សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ លោក ជិន ម៉ាលីន រដ្ឋលេខាធិការ និងជាអ្នកនាំពាក្យក្រសួងយុត្ដិធម៌បានអះអាងថា ច្បាប់ស្ដីពីការគ្រប់គ្រងប្រទេសជាតិ ស្ថិតក្នុងភាពអាសន្ន នេះបើទោះបីជាអនុវត្តទៅមានការបិទសិទ្ធិសេរីភាពក៏ពិតមែន ប៉ុន្តែច្បាប់នេះ គឺមានការចាំបាច់សម្រាប់ការថែរក្សាសន្តិសុខទ្រព្យសម្បត្តិសាធារណៈ និងពង្រឹងនីតិរដ្ឋ លទ្ធិប្រជាធិបតេយ្យ និងសិទ្ធិមនុស្សតែប៉ុណ្ណោះ។
ក្នុងសន្និសីទសារព័ត៌មាន ដែលរៀបចំដោយអង្គភាពអ្នកនាំពាក្យរាជរដ្ឋាភិបាល នាព្រឹកថ្ងៃទី២២ ខែមេសា ឆ្នាំ២០២០ នៅទីស្ដីការគណៈរដ្ឋមន្រ្ដី លោក ជិន ម៉ាលីន បានសង្កត់ធ្ងន់ថា ប្រសិនបើមិនបង្កើតច្បាប់នេះ នៅពេលប្រទេសជាតិមានភាពអាសន្ននោះ រាជរដ្ឋាភិបាលច្បាស់ជាពិបាកក្នុងការគ្រប់គ្រង និងកំណត់សិទ្ធិរបស់ប្រជាពលរដ្ឋ។ ម្យ៉ាងវិញទៀត ការបង្កើតច្បាប់នេះ ធ្វើឡើងស្របតាមរដ្ឋធម្មនុញ្ញដែលបានកំណត់ ក្នុងមាត្រា២២ថ្មី។ លោក បានបញ្ជាក់ថា បើមើលទៅលើគោលការណ៍ ជាការអនុវត្តជាអន្ដរជាតិ និងបញ្ញត្តិច្បាប់សិទ្ធិមនុស្សជាតិអន្ដរជាតិ ការរឹតត្បិតនេះ មិនមែនជាការរំលោភបំពានសិទ្ធិមនុស្សនោះទេ។
លោករដ្ឋលេខាធិការបានបន្ថែមថា ការអនុវត្តរបស់ប្រទេសកម្ពុជា ក៏មិនខុសពីការអនុវត្តរបស់ប្រទេសផ្សេងៗនៅលើពិភពលោកដែរ ក្នុងកាលៈទេសៈបែបនេះ គឺតម្រូវឱ្យ មានការដាក់ចេញនូវវិធានការមួយចំនួនដែលជាការរឹតត្បិតសិទ្ធិសេរីភាព ដើម្បីប្រយោជន៍សាធារណៈ ដើម្បីសង្គ្រោះជីវិតរបស់ប្រជាពលរដ្ឋ។ លោកក៏បានចាត់ទុកថា ការព្រួយបារម្ភរបស់បុគ្គលមួយចំនួនជុំវិញការបង្កើតច្បាប់នេះ គឺជាការយល់ខុស និងមិនបានសិក្សាច្បាស់អំពីច្បាប់នេះ ហើយមួយទៀតអាចជាផលប្រយោជន៍នយោបាយតែប៉ុណ្ណោះ៕ហេង សុរិយា
