សារព័ត៌មាន នគរវត្ត តែងតែនាំមុខគេជានិច្ច
ខេត្តបាត់ដំបង៖ បុរសជនជាតិថៃម្នាក់ ក្រោយផឹកស៊ីស្រវឹងចូលផ្ទះវិញខឹងប្រពន្ធជនជាតិខ្មែរស្តីបន្ទោសថាគិតតែផឹកមិនចេះជួយមើលកូននិងជេរថា អាគេបាញ់ !គិតខ្លីរត់ទៅចងកសម្លាប់ខ្លួនបានសម្រេច។
ហេតុការណ៍នេះកើតឡើងកាលពីវេលាម៉ោង១១និង៤០នាទីយប់ថ្ងៃទី២៨ ខែមេសា ឆ្នាំ២០២០ នៅក្រុម៣ ភូមិអូរប្រយុទ្ធ ឃុំអូររំដួល ស្រុកភ្នំព្រឹក ខេត្តបាត់ដំបង។
តាមរបាយការណ៍របស់ នគរបាលស្រុកភ្នំព្រឹក បានឲ្យដឹងថា ករណីបុរសជនជាតិថៃដែលខឹងប្រពន្ធចងកសម្លាប់ខ្លួនកើតឡើងនៅផ្ទះប្រពន្ធ របស់ខ្លួនឈ្មោះ លៀង រ៉ាន ភេទស្រី អាយុ ២៤ឆ្នាំ មានទីលំនៅកន្លែងកើតហេតុខាងលើ។ ចំណែកជនជាតិថៃរូបនេះឈ្មោះ សុរ៉ាឆៃ ចាន់សាង៉ាម ភេទប្រុស អាយុ ២១ឆ្នាំ មុមុខរបរកម្មករ មានស្រុកកំណើតភូមិឡៃលឿ ឃុំឡៃតាយ ស្រុកភីប៊ុនមាំងសាហាន ខេត្តឧប៊ុនរ៉ាតចាថាននី មានកូនក្នុងបន្ទុកម្នាក់និងបានមកស្នាក់ភូមិឃុំកើតហេតុខាងលើជាង១ឆ្នាំមកហើយ។
សមត្ថកិច្ចដដែលបានបញ្ជាក់ឲ្យដឹងថា មុនពេលកើតហេតុជនរងគ្រោះបានទៅផឹកស្រាស្រវឹងហើយពេលមកផ្ទះវិញខឹងប្រពន្ធស្តីបន្ទោសថា មិនចេះជួយមើលកូននិងជេរថា អាគេបាញ់ ទើបជនជាតិថៃរូបនេះតូចចិត្តនិងគិតខ្លីរត់ទៅចងកសម្លាប់ខ្លួននឹងដើមឈើក្បែរផ្ទះស្លាប់ចោលប្រពន្ធកូនតែម្តង។
ក្រោយមកសមត្ថកិច្ចជំនាញបានចុះទៅត្រួតពិនិត្យធ្វើកោសល្យវិច័យនៅកន្លែងកើតហេតុ ហើយបានសន្និដ្ឋានថាជនរងគ្រោះឈ្មោះ សុរ៉ាឆៃចាន់សាង៉ាម ពិតជាចងកសម្លាប់ខ្លួនប្រាកដមែនរួចបានប្រគល់សាកសពជូនក្រុមគ្រួសារយកទៅធ្វើពិធីបុណ្យតាមប្រពៃណីនិងទំនៀមទម្លាប់ខ្មែរក្នុងភូមិខាងលើតែម្តង៕ ដោយ៖ប្រាថ្នា
