សារព័ត៌មាន នគរវត្ត តែងតែនាំមុខគេជានិច្ច
តូក្យូ៖ ប្រទេសជប៉ុនដែលមានសេដ្ឋកិច្ចលំដាប់ទី៣ របស់ពិភពលោក បន្ទាប់ពីរងផងប៉ះពាល់ធ្ងន់ធ្ងរដោយសារ ករណីCOVID-19 នាយករដ្ឋមន្ត្រីជប៉ុនលោក អាបេ ស៊ីនហ្សូ កាលពីថ្ងៃសុក្រសប្តាហ៍នេះ បានប្រកាសថា រដ្ឋាភិបាលរបស់លោកនឹងផ្តល់ថវិកាចំនួន ១០០,០០០យ៉េន ដែលស្មើនឹង ៩៣០ដុល្លារអាមេរិកដល់ប្រជាពលរដ្ឋជប៉ុនគ្រប់រូប ដើម្បីជម្រុញសេដ្ឋកិច្ចឲ្យងើបមុខឡើងវិញ ។ នេះបើយោងតាមការចេញផ្សាយ ដោយសារព័ត៌មាន CNA នាព្រឹកថ្ងៃសៅរ៍ ទី១៨ ខែមេសា ឆ្នាំ២០២០។
សេចក្តីប្រកាសខាងលើត្រូវបានធ្វើឡើង នៅក្នុងសន្និសីទសារព័ត៌មានមួយ តាមកញ្ចក់ទូរទស្សន៍ជាតិកាលពីថ្ងៃសុក្រ ស្តីអំពីការសម្រេចចិត្តប្រកាស ដាក់ប្រទេសទាំងមូលក្នុងគ្រាអាសន្ន ដើម្បីប្រយុទ្ធប្រឆាំងនឹងការរាតត្បាតជំងឺ COVID-19។
នៅក្នុងសន្និសីទកាសែតនេះ លោក អាបេ បានគូសបញ្ជាក់យ៉ាងដូច្នេះថា «យើងកំពុងរៀបចំដំណើរការ ដើម្បីប្រគល់កញ្ចប់ថវិកាទាំងនេះ ទៅដល់ដៃប្រជាជនទាំងអស់ ឲ្យបានលឿនបំផុតតាមតែអាចធ្វើទៅបាន»។
នៅក្នុងផែនការដំបូងរដ្ឋាភិបាលជប៉ុនគ្រោងថា នឹងផ្តល់ប្រាក់ឧបត្ថម្ភចំនួន ៣០០,០០០យ៉េនប៉ុណ្ណោះដល់គ្រួសារនិមួយៗ ដែលបានរងគ្រោះដោយផ្ទាល់ដោយសារជំងឺ COVID-19។ ប៉ុន្តែគម្រោងនេះបានលុបចោលទៅវិញ ដោយសម្រេចសារជាថ្មីថា គ្រប់ពលរដ្ឋជប៉ុនទាំងអស់នឹងទទួលបានប្រាក់ឧត្ថមចំនួន ១០០,០០០ យ៉េនក្នុងម្នាក់ៗតែម្តង។
បើតាមការបញ្ជាក់របស់រដ្ឋមន្ត្រីក្រសួងហិរញ្ញវត្ថុលោកថារ៉ូ អាសូ (Taro Aso) បានឲ្យដឹងថា រដ្ឋាភិបាលគ្រោងនឹងចាប់ផ្តើមផ្តល់ថវិកានេះ នៅដើមខែឧសភាខាងមុខនេះតែម្តង។
គួរជម្រាបថា ប្រទេសជប៉ុនដែលមានប្រជាជនសរុប ១២៦លាននាក់ បានរកឃើញករណីឆ្លង និងស្លាប់ដោយសារ COVID-19 តិចតួចបើប្រៀបធៀបនឹងបណ្តាប្រទេសអ៊ឺរ៉ុបមួយចំនួន ក៏ដូចជាប្រទេសសហរដ្ឋអាមេរិកជាដើម។ ប៉ុន្តែការផ្ទុះឡើងនៃចំនួនអ្នកឆ្លងថ្មីៗនៅទីក្រុងតូក្យូ រយៈពេលចុងក្រោយនេះ វាបានបង្កជាក្តីបារម្ភជាខ្លាំងសម្រាប់មេដឹកនាំជប៉ុន។
កាលពីថ្ងៃព្រហស្បតិ៍សប្តាហ៍នេះដែរ លោកនាយករដ្ឋមន្ត្រី អាបេ បានសម្រេចប្រកាសដាក់ ប្រទេសជប៉ុនទាំងមូលតែម្តង ទៅក្នុងគ្រាមានអាសន្ន ដោយសារស្ថានការណ៍ឆ្លងរាលដាលនៃជំងឺ COVID-19 នៅតែមិនមានភាពធូរស្រាល៕ ដោយ៖ ស តារា
