សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ប្រមុខរងកងទ័ពមួកខៀវកម្ពុជា បានប្រកាសពីការផ្អាកផ្លាស់ប្តូរកងកម្លាំងជាលក្ខណៈប្តូរវេនដែលតែងដំណើរការធ្វើឡើងជាប្រចាំតាមផែនការសម្រេចរបស់អង្គការសហប្រជាជាតិជារៀងរាល់មួយឆ្នាំម្តង នោះចាប់ពីពេលបច្ចុប្បន្ននេះរហូតដល់មានបទបញ្ជាថ្មីពី អ.ស.ប។
លោកស្រីឧត្តមសេនីយ៍ទោ កុសល ម៉ាលីនដា អគ្គនាយករង និងជាអ្នកនាំពាក្យមជ្ឈមណ្ឌលជាតិរក្សាសន្តិភាព បានថ្លែងបញ្ជាក់ថា៖ កងទ័ពមួកខៀវកម្ពុជាដែលកំពុងបំពេញបេសកកម្មនៅក្រៅប្រទេស ត្រូវបានណែនាំឲ្យបង្កា និងការពារពីការឆ្លងនៃជំងឺកូវីដ-១៩។ ប្រឈមនឹងជំងឺកូវីដ-១៩នេះដែរ កងទ័ពមួកខៀវរបស់កម្ពុជា ក៏ត្រូវបានណែនាំឲ្យផ្អាកការផ្លាស់ប្តូរវេនគ្នាជាបណ្តោះអាសន្ន រហូតដល់ចុងខែមិថុនា ទើបមានការសម្រេចជាថ្មី។ នេះបើតាមការបញ្ជាក់បន្ថែមពីលោកស្រី នាពេលថ្មីៗនេះ។
សូមបញ្ជាក់ថា៖ បច្ចុប្បន្ននេះ កងទ័ពមួកខៀវកម្ពុជាចំនួន៧៨៧នាក់ ក្នុងនោះរួមមានស្ត្រីចំនួន៧៦នាក់បាននិង កំពុងបំពេញបេសកកម្មក្រោមឆត្ររបស់ អង្គការសហប្រជាជាតិនៅតាមតំបន់បេសកកម្មនានារួមមាន៖ សាធារណរដ្ឋស៊ូដង់ ,សាធារណរដ្ឋស៊ូដង់ខាងត្បូង ,លីបង់ ,អាហ្រ្វិកកណ្តាល ,ម៉ាលីនិងនៅប្រទេសយ៉េមែន។
បើតាមការបញ្ជាក់ពីសំណាក់លោកស្រីឧត្តមសេនីយ៍ទោ កុសល ម៉ាលីដាបានឲ្យដឹងថា៖ រហូតមកដល់ពេលនេះ កងទ័ពមួកខៀវកម្ពុជានៅមិនទាន់មានសេចក្តីរាយការណ៍ពាក់ព័ន្ធទៅនឹងការឆ្លងជំងឺកូវីដ-១៩នៅឡើយទេ៕សហការី
