សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ បុរសជាប្ដីម្នាក់ត្រូវបានសមត្ថកិច្ចនគរបាលប៉ុស្តិ៍រដ្ឋបាលឃាត់ខ្លួនបន្ទាប់ពីបុរសរូបនេះប្រើហិង្សាវាយប្រពន្ធបណ្ដាលឱ្យសន្លប់ស្តូកស្តឹងនៅនឹងកន្លែងកើតហេតុខណៈផឹកស្រាស្រវឹងហើយប្រចណ្ឌប្រពន្ធនឹងអ្នកភូមិ។
ហេតុការណ៍នេះបានកើតឡើងកាលពីវេលាម៉ោង ១២និង៣០នាទីថ្ងៃទី ១១ ខែឧសភាឆ្នាំ ២០២០ នៅត្រង់ចំណុចភូមិថ្មី ឃុំបុស្សមន ស្រុករំដួល។
សមត្ថកិច្ចនគរបាលស្រុកបានឱ្យដឹងថា ជនសង្ស័យមានឈ្មោះអ៊ុំ សាបន អាយុ ៤៧ ឆ្នាំមុខរបរកសិករ ចំណែកប្រពន្ធរងគ្រោះមានឈ្មោះខៀវ ស៊ាម អាយុ៤៨ឆ្នាំមុខរបរកសិករ រស់នៅក្នុងភូមិឃុំកើតហេតុខាងលើ។
បើតាមអ្នកភូមិបានឱ្យដឹងថា គ្រួសារនេះគឺតែងតែមានជម្លោះនឹងគ្នាខណៈបុរសជាប្ដីឱ្យតែផឹកស្រាស្រវឹងម្ដងៗតែងតែរករឿងប្រពន្ធដោយការប្រចណ្ឌទៅនិឹងអ្នកភូមិរហូត។
ប្រភពបន្តថា មុនកើតហេតុគ្រួសារនេះគឺមានជម្លោះពាក្យសម្តីគ្នាយ៉ាងខ្លាំងរហូតឈានដល់ប្រើហិង្សាដាក់គ្នា ខណៈនោះប្ដីបានវាយប្រពន្ធនិឹងដង្កាប់បណ្ដាលឱ្យបែកក្បាលហូរឈាមសន្លប់ស្ដូកស្ដឹងទៅលើដីទើបបង្កការភ្ញាក់ផ្អើលដល់អ្នកភូមិរាយការណ៍មកសមត្ថកិច្ចឱ្យជួយធ្វើអន្តរាគមន៍និងឃាត់ខ្លួនជនសង្ស័យជាប្ដីមកសាកសួរ ចំណែកស្ត្រីរងគ្រោះត្រូវបានបញ្ជូនទីកាន់មន្ទីរពេទ្យបង្អែកខេត្តស្វាយរៀង។
បច្ចប្បន្នជនសង្ស័យជាប្ដីត្រូវបានសមត្ថកិច្ចឃាត់ខ្លួននៅប៉ុស្តិ៍នគរបាលរដ្ឋបាលឃុំបុស្សមនដើម្បីកសាងសំណុំរឿងចាត់ការបន្តតាមច្បាប់៕យឹម សុថាន
