សារព័ត៌មាន នគរវត្ត តែងតែនាំមុខគេជានិច្ច
អាមេរិក៖ បើទោះបីមានការអះអាងថា ពីស្ថានប័នអន្តរជាតិ ក្នុងនោះមានអង្គការសុខភាពពិភពលោក ថាវីរុសកូវីដ១៩ កើតចេញពីធម្មជាតិ មិនមែនចេញពីមន្ទីរពិសោធ របស់ចិនឡើយ។
កាលពីថ្ងៃទី៣ខែមេសារដ្ឋមន្ត្រីក្រសួងការបរទេសអាមេរិក លោក Mike Pompeo បានប្រកាសថាកូវីដ១៩ ចេញពីមន្ទីរពិសោធនៅវូហាន។ លោកបន្តទៀតថា៖ អាមេរិកមានភស្តុតាង បញ្ជាក់ ថា កូវីដ១៩ ពិតជាចេញពីវូហានពិតមែន។
នៅថ្ងៃទី៣ខែឧសភា បណ្តាញព័ត៌មាន ABC បានដកស្រង់សម្តីលោក Mike Pompeo បានបញ្ជាក់ថា ៖ ចិនមានប្រវត្តិ ឆ្លងវីរុសចេញពីបន្ទប់ពិសោធដែល ខ្វះគុណភាព ។ លោកបន្តទៀតថា នេះមិនមែនជាលើកទីមួយឡើយ ដែលពិភពលោកប្រឈមការឆ្លងវីរុស ពីការបែកធ្លាយនៅមន្ទីរពិសោធរបស់ចិន។
លោក Pompeo បញ្ជាក់ថា អាមេរិក មានភស្តុតាងគ្រប់គ្រាន់ ថាវីរុសកូវីដ១៩ ចាប់ផ្តើមចេញពី មន្ទីរពិសោធ វូហានរបស់ចិន។ ប៉ុន្តែលោកមិនបានផ្តល់ព័ត៌មានលម្អិតពីបញ្ហាខាងលើនោះឡើយ។ រដ្ឋមន្ត្រីការបរទេសអាមេរិកបានចោទប្រកាន់ចិន ថាបានបិទបាំងព័ត៌មាន ហើយប្រើប្រាស់អង្គការសុខភាពពិភពលោក WHO ធ្វើជាឧបករណ៍សម្រាប់សម្រេចគោលដៅរបស់ខ្លួន។
កន្លងមក អង្គការសុខភាពពិភពលោក បានបញ្ជាក់ថា វីរុសកូវីដ១៩មិនមែនបែកធ្លាយចេញពីមន្ទីរពិសោធរបស់ចិននោះឡើយ គឺជាការកើតចេញពិធម្មជាតិរបស់វា។ ចំណែកភាគីចិនវិញបានចោទប្រកាន់អាមេរិក ថាប៉ុនប៉ងទម្លាក់កំហុសទៅឲ្យចិន។ រដ្ឋាភិបាលទីក្រុងប៉េកាំង បានអំពាវនាវដល់អាមេរិក បញ្ឈប់សកម្មភាព យកបញ្ហាកូវីដ១៩មកជារឿងនយោបាយទម្លាក់កំហុសដាក់គ្នាទៅវិញទៅមក។ ចិនក៏ជាជនរងគ្រោះ ក្នុងករណីខាងលើនេះដែរ៕ធី រីណា
