងដែរ ។
បើតាមលោក ឌឹម ថេង បានឱ្យដឹងថា ថ្ងៃនេះ អគ្គនាយកដ្ឋាន (ក ប ប) រួមទាំងសមត្ថកិច្ច អាជ្ញាធរ និងមន្ត្រីជំនាញ បានបំផ្លាញអាល់កុលក្លែងក្លាយចំនួន ៦៤ ៨៤៩លីត្រ ដែលអាល់កុលទាំងនេះត្រូវបានសមត្ថកិច្ចបង្ក្រាបនាពេលកន្លងមកហើយសមត្ថកិច្ចជំនាញយកទៅពិសោធន៍ឃើញថាវាមានសារធាតុមេតាណុលជាសារធាតុពុល មិនអាចយកមកប្រើប្រាស់ក្នុងការកម្ចាត់មេរោគបាននោះទេ។មិនតែប៉ុណ្ណោះ វាអាចនឹងបណ្តាលឱ្យមានគ្រោះថ្នាក់ធ្ងន់ធ្ងរ ដល់សុខភាពមនុស្សទៀតផង។
លោក ឌឹម ថេង បញ្ជាក់ថាសារធាតុមេតាណុលនេះ ប៉ះពាល់ទៅលើសុខភាពតាមរយៈការស្រូបចូល ឬជ្រាបក្នុងស្បែកអាចពុលដល់ប្រព័ន្ធរាងកាយ និងខូចដល់ប្រព័ន្ធខួរក្បាល ព្រមទាំងការមើលឃើញចុះខ្សោយ រហូតដល់ងងឹតភ្នែកទាំងស្រុងទៀតផង ។ បើសិនជាមានការដាក់លាយក្នុងស្រា ឬភេសជ្ជៈផ្សេងៗ អាចគ្រោះថ្នាក់បាត់បង់ជីវិតផងដែរ។
យ៉ាងណាការបំផ្លាញអាល់កុលក្លែងក្លាយនេះបានធ្វើឡើងប្រមាណជា២ទៅ៣តោនប៉ុណ្ណោះដោយសារក្រុមជំនាញយល់ឃើញថាខ្លាចប៉ះពាល់ដល់បរិស្ថានហើយសន្យាថានឹងបំផ្លាញទាំងស្រុងនៅពេលក្រោយជាបន្តទៀត។ដោយ៖ប្រាថ្នា
