សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ របាយការណ៍ពីនាយកដ្ឋាននគរបាលចរាចរណ៍ និងសណ្តាប់ធ្នាប់សាធារណៈនៃ អគ្គស្នងការដ្ឋាននគរបាលជាតិបានឲ្យដឹងថា នៅថ្ងៃទី១០ ខែឧសភា ឆ្នាំ២០២០នេះ ការរឹតបន្ដឹងច្បាប់ស្ដីពីចរាចរណ៍ផ្លូវគោក រកឃើញមានយានយន្ត ចំនួន១,២២៨គ្រឿង ល្មើសច្បាប់ ស្មើនឹង១,២២៨ ករណី ត្រូវបានផាកពិន័យតាមអនុក្រឹត្យលេខ៣៩ នៅទូទាំងប្រទេស ។
របាយការណ៍នេះក៏បានបង្ហាញឲ្យដឹងផងដែរថា ក្នុងចំណោមយានយន្ដទាំង១,២២៨គ្រឿងនេះ មានម៉ូតូចំនួន៨៤២គ្រឿង ល្មើសច្បាប់ ស្មើនឹង៨៤២ករណី និងរថយន្ដ ចំនួន៣៨៦គ្រឿង ល្មើសច្បាប់ ស្មើនឹង៣៨៦ករណី ។
ចំពោះអំពើល្មើសទាំងនេះភាគច្រើន បើកបរបើកបរម៉ូតូអត់មួកសុវត្ថិភាព។ ដោយឡែក សម្រាប់អ្នកបើករថយន្ដ អំពើល្មើសរួមមាន មិនពាក់ខ្សែក្រវាត់, ល្មើសល្បឿន ។
ដោយឡែកបើសរុបក្នុងរយៈពេល១០ថ្ងៃ នៃការរឹតបន្ដឹងច្បាប់ស្ដីពីចរាចរណ៍ផ្លូវគោកនេះ មានយានយន្ត ចំនួន១៨,៤៦០គ្រឿង ល្មើសច្បាប់ ស្មើនឹង១៩,១៦០ករណី ត្រូវបានផាកពិន័យតាមអនុក្រឹត្យលេខ៣៩ នៅទូទាំងប្រទេស ។
ក្នុងចំណោមយានយន្ដទាំង១៨,៤៦០គ្រឿងនេះ មានម៉ូតូចំនួន១៤,៦០៣គ្រឿង ល្មើសច្បាប់ស្មើនឹង១៤,៣៤០ករណី និងរថយន្ដ ចំនួន៣៨,៥៧គ្រឿង ល្មើសច្បាប់ ស្មើនឹង៤,៨២០ករណី ។
ក្នុងនោះអំពើល្មើសភាគច្រើន អត់មួកសុវត្ថិភាព, អត់កញ្ចក់ និងជិះបញ្ជ្រាស ។ ដោយឡែក សម្រាប់អ្នកបើករថយន្ដ អំពើល្មើសរួមមាន មិនពាក់ខ្សែក្រវាត់, ល្មើសល្បឿន,បណ្ណបើកបរ ដឹកលើសចំណុះ, និងផ្ទុកទំនិញលើស ស្លាកលេខ ភ្លើង ។
របាយការណ៍ដដែលបានវាយតម្លៃរយៈពេល១០ថ្ងៃនេះ ថា ការអនុវត្តតាមអនុក្រឹត្យថ្មី ក្នុងការផាកពិន័យយានយន្តល្មើស បានដំណើរការទៅយ៉ាងល្អប្រសើរ ។ អ្នកប្រើប្រាស់ផ្លូវទាំងអស់ ដែលបានចូលរួមគោរពច្បាប់ចរាចរណ៍ យ៉ាងល្អប្រសើរ ៕ដោយ÷ប្រាថ្នា
