សារព័ត៌មាន នគរវត្ត តែងតែនាំមុខគេជានិច្ច
ខេត្តស្ទឹងត្រែង៖ បុរសម្នាក់ទៅជួយបងប្អូនកាប់ផ្តួលរំលំដើមឈើយកដីធ្វើចម្ការត្រូវដើមឈើរលំសង្កត់ពីលើស្លាប់ភ្លាមៗយ៉ាងអាណោចអាធ័មបំផុត។
ហេតុការណ៍ដ៏រន្ធត់នេះបានកើតឡើងកាលពីថ្ងៃទី១១ ខែឧសភា ឆ្នាំ២០២០ នៅចំណុចថ្មដារ ក្នុងភូមិស្តៅ១ ឃុំស្តៅ ស្រុកសេសាន ខេត្តស្ទឹងត្រែង។
ប្រភពព័ត៍មានពីសាក្សីនៅកន្លែងកើតហេតុ បានឲ្យដឹងថា ជនរងគ្រោះដែលស្លាប់ខាងលើ មានឈ្មោះ បូរ ភេទប្រុស អាយុ៣១ឆ្នាំ មានទីលំនៅភូមិហាងខូសួន សង្កាត់សាមគ្គី ក្រុង /ខេត្តស្ទឹងត្រែង មកជួយកាប់គាស់ចម្ការឲ្យបងរបស់គាត់ តែអកុសលពេលគាត់អារដើមឈើជិតដាច់ស្រាប់តែដើមឈើដួលរលំធ្វើឲ្យគាត់រត់គេចមិនទាន់ ក៏ត្រូវឈើដួលសង្កត់លើស្លាប់យ៉ាងអាណោចអាធ័មបំផុត។
ក្រោយកើតហេតុសាច់ញាតិបានរាយការណ៍ជូនសមត្ថកិច្ចនគរបាលប៉ុស្តិ៍ស្តៅ និងគ្រូពេទ្យជំនាញមកពិនិត្យដល់កន្លែងកើតហេតុ រួចក៏ប្រគល់សាកសពឲ្យក្រុមគ្រួសារជនរងគ្រោះយកទៅធ្វើបុណ្យតាមប្រពៃណីព្រះពុទ្ធសាសនា៕
ដោយ៖មាស សុផាត
