ចំនួនអ្នកឆ្លងកូវីដ១៩លើពិភពលោក ជាង៣លាននាក់ ក្នុងនោះអាមេរិក១លាននាក់ទៅហើយ

ពិភពលោក៖ គិតដល់ព្រឹកថ្ងៃទី២៨ខែមេសា ពលរដ្ឋអាមេរិក មានជាង១លាននាក់បានឆ្លងកូវីដ១៩ ស្មើនឹង១ភាគ៣នៃចំនួនអ្នកឆ្លងនៅលើពិភពលោក។ ជាមួយគ្នានេះអង្គការសុខភាពពិភពលោក បានព្យាករណ៍ថា កូវីដ១៩ អាចអូសបន្លាយរយៈពេលយូរទៀតទើបបញ្ចប់។
ក្នុងរយៈពេល២៤ម៉ោងចំនួនអ្នកស្លាប់នៅអាមេរិក មានជាង១២០០នាក់ ធ្វើឲ្យអ្នកស្លាប់កើនឡើងជាង៥៦ពាន់នាក់ហើយ។ ប្រធានាធិបតីអាមេរិក ដូណាល់ ត្រាំ បានជំរុញឲ្យបណ្តារដ្ឋ បង្កើនការធ្វើតេស្តរកកូវីដ១៩ ឲ្យបានច្រើនក្នុងមួយថ្ងៃៗ ដើម្បីគ្រប់គ្រងការឆ្លងឲ្យបានឆាប់បំផុត។
តាមរបាយការណ៍របស់ Johns Hopkins University នៅថ្ងៃទី២៧ ខែមេសា ឆ្នាំ២០២០ បានប្រកាសថាកូវីដ១៩ (COVID-19) នៅទូទាំងពិភពលោកបានកើនឡើងជាង៣ ០០២ ៣០៣ នាក់ហើយ ។ ប្រភពបន្តថា ក្នុងចំណោមអ្នកផ្ទុកវីរុសសរុប មានអ្នកជំងឺ ២០៨ ១៣១ នាក់ នៅទូទាំងពិភពលោកបានបាត់បង់ជីវិត ។
ស្ថិតិដដែលរបស់សាកលវិទ្យាល័យ Johns Hopkins បានបញ្ជាក់ថា នៅថ្ងៃទី២៧ ខែមេសា អ្នកជំងឺដែលជាសះស្បើយមានសរុប ៨៧៨ ៨១៣ នាក់ ។
សូមបញ្ជាក់ថា ៖ សហរដ្ឋអាមេរិកត្រូវបានកត់ត្រាថា មានអ្នកជំងឺកូវីដ១៩នេះ ច្រើនជាងគេបំផុត គឺ ៩៧២ ៩៦៩ នាក់ ។ បន្ទាប់មកគឺអេស្ប៉ាញ ឆ្លងសរុប ២២៩ ៤២២ នាក់ និងអ៊ីតាលី ឆ្លងសរុប ១៩៩៤១៤នាក់ ៕ដោយ៖ធី រីណា